Ndaem byaek youq ndaw reih

Duzgaeq deih bae caeg

Fujbai mbouj guh raeg

Raeuz ninz mbouj laep da

Raeuz sinhoj ndaem haeux

Duzhaih yaek aeu cawz

Guk nyaek ndoj youq gyawz

Bawx deq gingjcaz gaemh

Daengngoenz daj doeng hwnj

Fanjfuj youq gwnz loh

Raen guk youq gyawz ndoj

Lox de doek ndaw hongx

Gaenx guh coh naj bae

Raeuz caezsim riengz dangj

Duzguk youq gyawz cangz

Bin bya dangh dah coemj

Duzguk caeuq duznyaek

Baez raen yaek aeu moeb

Mbouj hawj gyoengqde goeg

Ce hung hoeg haih vunz

Bungz gorum miz doeg

Boekfeiz byaeu mbouj sat

Gvak roengz haj cik vat

Mbouj hawj rag did ngaz

Guk haeuj ranz caeg mou

Henz dou miz vunz caez

Langh baez haeuj ndaw bae

Gaej caiq siengj buet deuz

Duznyaek caeg gwn ngaiz

Vunzlai cungj ndaej bungz

Raen guk ndoj ndaw rungh

Caez gwed cungq bae nyingz

Fap caeuq daengngoenz doengz

Youq gwnzmbwn hoengzoq

Fujbai deuz bae ndoj

Seiqcawq loh mbouj doeng

Bouxfujbai sim haeu

Naeuz sou gaej buet deuz

Gizgiz cang dietmeuz

Mwngz deuz gyawz bae ndoj

Hakdam dingq gou gangj

Gyangngoenz gaej fangzhwnz

Vanq muengx youq gyanghwnz

Mwngz hwnj gizlawz bae

Lwgraz coh gwnz bin

Lwgminz caez yien fwngz

Dangh rox couh bae cwngq

Hwng bae guh fanjfu

Duzroeg ciuz youq nga

Fanjfuj caezgya haenq

Gizlawz miz duznyaen

Canghdwknyaen deqdawz

Nyaek miz fwed nanz mbin

Huk miz din nanz byaij

De siengj ndoj roengz haij

Miz muengx baij seiqhenz

Baihgwnz miz duzbyaj

Baihlaj dieg duzlungz

Ndawgyang bouxvunz gungx

Guk hung ndoj gyawz bae

Gwnzmbwn miz muengx baij

Ndaw haij miz saeng re

Gwncienz fanh gim ce

Fex ndaej geijlai nanz

Ndawrongh miz vunz gyaep

Ndawlaep miz vunz caj

Mwngz miz fanh diuz ga

Ak baenzmaz nanz deuz

Daengq gyoengqraeuz gak boux

Mbouj aeu bae famhfap

Gwih maxmengz raih dat

Lau mwngz gag ra dai

Daengq gyoengqraeuz gak boux

Vunzvunz aeu soujfap

Byaij loh gungz deng nap

Doeklaeng gap goenq ga

Daengq gyoengqraeuz gak veih

Guh ndei mbouj guh yak

Langh mwngz dang bouxhak

Soujfap coq simdaeuz

Langh mwngz byaij loek loh

Aeu gag rox doxdauq

Haij haemz miz rumz laux

Hai ruz dauq cij an（sat）