Geiq ndaej seiz lij iq, ngoenz- haenx, ndit ndatyanyan, ndongq lumj feiz nei. Dou geij boux lwgnyez comz youq laj gofaex bakmbanj guh- caemz.

Hainduj, gyoengq lwgnyez cang guh “gaeqiq”, boux baihnaj aj song faj fwngz henhoh gyoengq baengzyoux baihlaeng cang guh “gaeqmeh”, “gaeqiq” baihlaeng boux rag dinbuh boux. Boux lwgnyez cangguh “duz- yiuh” haenx sien buet gvaq baihdoeng gonq, “gaeqmeh” gipmuengz aj song faj fwngz bae dangj “duzyiuh”. Baenzneix “duzyiuh” youh vaiq buet gvaq baihsae bae, “gaeqmeh” gip- muengz cienqndang gvaq baihsae bae, youh aj song faj fwngz dangj de, mbouj hawj de gaeb ndaej “gaeqiq” baihlaeng.

Buet bae buet ma geij baez le, “duzyiuh” cungj gaeb mbouj ndaej duz “gaeqiq” lawz, bouxlaux youq henz hemqcici:“Lai roengzrengz! Lai roengzrengz!” Aen ciengzmienh nauh- yied raixcaix.

Yaep he, “duzyiuh” daengx din roengzdaeuj, de cingq siengj miz maz banhfap daeuj gaeb “gaeqiq”. Sawq- mwh, de yawjraen “gaeqmeh” mbouj haeujsim lumj gaxgonq, couh gumx ndang cung gvaq laj fwngz “gaeqmeh” bae, buet daengz henz gyoengq “gaeqiq” couh gaeb, dauqdaej gaeb ndaej duz “gaeqiq” lo. Duz “gaeqiq” haenx caengz roxnyinh gvaqdaeuj couh deng gaeb lo.“Duzyiuh” ak lai, rox swnh “gaeqmeh” mbouj haeujsim couh okfwngz. Bouxlaux youq henz bek- fwngz haenq mbouj dingz.

Seizneix, “gaeqmeh” cij fanjying gvaqdaeuj, gipmuengz aj song faj fwngz bae dangj. Byawz rox, “duzyiuh” youh ok vaciu moq lo, de gangj:“Gou mbouj guhcaemz lo, yaek maranz guh cozyez gonq!” “Gaeqmeh” laihnaeuz dahraix, cuengq fajfwngz roengzdaeuj, mbouj hoh ndei “gaeqiq”, youh deng “duzyiuh” gaeb geij duz gaeqiq bae lo.

Doeklaeng, cij lw “gaeqmeh” ndwi lo, “duzyiuh” caiq roengzrengz gyaep geij baez couh gaeb ndaej “gaeqmeh” lo. Guhcaemz yaep ndeu, dou couh baeg lo, couh gak sanq lo.

Yienznaeuz gvaqbae geijcib bi le, hoeng, gij cingzgingj haenx lij lumj ngoenzlwenz ngamq fatseng nei, seizhaenx caen dwg haengjheiq, yienznaeuz mbouj miz baenzlai dox- gaiq ndeigwn lumj seizneix.