Liuz Ma’ngeih maij Luz Yenz, caiqlix siengj gij banhfap caenh doiq de ndei, gij neix vunz ndaw mbanj cungj yawj youq ndaw da, daihgya cungj ngeixlwnh foenfoen Luz Yenz duj va ronghsien neix dauqdaej dwg mbouj dwg caen cap youq Liuz Ma- ngeih goeng haexvaiz haeu neix.

Seizcou, Liuz Ma’ngeih caeuq Luz Yenz daengj 10 lai boux vunzmbanj caez hwnj bya bae raemj fwnz. Luz Yenz mbeiiq, de rap fwnz byaij gvaq diegmoh seiz, mbouj liuhdaengz baez sim gip, lajdin deng ndaek rin hung he bungq couh laemx roengz gwnznamh bae lo. Gij fwnz cug ndei haenx hix sanq bae caez, vunz hix laemx dwk seiqguengq coh mbwn, din de deng sieng foeggawh lo. Liuz Ma’ngeih raen le gipmuengz buet gvaqbae, bang Luz Yenz cug fwnz ndei, coenz vah he mbouj gangj couh aemq Luz Yenz baema.

Daengngoenz yaek doek bya lo, Luz Yenz bamq youq gwnz ndang Liuz Ma’ngeih hanh haeufwgfwg haenx, ndawsim raeujrubrub. De mbouj gamj doiq Liuz Ma’ngeih gangj saek coenz “docih”, de saedcaih mbouj siengj hawj Liuz Ma’ngeih roxnyinh swhgeij hix doiq de miz cingz.

Ronghndwen miz luenz vauq, vunz hix miz nanh fuk, byawz cungj liuh mbouj daengz ngoenzcog yaek baenzlawz, couh lumj aen cainanh neix doxdoengz.

Bi daihngeih seizcin, ndit rongh- sagsag, Luz Yenz guh sat gij hong ndaw reih le, naemj daengz ngoenz- seng daxmeh couh yaek daengz lo, de couh angqvauvau bae haw cawx dox- gaiq ma bwh. Ngoenzhaenx Liuz Ma- ngeih hix bae haw, gwnz ci naengh rim vunz.

Loh bya ngutngeuj gumzgamx, aen ci bibuengq mbouj dingz, sawq- mwh aen ci lumj duzmax duet cag nei nyeng ndang ringx roengz laj dat bae, aen dat neix miz seiq、hajcib mij sang, gwnz ci gyoengqvunz cungj hwk ndaej swenj hwnjdaeuj, nyaengq luenh baenz benq. Ndaw uk Luz Yenz hoengqhanghang, yaek mauh seizde roxnyinh miz boux vunz he naekgywggywg at youq gwnz ndang swhgeij, yienzhaeuh maz cungj mbouj rox lo.

Luz Yenz singj gvaqdaeuj seiz, fatyienh henz ndang lwed laeyaeng- yaeng, miz vunz hix mbouj ning saekdi ninz youq gizhaenx, miz vunz gig dwgrengz gyangz dwk, gij sieng camj ndaej hawj vunz mbouj gamj hai da yawj.

Luz Yenz gig dwgrengz gaex hai boux vunz at youq gwnz ndang de, ngaemgyaeuj sijsaeq baez yawj, dwg Liuz Ma’ngeih! Gwnz ndang de lai giz deng sieng, song da de ciengxlwenx hix hai mbouj ndaej lo. Luz Yenz sikhaek mingzbeg lo, dwg Liuz Ma- ngeih buekmingh daeuj baujhoh de, mboujnex couhdwg de dai lo. Naemj daengz gizneix, Luz Yenz nyaenx mbouj ndaej got dawz seihaiz Liuz Ma’ngeih daej ndaej mbwn baenq deih laep bae.

Doeklaeng gyoengqvunz cingjleix gij doxgaiq Liuz Ma’ngeih seiz, fat- yienh ndaw daeh de miz fung saenq he, ndaw saenq sij naeuz——

Luz Yenz ndiepgyaez:

Mwh mwngz yawj daengz fung saenq neix seiz, roxnaeuz gou gaenq lizhai gwnzbiengz neix lo.

Aenvih duenh seizgan neix daeuj gou itcig loq raen bohmeh gou, gyoengqde cungj dwg coh gou vad fwngz, yienzhaeuh raemxda doek- byoegbyoeg, got gou youq ndaw rungj. Gou guj neix dwg aen loq mbouj ndei he. Yienznaeuz vunz cij miz diuz mingh he, hoeng, vunz cungj miz ngoenz geq dai haenx, cij dwg gonqlaeng mbouj doengz.

Luz Yenz, gou daj iq couh menhmenh yawj mwngz hung, seiziq mwngz maj ndaej geijlai nyex vunz gyaez ha, seizhaenx gou couh naemj,dah iq baenzneix ndeigyaez maj hung le itdingh haq ndaej bouxgvan ndei he, bouxsai lawz aeu ndaej mwngz guh yah itdingh vuenyungz!

Doeklaeng mwngz caen bienq- baenz dahsau gyaeundei ndeu, dwg mbanj dou duj vagim he, gij daeg- mbauq gyaep mwngz caen dwg geq mbouj caenh. Hoeng, mbouj rox vihmaz, diuz loh gamjcingz mwngz mbouj lumj bouxwnq yienghhaenx swnhswnh leihleih, baezbaez dwgrengz haemzhoj. Moix baez yawjraen mwngz vih cingz hojsouh, ndawsim gou in lumj cax heh nei. Gou gig gyaez mwngz, hoeng, gij nienzgeij caeuq gij yienghsiengq dou doxliz gyae lai, caemhcaiq bohmeh gou caeux bae yaem, ranz gou mbouj miz maz ngaenz, mwngz guh yah gou itdingh deng gwn hoj.

Gou youh geq youh yakyawj, lumj goeng haexvaiz henz loh coengzlaiz mbouj miz vunz cazcam. Mwngz youh oiq youh lengj, lumj duj va ronghsien nei. Hoeng, gou lijdwg luenh siengj miz ngoenz ndeu aeu ndaej mwngz, hawj mwngz baenz lajmbwn dah bawxmoq ceiq lengj he. Gou rox mwngz hix yawj mbouj hwnj gou, gaxgonq gou daegdaengq youq baihnaj mwngz gangj gij vahbemx, hawj mwngz caeuq gou lai gangj song sam coenz vah. Mboujnex, mwngz cungj mbouj maij dam gou.

Luz Yenz, danghnaeuz ngoenz- lawz gou ciengxlwenx biek bae le, cingj mwngz ndaejgeiq, youq gwnz- biengz neix, miz bouxsai geq caemh- caiq yakyawj he caensim gyaez mwngz gvaq. Danghnaeuz miz seiqlaeng, gou nyienh caeuq mwngz caemhban, vunz hix maj ndaej baenzmbauq di, baenz- neix mwngz itdingh gyaez gou, gou itdingh aeu mwngz guh yah.

Luz Yenz, diuz loh seiqvunz lij raez, cingj gaej bae vih gij cingz gij gyaez haenx siengsim lai, mwngz itdingh aeu ngiengxgyaeuj enj aek hwnjdaeuj, mwngz itdingh ra ndaej faenh vuenyungz duh mwngz.

Liuz Ma’ngeih

bi × ndwen × ngoenz ×

Doeg sat saenq Liuz Ma’ngeih sij, Luz Yenz daej ndaej mauh bae.

(sat)