Dasih Cunh dwg aen mbanj gaeuqgeq ndeu, romcomz miz vwnzva lizsij naekna, vwnzvuz dieggeq lai, coengceiz、ranz gaeuq、gai gaeuq、gepbaiz gaeuq、aencingj gaeuq、gofaex geq doenghgij neix hawj vunz yawj le da ronghyebyeb, lumj miz cungj gamjgyoz ndonjcon bae daengz ciuhgeq ndeu nei. Bi 2010 gvaqdaeuj, ndaw yienh、cin、cunh sam gaep caemhcaez doenghfwngz dajveh le daengx mbanj lijyouz caeuq ginghci hwngfat, caezsim okrengz byaij diuzroen vwnzvuz baujhoh caeuq swnghdai haifat dox giethab, hawj ndaw mbanj miz le bienqvaq moq. Bi 2013 ndaej bingz guh aenmbanj mizmingz vwnzva lizsij Guengjsae.

Dasih Cunh dieg youq Cwngz- vangz Cin Hinghyez Yen Yilinz Si, dieg mbanj dep Dieggingj Byaloeg, miz byaheu raemxsaw, miz doengh- reih doenghnaz, ndoibya hophumx, ranz gaeuqgeq dakdaengh, gingj gyaeu yinx vunz. Ciuq sawgyog geiq naeuz, aenmbanj youq Ciuhyenz hainduj laebguh, youz Dalij、Sihcunh song aen mbanj gyoebbaenz, daengz seizneix gaenq miz 740 lai bi lizsij. Dasih Cunh aeu benq ranz gaeuq、gepbaiz gaeuq caeuq gojgaeq cienz- geiz okmingz, ndaw mbanj seizneix lij louzce miz gij ranz gaeuq yiengh Ciuhcingh haenx lumjbaenz coeng- ceiz singq Liengz、coengceiz singq Cung、ranz hung cien rin (ranzdafuh)、ranz hung singq Cung、ranz Liengz Saucan、ranz Liengz Yiciz、ranz Cungh Yi’gvei doenghgij ranz gaeuq neix, ndawde ranzdafuh guh lumj yiengh ranz honghseiqcingq Baekging、miz 30 lai fungh ranz、dieg gvangq 580 bingzfanghmij、youq Ciuhcingh seiz Hanzfungh guh neix, dwg aenranz Ciuhcingh Hanzfungh bingjcinzgoh vujgij、Guengjsae youq Ging dizdangz、cunghyen dafuh Liengz Cunghcangh caeuq Ciuhcingh Dungzci gyazswjgoh gijyinz、gunghbu suijswh yenzvailangz Liengz Cungh- veih song beixnuengx neix. Cawz ranz gaeuq le, ndaw mbanj lij louzce miz miuh gaeuq、aencingj gaeuq、hongh- gai gaeuq, faex geq、sigbeiq gaeuq、gepbaiz gaeuq doenghgij rizgeq miz yiengh dajcaep Lingjnamz Ciuhcingh neix, miz gij dijbauj gohyoz lizsij、vwnzva、yisuz haenx haemq sang. Ndaw saw lizsij geiq miz, Lij Cunghyinz gonqlaeng song baez bae daengz Cwngzvangz capbing, cijveih- bu cungj laeb youq ndaw coengceiz singq Liengz Dasih Cunh. Gij lizsij gyaenanz、rizgeq yaprongh、vwnzva naekcaem neix, hawj Dasih Cunh miz gij swhyenz ndei ra gaeuqgeq cimh goekgaen、yawj gingj okmingz、mbanjbya youqndwi、byaij roen yawj gingj doenghgij neix, baihnaj hwngfat ronghsag.

Dasih Cunh caensaed yawjnaek swnjcienz hoengzyiengz gij dinfwngz cienzdoengj ndawbiengz caeuq yisuz vwnzva maenhndei haenx, lumjbaenz guh daeng’va、bingjlwgraz、gijgwn soemj、bingjaenmak、rinnyawh gya- goeng、foux saeceij、foux geizlaenz、foux lungz、Gienzhungz、Heiqbegvah doenghgij neix cungj lij riuzcienz daengz seizneix, bi 2010 nienz, gojriuz Gamjmboqlungz、gojgaeq Lij Cunghyinz song hangh vwnzyoz ndawbiengz neix caeuq gijgwn soemj、daeng’va、 bingjlwgraz sam hangh dinfwngz cienzdoengj neix ndaej baenz Hinghyez Yen buek daih’it feihyiz baujhoh hanghmoeg. Doengh- bi neix daeuj, ndaw mbanj gonqlaeng laebguh le heiqciengz、ranzsaw、giuzcangz ronghdaeng, laebbaenz le doih foux saeceij、doih Heiqbegvah、doih diuqfoux, roeb ngoenz ciet hung, couh banh gak cungj gak yiengh vwnz dij hozdung, ndaw vwnzva moq cab miz vwnzva cienzdoengj, vunz- mbanj yiengh cingsaenz moqsag, lienzdaemh haujlai bi ndaej bingz guh Swcigih、Yilinz Si caeuq Hinghyez Yen vwnzmingz Cunh.