Mizndang ndwen daih’it,

Meh fatnit fatboengz,

Mbouj sek gwn mbouj roengz,

Gijmaz doeng mbouj ngah.

Mizndang ndwen daihngeih,

Ceiq maij ninz maij manz,

Vunz heuh doeng gik han,

Youq ranz mbouj okrog.

Mizndang ndwen daihsam,

Hozhawq lumj camz coeg,

Lwgrangj hainduj goeg,

Rubmyaiz hoeg beij ngoenz.

Mizndang ndwen daihseiq,

Gwn mbouj feih mbouj van,

Byaij bibuengq canxcanx,

Sim fanz mbouj miz fap.

Mizndang ndwen daihhaj,

Meh naj fonx ga unq,

Baengzyoux cungj daeuj cunz,

Vunzcaen caenhsim goq.

Mizndang ndwen daihroek,

Goekga mbouj miz rengz,

Byaij bingz lumj hwnj geng,

Muengh seng lwg vaiqdi.

Mizndang ndwen daihcaet,

Meh ga ndaetndaeundaeu,

Ngoenz gwn geij liengx haeux,

Lwg ndaw dungx baeuxrwd.

Mizndang ndwen daihbet,

Meh simget dungx gvangj,

Byaij yamq daemq yamq sang,

Gangj byaij ndaej hanh conh.

Mizndang ndwen daihgouj,

Youq ndaw mbouj anfaenh,

Lwg din dik yied haenq,

Meh yied raen vuenyungz.

Mizndang ndwen daihcib,

Meh ronghrib ok da,

Gaenj seng lwg okma,

Angq raen fajnaj lwg.