Miz ngoenz he, bouxvunz coengmingz ndeu bae baiq baed, gouz baed baujyouh aen mbanj de daengx bi 365 ngoenz bouxboux ndang cangq ndok gaenj, mbouj baenz maz bingh.

Baed naeuz:“Gij yauhgiuz mwngz daiq lai lo, ceiq lai ndaej 4 ngoenz ndwi! Mwngz senj 4 ngoenz lawz?” Bouxvunz coengmingz dap naeuz:“Yienghneix gou couh senj ngoenz seizcin、ngoenz seizhah、ngoenz seizcou caeuq ngoenz seizdoeng ba.”

Baed baez dingq, ndawsim ngeix: Gangj dwg 4 ngoenz, gizsaed ciuq coenz vah de hawj de, gaenq dwg daengx bi lo. Baed doq naeuz:“Baezneix mbouj suenq, mbouj ndaej hawj mwngz 4 ngoenz lo, ceiq lai hawj mwngz 3 ngoenz, mwngz senj 3 ngoenz lawz?” Bouxvunz coengmingz mbouj guenj mbouj gip dwk naeuz:“Baenzneix gou couh senj ngoenzlwenz、ngoenzneix caeuq ngoenzcog.”

Baed baez dingq, ndawsim ngeix: Bouxvunz neix caen dwg coengmingz raeuh, siuj ngoenz he, de hix rox aeu ndaej daengx bi. Baed ngauz gyaeuj naeuz:“Baezneix hix mbouj suenq, mbouj ndaej hawj mwngz 3 ngoenz lo, ceiq lai hawj 2 ngoenz, mwngz vaiq senj ba!” Bouxvunz coengmingz riu dwk naeuz:“Yienghneix gou couh senj ngoenzrongh caeuq ngoenz- laep 2 ngoenz neix.”

Baed naeuz:“Baezneix hix mbouj suenq, ceiq lai hawj mwngz ngoenz ndeu!” Bouxvunz coengmingz naeuz:“Baenzneix gou couh senj moix it ngoenz ba!”

Baed raen baenzlawz gangj cungj nanz mbouj ndaej bouxvunz coengmingz neix, ndawsim gaenq amq boiqfug de, caemhcaiq gij vah gangj okbae youh mbouj ndaej myonx, cungj mbouj ndaej gangj ngoenz ndeu hix mbouj hawj de ba? Doeklaeng cijndei dapwngq lo.

Vunzmbanj bouxvunz coengmingz itcig ndangdaej cangqrwd, gaenx guh mbaet yungh, ndwenngoenz gvaq ndaej diemz- swdswd.