Liuz Ma’ngeih daj iq bohmeh couh dai lo, ndaw ranz gungzhoj raixcaix. De maj ndaej youh daemq youh ndaem youh yakyawj, 40 geij bi le lij caengz aeu ndaej yah.

Luz Yenz daj iq couh yawj mbouj hwnj Liuz Ma’ngeih, mboujdanh rox- nyinh de vunz maj ndaej yakyawj, caiqlix lij roxnyinh de huk lai. Daj Luz Yenz roxsoq hwnj, Liuz Ma’ngeih couh mbouj dingz mbouj duenh heuh vunz ra mehyah hawj de, cienz sai bae mbouj noix, mehyah cix gangj mbouj baenz saek dah.

Mbwn yaek loengh vunz, dangh- naeuz gangj Liuz Ma’ngeih dwg aenvih yienghsiengq guhgvaiq caeuq gyaranz gungzhoj aeu mbouj ndaej yah, Luz Yenz couhdwg miz cingz deng fouz cingz sieng, sau lengj mingh yak lai lo. Luz Yenz maj ndaej gyaeundei, caenhguenj yienghneix, de youq gamjcingz fuengmienh cix dwg lumj saejgaeq ngutngut ngeujngeuj nei,mbouj miz baez he swnhleih gvaq. Mwh song vunz cingznaek sim laeg doxgyaez ndaej cingq naemq seiz, mbouj dwg miz gij saeh neix couhdwg gij saeh haenx daeuj nyaux loengh, doeklaeng sanq doeng sanq sae gag vunz gag deuz. Gamjcingz saeteiq hawj Luz Yenz doeknaiq raixcaix, miz seiz de roxnyinh diuz loh seiqvunz dauqcawq dwg hongx.

Liuz Ma’ngeih bingzseiz mbouj- guenj miz saeh fouz saeh cungj gyaez daengz ranz Luz Yenz baenq bae baenq dauq, naeuz de najsaek mbouj ndeiyawj, byom ndaej lumj duzmeuz bingh nei di cingsaenz he hix mbouj miz. Lij naeuz de miz cungj danyw he, danghnaeuz mehmbwk gwn le aen dungx couh soeng lo, gwn maz cungj rangdiemz, vunz couh maj ndaej youh biz youh hau, mehmbwk gungq daengj aek hung cij ndeiyawj.

Moix baez dingqnyi Liuz Ma- ngeih myaiz sinzfoedfoed gangj gij vah neix seiz, Luz Yenz couh hozndat ndaej sing hung hat de. Liuz Ma’ngeih dingq le hix mbouj ndatheiq, lij ciuqyiengh riuhehe dwk, hawj Luz Yenz dawz de mbouj miz saekdi banhfap.

Yienznaeuz bingzseiz Luz Yenz gig haemz Liuz Ma’ngeih, hoeng miz seiz hix lij aeu de daeuj bang. Daxboh Luz Yenz gvaqseiq caeux, ndaw ranz mbouj miz bouxsai, lumj rienghmou vaih roxnaeuz densen goenq gij saeh neix, daxmeh Luz Yenz couh ra Liuz Ma’ngeih daeuj coih. Lumjbaenz hix cij miz Liuz Ma’ngeih cij miz hoengq daeuj bang, ndaw mbanj gij hauxseng nyumx gyaeujnding gyaeujhenj haenx mbouj dwg daengx ngoenz baij daiz ndoet laeuj couhdwg youz gyok guhdoj. Moix baez Liuz Ma’ngeih cungj dwg angqvauvau daeuj bang, yiemq vunz cingzngeih, doeklaeng Liuz Ma’ngeih caiq gangj gij vah- bemx, Luz Yenz couh lumj dingq mbouj nyi nei, mbouj dap hix mbouj han.

Liuz Ma’ngeih bingzseiz cawz le dajleix geij moux reih ranz swhgeij, ndaejhoengq seiz hix bae guh di seng’eiq iq. Lumjbaenz sou huqrwix、saz haeuxyangz caeuq buenq haeux buenq duh daengjdaengj. Luz Yenz gyaez gwn haeuxyangz saz, miz baez he de caeuq Cunhmei bae caeuq Liuz Ma’ngeih cawx haeuxyangz saz, gij feiz ndaw loz ingj faj naj gyaeundei de hoengzmaeq. Liuz Ma’ngeih haenh naeuz:“Luz Yenz, mwngz maj ndaej caen ndeiyawj, danghnaeuz ciuh neix gou aeu ndaej yah lumj mwngz baenzneix couh ndei lo.”

Luz Yenz dingq le cix dauq baeh naeuz:“Mwngz siengj ndaej ndei, mehmbwk doxliz gvaq hix yawj mbouj hwnj mwngz ne!” Luz Yenz ndawsim naemj: Liuz Ma’ngeih mwngz hix mbouj ok nyouh ciuq swhgeij baez ndeu, dahsau lawz yawj hwnj mwngz, gij yienghsiengq mwngz hwk ndaej vunz ngaiz cungj gwn mbouj roengz hoz lo. Yienznaeuz gou caengz haq ndaej ok, hoeng couh suenq caeuq 10 daegsai mbouj baenz hix yawj mbouj hwnj mwngz cungj vunz neix. Hw, caen dwg gungqsou siengj gwn noh hanqmbwn!

Ndwenngoenz lumj raemx lae buetbongh baenaj, Luz Yenz lij caengz miz dieg, baez yaep da couh yaek 30 bi lo lij boux vunz dog ndwi.

Liuz Ma’ngeih caeuq mehyah doxliz daiq miz daeglwg he doxaeu lo. Mehmbwk haenx caeuq Liuz Ma- ngeih doxdoengz, mboujdanh maj ndaej daemq youh yakyawj, caiqlix beizheiq hix gig cuet, song vunz ciengzciengz vih gij saeh saepsoiq doxceng mbouj dingz. Miz baez he, mehmbwk haenx moeb Liuz Ma’ngeih ndaeng ndaem da foeg, ninz youq gwnz mbonq gyangzhwhw. Moix baez doxceng sat, mehmbwk haenx couh buet ma ranzdaiq. Mbouj miz banhfap, Liuz Ma’ngeih cijndei sing’unq bae gouz de dauq ranz. Yawj gij yiengh mehmbwk daekeiq fwgfwg, Luz Yenz roxnyinh Liuz Ma’ngeih dwghaemz youh hojlienz.

Doeklaeng Liuz Ma’ngeih yied nyaenxheiq, mehmbwk haenx yied guh yied haenq, lij luenh son daeglwg de dem. Hainduj lwg haenx yienznaeuz mbouj heuh Liuz Ma’ngeih guh dax- boh, lijdwg gig roxsoq “daxau daxau” heuh dwk, doeklaeng maz cungj mbouj heuh lo. Ceiq hawj vunz simcit dwg mehmbwk haenx yaeuh Liuz Ma- ngeih gai 2 duz cwz hung caeuq 10 duz mou hung sat, dawz cienz cienzbouh oet haeuj daeh swhgeij bae liux, couh fannaj caeuq Liuz Ma- ngeih doxliz, daiq daeglwg deuz lo.

Liuz Ma’ngeih doxliz le, doiq maz cungj roxnyinh doeknaiq, reihnaz mbouj miz sim bae guenj, doeklaeng ndaw reihnaz maj rim hazrum. Hix mbouj miz simcingz bae guh gij seng- eiq iq lo, moix ngoenz ninz daengz daengngoenz dak caekhaex cij gik- gyakgyak hwnqdaeuj.

Liuz Ma’ngeih lij dwg gig gyaez bae ranz Luz Yenz caeuq de gangj goj. Liuz Ma’ngeih baez raen Luz Yenz couh mbe bak riuhehe, mbouj caiq gangj vahbemx gik de. Liuz Ma’ngeih mizeiq depgaenh, Luz Yenz hix dwg maij dam mbouj dam. Liuz Ma’ngeih miz seiz cijndei najnyaenq dwk lizhai. Gvaq le song sam ngoenz de youh daeuj lo, baenzneix fanfoek geij baez, seizgan nanz le, Luz Yenz dauq hix gvenq lo.

（caengz sat）