Bonjbauq siusik (gicej Moz Beibei/莫蓓蓓) 10 nyied 30 daengz 31 hauh, Gaiq Daihseiq Daengx Gih Siujhagseng Gangj Goj Vahcuengh Biucinj Doxdax youq Namzningz gawjhengz, baez hozdung neix youz Swcigih Gyauyuzdingh cawjbanh, 114 boux siujhagseng daj ndaw gih Cuengh Gun song saw vah siujyoz daeuj camgya doxdax.

Aen hozdung neix vih geiqniemh Gozvuyen dinghfat《Fueng’anq Sawcuengh》 60 hopbi, caemhcaiq yienh’ok gaijgwz hailangh yaek ndaej 40 bi daeuj, gij cingzgoj caeuq bienqvaq gvendaengz youq dieg minzcuz Guengjsae gij ginghci hwngfat、seve cinbu caeuq minzcuz doxgiet daengj fuengmienh.

Youq doxdax seizde, doenghboux siujhagseng camgya doxdax aeu Vahcuengh biucinj gig simhoengz dwk gangj gij goj gvendaengz gij bienqvaq youq ndaw ranzcoj caeuq hagdangz, haenh seizdaih moq gij saeh gamjdoengh vunz caeuq gij bienqvaq hungloet, hawj bouxyawj roxnyinh gij dieg Bouxcuengh youq haenx miz vunz moq、saeh moq caeuq bienqvaq moq. Gij goj gyoengq senjsouj gangj ndaej ndeidingq youh mizyinx, caezgya dingq le cungj haenh ndei, bekfwngz mbouj dingz.

Ginggvaq haenqrengz doxdax song ngoenz, bingzveij gungh bingz ok it daengjciengj 10 boux, ngeih daengjciengj 25 boux, sam daengjciengj 40 boux, gujliciengj 38 boux. Lij miz 75 boux lauxsae ndaej “youhsiu cijdauj ciengj”.

Swcigih Gyauyuzdingh Minzcuz Gyauyuzcu cucangj Veiz Lanzmingz doeklaeng cungjgez naeuz, baez doxdax neix miz “sam ndei” caeuq “seiq moq”. “Sam ndei” gij ndei daih’it dwg caepcawq ndaej ndei, bineix buenq bi gonq couh fatok dunghcih, gak yienh guh gij hong neix gig cungfaen, senj ok le boux senjsouj maenh’ak camgya doxdax; gij ndei daihngeih dwg cujci ndaej ndei, hong caepcawq doxdax guh ndaej gig ndei; gij ndei daihsam dwg gyoengq senjsouj gangj ndaej ndei. “Seiq moq” gij moq daih’it dwg gij fajnaj moq, haujlai senjsouj dwg baez daih’it daeuj camgya baez doxdax neix; gij moq daihngeih dwg gij goj moq, gij goj senjsouj gangj neiyungz moqsak; gij moq daihsam dwg miz cinbu moq, gij suijbingz gyoengq senjsouj gaiq neix daengxcungq haemq sang, biujmingz gij cingzgoj coicaenh hong Cuengh Gun song saw vah gyauyuz yienhda; gij moq daihseiq dwg miz maqmuengh moq, bineix dwg Gozvuyen dinghfat《Fueng’anq Sawcuengh》 60 hopbi, daegbied dwg Cibgouj Daih dangj ngamq swnhleih hai sat, youq gizhaidin saekrim maqmuengh moq. Daengx gih gij lauxsae caeuq hagseng daj Cuengh Gun song saw vah yozyau daeuj, yaek haeujlaeg hagsib gij swhsiengj moq、yauhgiuz moq、yinvu moq gvendaengz gij hong gyauyuz youq Cibgouj Daih gwnzde daezok haenx, haenqrengz baenaj, hawj gij cizlieng sonhag gvendaengz Cuengh Gun song saw vah caiq hwnj aen mbaeklae moq.