Mwh ngamq rox Vangz Leiz boux gizcangj Hozciz Si Douzswh Cuzcin Giz neix, gou couh gig boiqfug gij dungxcaiz vahgangj hawj vunz doek- saet de haenx, gij vahdoj vahdeih- fueng, sing baihnamz diuh baihbaek de cungj gangj ndaej cinjdeng cinghseuq, cijaeu de hai bak, coenz vah cungj gangj daengz sim ginz- cung bae. Mboengqgonq, Vangz Leiz baengh gij cihsiz giekdaej Sawcuengh 30 bi gaxgonq hag gvaq aen yozgiz ndeu haenx, gauj gvaq 2017 nienz- doh Gvangjsih Vahcuengh Sawcuengh suijbingz gaujsi (cunggaep). Ndigah, gou gietdingh raizraiz Vangz Leiz, gangjgangj gij giendingh caeuq gij gyaepgouz de doiq vah minzcuz haenx.

Mwh 10 bi ngamq rox Sawcuengh couh miz yinxdaeuz dangqmaz

Vangz Leiz bineix ndaej 40 bi, youq aen mbanjrungh iq Sanh- mwnzhaij Cin Fungsanh Yen Hozciz Si ndeu okseng. Ndwenngoenz lwgnyez hojndoq, hawj de muzlienh baenz gij cingsaenz gaenxguh naihhaemz. Diuzgen ndaw rungh ganhoj, Vangz Leiz youq ndaw mbanj doeg siujyoz. “10 bi bihaenx, gou doeg siujyoz seiq nienzgaep, hagdangz hai dangz Sawcuengh aen yozgiz ndeu, baez daih’it rox Sawcuengh, gou couh raen gyoepdoeg gij yinhbyauh Sawcuengh couh lumj hag gak cungj sing gwnz seiqgyaiq nei, gyoepdoeg gij danswz Sawcuengh couh lumj aeu haujlai cungj sing gyonj youq doxcaez nei gyaeundei.”Vangz Leiz seng okdaeuj couh gig coengmingz, ngamq rox Sawcuengh couh doiq de miz yinx- daeuz dangqmaz.

Hoeng, youq gij sonhag vunqsik aeu gohmuz cujyau guh daeuz haenx, hag Sawcuengh youq ndaw ndwen- ngoenz hagsib Vangz Leiz, couh lumj aen ndaundeiq baez lawq da couh mbouj raen nei, seizgan youh dinj youh mbaqmbingh. Hoeng gij ginglig hag Sawcuengh aen yozgiz ndeu haenx, hawj Vangz Leiz boux hagseng cungj maij hag neix maenhmaenh rox gyoepdoeg yinhbyauh Sawcuengh lo, gijneix vih de ngoenzlaeng gaghag Sawcuengh dwkroengz goekdaej net- saed.

“Camgya guhhong le, miz ngoenz ndeu buenx lwgnyez yawj densi, mwh gou senj densi binzdau, sawqmwh yawjraen Gvangjsih Densidaiz cingq boqcuengq 《Geiq Youz Baihsae》banj Vahcuengh, gij sing boiqyaem gig sugseg, baez dingq couh rox dwg gij sing Cinz Siengzcouh lauxsae, neix youh diemjdawz gij yinxdaeuz gou doiq Sawcuengh lo.” Vangz Leiz naeuz. Doiq de daeuj gangj, hag Sawcuengh mboujdan baengh ceksaw, haujlai cihsiz engq dwg daj ndaw ndwenngoenz daeuj——gij Sawcuengh cawqmingz youq gwnz baizdou ciengz- hab mboujdoengz、byauhyij roxnaeuz ceksaw senhconz haenx, moix baez caeuq Sawcuengh dingjlingz dox- bungz, Vangz Leiz cungj gag youq ndaw sim gyoepdoeg hwnjdaeuj. Gyoepdoeg lai le, gij vwndiz yawjraen haenx hix couh lai lo. Guhhong gangjvei mboujduenh bienqvuenh, Vangz Leiz gaenq miz sim mbouj miz sim bae ceijok caemhcaiq gaijcingq gij loengca mbangj aen danhvei caeuq bouxvunz yungh danswz、biujdap roxnaeuz cawqmingz fuengmienh haenx.

“Hoh daihgya ngoenzciet angq- yangz!”“Dou aeu hag gyoengqde!” “Dieg neix hwngfat ndaej gig ndei!” Moix baez gvaqcieng gvaqciet roxnaeuz okcai youq rog, Vangz Leiz maij youq gwnz veihsin、veihboz bonjfaenh yungh Sawcuengh geiq saeh. Aen veihboz Vangz Leiz yungh mingzcaen daenggeiq gaenq miz 13 fanh boux- maez haenx, “gyoengq bouxmaez” cungj yienq naeuz:“Giekdaej Yinghyij Goleiz ak”“Mwngz dwg gangj vah gijmaz” “Gij Yinghyij mwngz youq gwnz veihboz fat haenx dwg mbouj dwg lwgnyez luenh fat la, gou Yinghyij roekgaep gingqyienz aen danswz ndeu cungj yawj mbouj rox”. Youq mwh bungz daengz gij cingzgvang nanzgvaq gyoengq baengzyoux mbouj rox Sawcuengh, Vangz Leiz engq lai seiz dwg gawq guh bouxfanhoiz Sawcuengh, youh guh bouxsenhconz Sawcuengh, gij vah de cungj hawj gyoengq baengzyoux sim’angq dwk riu okdaeuj. Daengz seizneix, gyoengq baengzyoux veihboz、veihsin de cungj heuh de baenz “beixnuengx”.

Mbouj yawj saw gauj ndaej cekcwngsuh cunggaep suijbingz Vahcuengh Sawcuengh

Gij dungxcaiz vahgangj daj seng okdaeuj couh miz, neix hawj Vangz Leiz gaghag Sawcuengh lumj duzbya ndaw raemx nei. Bi 2016, Vangz Leiz youq mwh yawj vangjyez dingjlingz yawjraen gij gunghgau 2016 nienzdoh Vahcuengh Sawcuengh suijbingz gaujsi, de yawj liux gij daezmoeg binaengz gauj haenx le, raen bonj- faenh cungj rox guh, ndigah, de bae sawqsawq, cigciep bauqgauj gij gaujsi daengjgaep gaugaep (Cawqmingz: Gaujsi baen cogaep、cunggaep、gau- gaep sam aen daengjgaep).

Hoeng, aenvih nanz lai mbouj hag Sawcuengh, caiqlij caengz un gijmaz swhliu caeuq lauxsae son gvaq, haujlai danswz cungj mbouj sug, gyoepdoeg caeuq raiz sai bae dingzlai seizgan, daengx mbaw gaujgenj cij guh liux mbangj daezmoeg cihsiz giekdaej gungh miz 70 faen haenx, daez raiz faenzcieng 30 faen haenx lij caengz ndaej raiz couh aeu gyau gaujgenj lo, hojsik dangqmaz. Doeklaeng gauj ndaej “50 faen”, genjniemh gij giek- daej hagsib Sawcuengh Vangz Leiz 30 bi gaxgonq hag Sawcuengh aen yozgiz ndeu haenx.

Mbouj yawj saw gauj Vahcuengh Sawcuengh suijbingz gaugaep daengj- gaep gaujsi hojsik dauqma, Vangz Leiz mbouj doeknaiq. De nyinhnaeuz danghnaeuz bonjfaenh gyangqdaemq daengz cunggaep camgya gaujsi, itdingh gig yungzheih couh gauj ndaej.

Ndwenngoenz cungj dwg youq mbaqmbingh ndawde gvaqbae. Aenvih guhhong gangjvei bienqdoengh, Vangz Leiz moix ngoenz youq daengx guek gak dieg buet gwnz buet laj nyaengq ciu canghseng’eiq yinx cienzngaenz, youq haemh gaxgonq ngoenz gat- daengz bauqgauj 2017 nienzdoh Vah- cuengh Sawcuengh suijbingz gaujsi, cij mbaqmbaq mbinghmbingh bauq- gauj Vahcuengh Sawcuengh cunggaep gaujsi. Baezneix, goj dwg mbouj yawj saw guh cinjbi couh bae gaujsi, youq ndaw gocwngz gaujsi, de youq giek- daej cihsiz Vahcuengh Sawcuengh、cujswz cauhgawq、yawjdoeg lijgaij、fanhoiz (Cuengh hoiz Gun、Gun hoiz Cuengh) caeuq daez raiz faenzcieng daengj daezhingz guh ndaej gig soengset, guh liux daengx mbaw gaujgenj, liz seiz sou gaujgenj lij miz 50 faencung.

Bi 2017, cingq dwg ciuhvunz seiqcib bi, baezneix, Vangz Leiz dauqdaej aeundaej cekcwngsuh daengjgaep cunggaep suijbingz Vah- cuengh Sawcuengh lo. “Vahcuengh Sawcuengh suijbingz gaujsi doiq gveihfan hwngfat gij vah minzcuz vunznoix、coicaenh swnjcienz vwnzva Bouxcuengh miz gij cozyung gaenx- maenx.” Vangz Leiz naeuz yaek laebdaeb coh “gaugaep” roengzrengz.

“Vahcuengh dwg gij vah ceiq gyaeundei daengx seiqgyaiq”

Vahgangj yozgyah mizmingz Loz Cangzbeiz sienseng naeuz gvaq:“Vah saw dwg gij ceiqndei vwnzva aen minzcuz ndeu. Gij vwnzva doenghbaez aen minzcuz neix baengh de daeuj riuzcienz, gij vwnzva ngoenzlaeng hix gauq de doi baenaj.”

Vangz Leiz daj iq gyaezmaij Vahcuengh, youq mwh mbouj guh- hong, mbouj lumz hag Sawcuengh, doenggvaq vangjloz、yawjdoeg、den- yingj daengj hingzsik, damqcaz gij yinxdaeuz Sawcuengh.

Vah saw minzcuz dwg gij giek- daej vwnzva minzcuz, dwg diuz- saeudongh vwnzva cingsaenz minzcuz, youq ndaw gocwngz minzcuz hwngfat miz gij cozyung youqgaenj dingjlawh mbouj ndaej baujciz simgagsaenq caeuq rengzcomzgiet minzcuz. Vih damqra gij lizsij naekna Sawcuengh, Vangz Leiz cazyawj le haujlai saw gvendaengz Sawcuengh haenx. De yawjraen Bouxcuengh Gvangjsih caeuq Bouxyaej Gveicouh, dingzlai vunz cungj gag heuh Bouxyaej, hoeng Sawgun yaemhoiz gvaqdaeuj cix miz Bouxyaej、Bouxyied、Bouxcung、Boux- nungz、Bouxman doenghgij cengca neix, Vahcuengh caeuq Vahbouxyaej dwg song cungj vah gig depgaenh, daegbied dwg Vahbouxyaej caeuq vahdeihfueng baihbaek Vahcuengh, doxdoengz gig lai. De nyinhnaeuz, aencang swzyij Sawcuengh seizneix miz haenx lij caengz caezcienz, mbangj swzyij ndei caeuq vahsug caengz ndaej gvangqlangh soucomz. Riengz gwnzbiengz hwngfat, aencang swzyij Sawcuengh okyienh gij yienh- siengq mbouj doh yungh, daegbied dwg mbangj swzyij moq, caengz ndaej gibseiz doxwngq fanhoiz bouj hwnj- daeuj, cauxbaenz yungh Sawcuengh seiz okyienh mbangjdi hojnanz.

Miz vunz you lwgnyez hag Sawcuengh le, couh hag mbouj baenz Sawgun. Doiq gij you baenzneix, Vangz Leiz naeuz:“Daj gakdoh yijyenzyoz daeuj yawj, vah cungj miz gij gvilwd doengz caeuq mbouj doengz de, rox gij gvilwd de le, couh guh ndaej gaengawq gij gvilwd neix doi rox gizyawz saehfaed lo. Vah dwg gij hongdawz vunzloih gaeudoeng gamj- cingz, dwg aengiuz cingzngeih. Guek raeuz dwg aen guek minzcuz lai、vah lai、sawloih lai ndeu, vah saw minzcuz vunznoix hoenghvuengh hwngfat caeuq minzcuz vunznoix hag Vahgun doxbang doxbouj, yawjnaek caeuq hag gij vah minzcuz vunznoix mbouj doengz, doiq yinxhaeuj gij leixniemh lai yiengh vwnzva caemh- youq, coicaenh minzcuz mbouj doengz dox rox dox aeueiq mizleih.”

Vangz Leiz nyinhrox daengz, guek raeuz dwg aen guekgya sevei cujyi minzcuz lai ndeu, minzcuz vwndiz dwg gij vwndiz hungnaek gvanhaeh daengz mingh guekgya. De nyinhnaeuz, hag vah minzcuz caeuq baujhoh vahdeihfueng mbouj dwg aeu fungsaek bonjfaenh, vahdeihfueng caeuq Vahbujdungh cungj gangj ndaej ndei cij dwg caen ak. Gangj vahdeihfueng, hag vahdeihfueng, baujhoh vahdeihfueng, dwg gij celouz caeuq ndaejgeiq mbanjranz, doengz- seiz, youq baujhoh caeuq swnjcienz baenzdauq feihvuzciz vwnzva yizcanj daj vahdeihfueng miz okdaeuj haenx, hix miz yiyi caeuq yingjyangj laeggyae.

Bouxraiz yawjraen bitgeiq Vangz Leiz raiz miz duenh vah yienghneix ndeu:“Vahcuengh, dwg mwngz, hawj gou mbouj yungh dajcang, hix miz yinxdaeuz lailai; dwg mwngz, youq ndaw ndwenngoenz hauxseng ceiq gyaeundei gou lumj dujva nei angj- cuengq ronghlwenq, baijok lai saek lai yiengh. Gangj Vahcuengh, gangj Vahcuengh biucinj, baenzneix singj- sien、baenzneix gyaeundei. Vah- cuengh, mwngz lumj raemxmboq, gou gop mwngz haeuj bak; mwngz lumj mehyah, gou got mwngz haeuj rungj. Gou siengj ok rengz gangj, ndiepgyaez Vahcuengh ba, neix dwg gij vah ceiq gyaeundei Bouxcuengh raeuz, neix dwg gij vah ceiq gyaeundei daengx seiqgyaiq!”