Sai:

Ranz beix youq mbanj gwnz

Liz mbwn sam cik haj

Raemxrij heux doeng dah

Doh bya mwncumcum

Mbwk:

Ranz nuengx youq mbanj laj

Bangx dah ndei ndaem naz

Daengz seiz doengh hai va

Cingj daegbeix ma cimz

Sai:

Beix ndaem faex cauh ndoeng

Guh goeng vih laj mbanj

Ciuhvunz lae lwedhanh

Hawj lwglan yiengjfuk

Mbwk:

Nuengx doiq geng boiz ndoeng

Ei cojcoeng gwndaenj

Swnghdai aeu cagaenj

Caez miz faenh gensez

Sai:

Raeuz yawjnaek vanzbauj

Mbouj hawj gauj buqvaih

Aeu mbaet naengz gemj baiz

Laeb swnghdai vwnzmingz

Mbwk:

Byaij gwnz roen biq myaiz

Luenh gveng gaiq nyapnyaj

Miz uq lae roengz dah

Gwn ma bingh haeuj ndang

Sai:

Raemxrij sawdikdik

Dahnuengx lig lumj sien

Mbouj haengj youq gwnz dienh

Nyienh roengz biengz guh bawx

Mbwk:

Gocoengz sang youh soh

Daeggo mbauq youh gvai

Bobaq caez ndaemndai

Maij beixsai vunz gaenx

Sai:

Bya heu dwg byagim

Raemx loeg rim bya’ngaenz

Daihgya caez miz faenh

Doh biengz haenh dieg raeuz

Mbwk:

Bya caeuq raemx doxlienz

Nuengx yien fwngz beix byaij

Song dou sim doxmaij

Byaij haeuj ndwenngoenz ndei

Hab:

Faex mwn bya couh heu

Deih seuq raemx couh loeg

Gim ngaenz baih dou doek

Goek mboq raemx mbouj dingz