Haeujceij dwg gangj naeuz boux vunz raeuz guh vunz aeu gangj daengz guh daengz, gij saeh dapwngq vunz gvaq couh aeu guh ndaej daengz. Bouxvunz danghnaeuz mbouj haeuj- ceij, youq gwnzbiengz couh nanz ndwn ndaej onj, guh maz cungj nanz baenz.

Gaxgonq ranzcoj gou miz boux dajsan lauxbanj ndeu, de heuh gyoengqvunz bang de raed reu, hainduj gangj gij cienz hong dwg moix gep gak ngaenz ndeu. Gvaqlaeng, de raen doengh boux vunz guh hong raed ndaej vaiq, daengz suenq cienz seiz, de couh gemj cienz hong roengzdaeuj, hawj gyoengqvunz moix gep 6 faen ngaenz ndwi. Gyoengqvunz guh hong hix mbouj gangj saek coenz vah, couh mbouj bang de guh hong lo. Gvaq mbouj geij nanz, boux lauxbanj neix couh guh mbouj roengzbae lo. Boux lauxbanj neix baenzlawz rox daengz haeujceij cij dwg gij giekdaej guh seng’eiq ne? Haeujceij dwg gij gaenbonj, mwngz mbouj haeujceij, couh gag vut gij vanj gwn ngaiz swhgeij bae.

Mboujguenj dwg guh seng’eiq roxnaeuz guh vunz, danghnaeuz mbouj haeujceij, ngoenzlaeng couh nanz byaij ndaej bae gizgyae. Haeuj- ceij saekseiz hix hawj vunz sou ndaej gij doxgaiq wnq.

Geiqndaej 2002 nienz 5 nyied, gou caeuq gvan gou guhdoih bae gwnz haw cawx cienmeng. Ngoenzhaenx, yah lauxbanj yaek hwnj gwnz ranz- laeuz bae cawj ngaiz, de couh daengq dou bang de yawj diemq. Yaep he, miz vunz dwk denva daeuj dinghhuq, gou bang de ciep denva, lij aeu bae ndaw daiz aeu bit caeuq ceij daeuj geiq soq. Byawz ngeix daengz, gou haeujbae baez hai aen doengjgvih ra bit caeuq ceij, couh raen dab ngaenz youq ndawde. Gou ra ndaej bit caeuq ceij, geiq ndei gij siusik lo, hix mbouj doengh saek faen ngaenz, ciuqyiengh gven aen doengjgvih, ok daiz bae deq yah lauxbanj.

Dou caj de haujlai nanz, yah lauxbanj cij daj gwnz ranzlaeuz roengzdaeuj. Gou gangj:“Aen doengj- gvih mwngz miz haujlai ngaenz, mwngz geq ndei yo maenh.” De geizheih dwk gangj:“Gizde miz ngaenz? Gou mbouj rox seizlawz vut cienz coq ndaw doengjgvih neix bw! Bingzciengz cienzngaenz cungj cuengq youq aen daeh aemq haenx. Docih sou lo!”

De menhmenh geq ngaenz ndaw doengjgvih, fatyienh miz fanh haj maenz, de yaek aeu cien maenz hawj dou. Gou riuhaha gangj naeuz:“Guh vunz aeu lauxsaed haeujceij, dapwngq mwngz bang mwngz yawj diemq couh aeu dawz ndei. Danghnaeuz dou yaek aeu cienzngaenz mwngz, dou couh laeglemx aeu gij ngaenz neix lij lai. Gij ngaenz neix mwngz yo ndei, sou guh seng’eiq ra ngaenz hix mbouj yungzheih.”

Doeklaeng, dou caiq bae aen diemq de cawx doxgaiq, de cungj aeu dou bonjcienz ndwi, de caeuq dou baenz baengzyoux ndei.