Gaxgonq seiziq, songde cij mbouj gvaq dwg doengzhag caeuq baengz- youx, hoeng seizneix baenz sau baenz mbauq, geij bi doxbuenx, songde cingq doxgyaez lo!

Songde cuhcungh bizyez, cungh- gauj cingzcik mbouj ndei, gauj mbouj hwnj gauhcungh. Vunz ndaw rungh ndaw bya baenzranz caeux, itbuen cib geij bi couh aeu yah roxnaeuz baehaq lo. Raen doengzdoih cungj doxcanj doxaeu, Daegvaenz yienznaeuz hoz- haenz, hoeng mbouj gamj lwnh bohmeh naeuz bonjfaenh siengj aeu sau Bouxgun lajbya guh yah. Daeg- vaenz rox, gangj hix dwg langhdangh, bohmeh de haengjdingh dai cungj mbouj doengzeiq.

Naemj bae naemj dauq, geij ngoenz gvaqbae, Daegvaenz caeuq Dahmeiz gietdingh okrog bae dajgoeng geij bi, caj rom ndaej di ngaenz, haeuxsan cawj baenz ngaiz le, bohmeh aiq couh mbouj fanjdoiq baenzneix haenq lo. Baenzneix siengj le, songde gip buhvaq couh dapci haeuj ndaw singz bae dajgoeng lo.

Youq ndaw singz guh hong dwgrengz raixcaix, songde youh mbouj roxnaj geijlai vunz, song boux vunz youq itheij gag gvaq saedceij bonj- faenh, geij bi gvaqbae hix baenz gvanbaz caen lo. Daengz lwgnyez Daegvaenz caeuq Dahmeiz okseng le, songde siengj seizneix dwg seizhaeuh dauqbae doiq bohmeh gangj lo. Baenzneix, songde youq ndaw singz cawx geij daeh huqlaex, couh daiq lwg baema yawj bohmeh lo.

Ngamq dauqma daengz bak mbanj ranz Daegvaenz, couh miz vunz ndaw mbanj yawjraen Dahmeiz aemq lwg, Daegvaenz gwnz mbaq nenq daeh ndaw fwngz riuj doxgaiq, bouxboux cungj daengx roengzdaeuj dacaengz. Byaij daengz ranz Daegvaenz, aen ranz lij dwg gij yiengh gaeuq gaxgonq, mbouj doxdoengz dwg baihnaj aen ranz ndwn miz haujlai vunz.

Boh Daegvaenz youq cungqgyang ndaw vunz, fwngz gaem dawz diuz faexhanz ndeu, naj laepfwd mbouj miz saekdi biujcingz.

Raen Daegvaenz daengz dangq- naj, boh Daegvaenz caengz caj de gangj coenz vah ndeu, couh aeu faex- hanz moeb gvaqbae. Daegvaenz veq mbouj gib, ngaiz moeb deng cik gen ndeu. Dahmeiz doeksaet dwk hemq hwnjdaeuj, gipmuengz gvaqbae bwenj genbuh Daegvaenz daeuj yawj de deng mbouj deng sieng.

Boh Daegvaenz heiqhwnj fwfw coh Daegvaenz rongx naeuz:“Dangh- naeuz mwngz seizneix sikhaek biek dah neix bae, mwngz couh lij dwg lwg gou, mboujnex couh gaej caiq yamq haeuj aen ranz gou!”

Daegvaenz mbouj ei, lij siengj ngaeq gangj maz dem, boh de cix gag haeuj ranz haep dou hwnjdaeuj.

Daegvaenz Dahmeiz songde youq rog dou ngaeq ndaej geij aen cungdaeuj, boh Daegvaenz lij dwg mbouj leix mbouj langh. Raen lwgsaeq youq laj daengngoenz daejnge’nge, Daegvaenz Dahmeiz sim’in lai. Mwh- neix Daegvaenz lumj daekcoih vunz daengx mbanj nei, cungj mbouj miz saek boux daeuj bang de. Bae daengz ranz Dahmeiz, bohmeh Dahmeiz raen lwgmbwk youq rog gag caeuq vunz ok miz lwg, saiqnaj lairwd, hix haep dou mbouj hawj songde haeuj ranz.

Daegvaenz Dahmeiz cij ndaej bae gwnz haw ra dieg yietnaiq, naemj naeuz ngoenzcog caiq dauqma ngaeq baez moq. Hoeng ngaeq bae ngaeq dauq, boh Daegvaenz cungj mbouj doengzeiq, bae ranz Dahmeiz hix dwg yienghneix. Mbouj miz banhfap, songde cij ndaej aemq lwgsaeq dauq- bae ndaw singz dajgoeng.

Geij bi gvaqbae, daengz songde miz lwg daihngeih, vunz ndawranz lij dwg mbouj hawj songde dauq ranz. Daegvaenz gag gyangznaek guh fwen naeuz:

Doxgyaez mbouj miz loek,

Cix cenx coeg cenx camz,

Vih vunz mbanj vunz bamz,

Luenh gangj sam gangj seiq.

（sat）