Mbanjhwngzsanh dieg youq Swdangz Yangh Linzgvei Gih Gveilinz Si, dwg aenmbanj cienz- doengj Cungguek, dwg mbanjcoj Cinz Hungzmouz bouxhak mizmingz Ciuhcingh neix, ndaw mbanj miz Cinz、Gungh、Liuz、Yangz daengj singq, ndawde singq Cinz ceiq lai. Ngamq haeuj ndaw mbanj, couh raen gwnz benq diegnywj geij moux gvangq ndeu miz song duz saeceij rin sang 1.5 mij baenzneix daengjndwn maenhdwt, vunz ndaw mbanj naeuz, doiq saeceij rin neix nyuenz dwg baij cuengq youq baihnaj bakdou ranz- hung singq Cinz, mwh bingdoih Daibingzdenhgoz hwnj baihbaek gunghoenx Gveilinz gvaq Mbanj- hwngzsanh, diemj feiz dawz ranzhung caeuq laeuzsaw daengj ranz coemh seuqsat, caenh lw doiq saeceij rin neix roengzdaeuj.

Ndaw mbanj gij ranz gaeuq louzce ndaej haemq ndei de dwg coengceiz singq Cinz, youq Ciuh- cingh seiz Gvanghsi caepguh, faen ranzdou、dangqgyang caeuq dangq- laeng sam gyaeg, gak gyaeg cungj miz aen diencingj ndeu. Dangqlaeng gwnz faqciengz doiqdou miz mbaw- siengq Cinz Hungzmouz, gwnz ciengz song mbiengj miz gij gaisau Cinz Hungzmouz caeuq gij bingzgyaq Liuz Yungh daengj vunz raiz haenx. Ndaw coengceiz ceiq dijbauj haenx dwg gep sigbei gaek sei Genzlungz vuengzdaeq raiz soengq Cinz Hungz- mouz haenx, sigbei sang 1.5 mij gvangq 0.6 mij baenzneix, cihsaw lij yienhsag nyinh ok. Seizhaenx Cinz Hungzmouz 61 bi diuh bae dang Gyanghsuh sinzfuj, Genzlungz vuengzdaez soengq soujsei hawj de, doiq de maqmuengh gig naek. Cinz Hungzmouz dwg vunz Hwngzsanh, Ciuhcingh Yunghcwng nienzgan cinsw, dang bucwngsij、sinzfuj、cungjduz、binghbu sangsuh、dungh- gwz dayozsw giem gunghbu sangsuh gvaq, dwg Ciuhcingh seiz Gangh Genz bouxhak seuqcingh ndeu, youh dwg bouxhak lijyoz mizmingz ndeu, ndawbiengz mingzdaeuz ndeiraeuh; seiqvunz de raiz saw 150 lai cungj gyawj 300 fanh lai cih saw, ndawde 《Haj Cungj Gvice》yingjyangj gig hung, dwg sawson Ciuhcingh sevei son’gyauq caeuq lwgnyez son’gyauq. Baihnaj mbiengjswix coengceiz miz aen lijdangz ndaej naengh 500 lai vunz ndeu, dwg mbangj ranz gaeuq “Yungzmwnz Cunghyoz” vih geiq- niemh Cinz Hungzmouz, youq bi 1943 Lij Cunghyinz、Bwz Cungzhij、Vangz Sicuh、Lij Cisinh daengj vunz fathwnj, youq henz mbanj cauxbanh hwnjdaeuj. Mbanjhwngzsanh daih- daih ok vunzcaiz, gyog singq Cinz couh gonqlaeng miz gohgyaz cangh- yienz boux ndeu, cinsw 4 boux, gaijyenz 2 boux, gijyinz 26 boux, gungswngh 9 boux. Baihlaeng lij- dangz miz geij go faexcueng geq gaenq maj baenz bak bi, ngafaex iet raezrangh mbawfaex mwncupcup, cangqcoek sangvid, baenz Mbanj- hwngzsanh aen gingj daegsaek gag miz ndeu, ndawde miz go ndeu naeuz dwg Cinz Hungzmouz doekseng seiz vunz ndaw ranz vih de ndaem, daengz seizneix gaenq 300 lai bi, yiengh gofaex lumj aen liengj hung nei ceiq cangqnoengq, ganjfaex aeu haj boux vunz fwngz daep fwngz cij got ndaej gvaq.

Ndaw Mbanjhwngzsanh lij louz- ce miz mbangj ranz gaeuqgeq, sanq baij youq song henz roen benjrin, byaij haeuj gij honghgai vang’vet camca neix, douringungj、ciengzrin seiz mbouj seiz yap haeuj da daeuj, rizgeq yapyag. Byaij daengz aen- mbanj baihhaenx, lij raen miz aen miuh gaeuqgeq ndeu, laeuzdourin sam mij lai sang daengjdwt yiemzsuk, gwnzde sij miz “Miuhgeq Lungzvaz” seiq cih saw hungloet rengzrwd, lij yienhsagsag yawjraen, baenz gizdieg hekyouz haengj bae yawjngonz ndeu.