Doenggvaq aendou bohliz gvih- saw gyaeundei mbouj coujcaq, ndaej cingcuj yawjraen hangz saw baucang gyaqciq youh miz gij funghgwz Bouxcuengh ndeu caezcingj dwk baiz youq gizhaenx: 《Hoizgej Sawging Ngeihcib Seiq Hauq Goengsae Bouxcuengh》 《Seiq Daihfwencieg Bouxcuengh》 《Ganj Hawfwen》 《Fwenhauqmeh Bouxcuengh》《Vahsug Bouxcuengh Gyoepbaenz·Bien Sang- linz》…… Neix dwg gij cwngzgoj gohyenz bouxsaemjhoiz ngeihgaep Gvanh Swgingh gag bienraiz roxnaeuz youz de cawjbien、caephengz cawj- bien、saemjdingh haenx. Gvanh Swgingh guh gij hong fanhoiz Vahgun Sawgun Vahcuengh Sawcuengh 30 lai bi, gij cucoz de gag saemjdingh caeuq caeuqfaenh fanhoiz、saemjgaij haenx baenz dong. Hoeng gij cingzcik de yungh Sawcuengh gyoepyaem caeuq Sawgun haivat、cingjleix、hoizgej caeuq geiqloeg vwnzva Bouxcuengh haenx, mbouj noix gvaq gij gungyen de youq gij hong bonjcik fuengmienh guh’ok haenx.

Gig maez gig maij Vahcuengh Sawcuengh

Gvanh Swgingh doiq soucomz cingjleix yenzgiu vwnzva Bouxcuengh haeujyinx dangqmaz. Caeux youq 20 sigij 80 nienzdaih, de couh doeng- gvaq bonjfaenh gag roengzrengz, gag- hag Sawcuengh gyoepyaem baenz bouxguhhong fanhoiz Vahgun Sawgun Vahcuengh Sawcuengh ndeu, aen danhvei de guhhong haenx engq hawj vunz hozhaenz: Cungguek Minzcuz Yijvwnz Fanhyiz Giz. De lij gig miz caijsoq baenz boux vunz daih’it youq Yinzminz Daveidangz Baekging guh gij hong doengzsing cienzhoiz Vah- cuengh Sawcuengh, deng vunzlai haenh baenz bouxfanhoiz Vahcuengh Sawcuengh daih’it daj Mbanjcuengh okdaeuj. Moix bi seiz song hoih de cungj caeuq gyoengq doengzsaeh doxcaez vih yinzda daibyauj caeuq cwnghez veijyenz saeqsim guh ndei gij hong fanhoiz. Youq mwh guh fanhoiz, de menhmenh rox gij youqgaenjsingq fanhoiz doxgyau song cungj vwnzva. De nyinhnaeuz: “Fanhoiz, couhdwg song cungj vah guh doxdoeng doxgyau, mboujlwnh dwg Vahgun roxnaeuz Vahcuengh, cungj miz gij vwnzva gvangqlangh naeklaeg, danghnaeuz doenggvaq fanhoiz, ndaej hawj engq lai vunz roxyiuj gij vah song mbiengj, roxyiuj gij vwnzva song mbiengj, neix dwg gienh saeh geijlai miz yiyi ndeu ha!” Doengzseiz de hix yawjraen, seizneix cungj fanhoiz de caeuq doengzsaeh guh haenx, ndaej hawj vunz Bouxcuengh ciepsouh gij vwnzva caeuq saenqsik minzcuz senhcin, hoeng neix dan dwg aeu Gun hoiz- baenz Cuengh, danghnaeuz ndaej guh baenz song mbiengj dox fanhoiz couh engq ndei lo, hix couhdwg aeu Cuengh hoiz baenz Gun dem, hawj vwnzva maenhndei Bouxcuengh byaij coh daengx guek vanzlij byaij hwnj seiq- gyaiq, Sawcuengh gyoepyaem couh- dwg aen caidij gig ndei vwnzva minzcuz, wnggai aeu gij goengnaengz de ndeindei fat okdaeuj. Ndigah, de gietdingh cawzbae gij hong bonjcik, lij haeujlaeg yenzgiu vwnzva Boux- cuengh, comzrengz soucomz cingjleix feihvuzciz vwnzva yizcanj Boux- cuengh, yungh Sawcuengh gyoepyaem cungj hongdawz senhcin neix guh gaiq fwed vwnzva Bouxcuengh, hawj Vah- cuengh Sawcuengh caeuq vwnzva Bouxcuengh doxhab dem ronghlwenq, hawj vwnzva Bouxcuengh youq Cung- guek mbin, mbin coh seiqgyaiq.

Cunz biengz nyaengq caijfungh

Mbouj miz haeux mehmbwk nanz cawj baenz ngaiz. Goekrag vwnzva Bouxcuengh cujyau dwg youq dieg- namh ndawbiengz, mbouj miz faenz- bonj yienhmiz couh bae bonjdieg ra aeu, aeu daeuj gyagoeng leihyungh. Gienh saeh daih’it de aeu guh haenx couhdwg caijfungh, byaijok hawsingz, bae ndawbiengz lajmbanj ra swhliu haidaeuz. Gij vwndiz baij youq dangqnaj de haenx daih’it dwg seiz- gan caeuq cienz. Couhcinj mbouj miz seizgan baenz mboengq hix ndaej leihyungh ngoenzgunghyouh yietnaiq okbae byaijbyaij, mbouj miz cienz couhdwg naeuz aeu gag mbon daeh bonjfaenh lo. Neix doiq gaih- cwngz gunghsinh daeuj gangj, caen dwg aen fudanh mbouj iq. Hoeng de mbaet gwn mbaet yungh genhciz roengzdaeuj lo. Diuzroen caijfungh hojnanz aen dem aen. Vihliux aeu- ndaej swhliu fwngz daih’it, de aeu bae dieg dem dieg, cunz gyoengq cangh- fwen、goengsae ndawbiengz youq gak dieg haenx. Vihneix, de bae Sanglinz Yen haujlai baez, hwnjdou baiqraen Lij Soujhan sienseng boux fwenvuengz Bouxcuengh bi’ndwen ndaej 80 lai bi neix, hawj de son bonjfaenh baenzlawz baen cingcuj gij cungjloih、gezgou、yinhlwd daegdiemj fwen Sanglinz; lai baez bae cunz Ciengj Yenzyungz boux goengsae Bouxcuengh Mbanjmungliuz Dafungh Cin Sanglinz Yen bi’ndwen ndaej 70 lai bi neix, dingq de gejhoiz sawging goengsae; haujlai baez bae ranz Luz Yinghhan boux goengsae Ningzvuj Cin Vujmingz Gih Namz- ningz Si, cingj de gejhoiz fwenhauq ngeihcib seiq Bouxcuengh. Mbangj canghheiq geq aenvih bi’ndwen geq lai, doxgyau haemq hojnanz, hoeng de cungj dwg miz naihsim bae cam. Ceiq hojnanz dwg, mbangj canghheiq geq mingzmingz ndaw ranz yo miz ceksaw fwngzcau Sawndip, hoeng cix mbouj nyienh aeu okdaeuj, mbouj dwg gyoengqde yawj doenghgij huq neix baenz dijbauj louz hawj lwglan, cix dwg gij ceksaw fwngzcau neix dwg gij doxgaiq lw “cainanh cib bi”, daegbied dwg gij hong goengsae guh haenx caeuq “saehfap” “diuq saenzhung” miz gvanhaeh maedcaed dangqmaz, miz mbangj vunz yungzheih aeu de caeuq mehsien goengbaed maezsaenq fangz saenz haenx lienz youq giz ndeu, ginggvaq lai baez foekfan le, canghheiq ndawbiengz lij lau, lau bonjfaenh ngoenzlaeng youh baenz boux deng baedaeuq.

Gaghag rox doeg Sawndip

Youq mwh hoizgej ceksaw fwngzcau, de youh bungz daengz nanzdaez. Cihsaw doenghgij ceksaw fwngzcau neix cungj dwg Sawndip, hoeng mwhhaenx de doiq Sawndip lij mbouj sug. Vihneix, de daj goek hainduj gaghag Sawndip. De ra daeuj《Sawloih Sawndip》baez cih baez cih nyinh doeg、 faenbied gij eiqsei aenswz Sawndip. De lij cam canghheiq ndawbiengz. Lumjbaenz, de cingj goengsae Bouxcuengh Luz Yinghhan sienseng doeg ceksaw fwngzcau Sawndip, bonjfaenh couh caezsing loegyaem ndei. Dauqma ranz le doq yawj ceksaw fwngzcau, doq dingq loegyaem, lienh nanz le cij menhmenh rox Sawndip. Hoeng gij Sawndip ndaw ceksaw fwngzcau canghheiq ndawbiengz haenx mbouj gveihfan, mboujdan dwg aenvih gij vah- deihfueng gak dieg mbouj doxdoengz cij miz cabied, lij aenvih gij vwnzva cingzdoh gak bouxvunz mbouj doengz caeuq mwhhaenx seizbienh geiqloeg hix cauxbaenz gij yienhsiengq cih saw ndeu miz lai cungj hingzsik. Ndigah, de youq mwh cingjleix caeuq fanhoiz aeu fanfoek yenzgiu cij rox ndaej cingcuj gij eiqsei cihsaw, mbangj cihsaw lij aeu dauqbae cam cangh- heiq geq daezhawj ceksaw fwngzcau haenx cij rox. Gij hong neix saepsoiq, hojnanz lai, siengj hix siengj mbouj daengz, hoeng de gamsim gwn haemz gwn hoj, saeqsim yenzgiu.

Saeqsim gejhoiz vwnzva Bouxcuengh

Gij ceiq ndaej genjniemh gij dungxcaiz de dwg gij hong Sawcuengh gyoepyaem doxhoiz caeuq fanhoiz Sawgun. Lauheiq miz vunz nyinh- naeuz, rox Sawndip le, fanhoiz baenz Sawcuengh couhdwg gienh saeh ngaih guh ndeu. Hoeng, saedsaeh mbouj dwg baenzneix ngaih, ceksaw fwngzcau ndawbiengz mbouj dwg vunz dog raiz, youq mwh cienjcau miz cihsaw loeng、aenswz loeng、lamq cau daengj cungj cingzgvang neix cungj mienx mbouj ndaej, caiqgangj suijbingz Vahgun canghheiq ndawbiengz mbouj sang, rox Sawgun mbouj lai, yaem doeg mbouj cinj. Youq mwh yungh Sawndip geiqloeg, ciengzseiz miz gij cingzgvang yungh lawq raiz loeng, cienj raiz、fanhoiz doenghgij cihsaw neix, aeu roengzrengz bae faenbied gij yiengh、gij eiqsei de cij ndaej. Gvanh Swgingh youq mwh hoizgej, bonjfaenh gag cungjgez ok dauq cingjleix fuengfap yungh ndaej baenz ndeu, lumjbaenz de ciuq gij yiengh cihsaw Sawndip, gij gvilwd Fwencuengh dawzyinh、caez- cingj daengj daeuj doiqciuq doeg cihsaw mbouj gingciengz raen caeuq aenswz yiengh mbouj doxdoengz, yenzgiu ok gij eiqsei de. De youq mwh hoizgej sawging goengsae, yiemzgek ciuq aen cunjcwz cungsaed cinjdeng, caenhrengz baujcwng gij neiyungz sawhoiz caezcup, caemhcaiq daej- yienh ok gij goqsingq vwnzva Boux- cuengh. Gvanh Swgingh yungh gij cihsiz caeuq naengzlig de liux, doiq gij Sawndip neix guh ciengzsaeq faenbied caeuq beijdoiq dengloek, engqlij miz mbangj yinhlwd mbouj gveihfan hix bienqbaenz aen bouhfaenh gij hong gyagoeng boujyinh de ndeu.

Gij muzdiz soucomz cingjleix feihvuzciz vwnzva yizcanj Boux- cuengh, it dwg baujlouz caeuq swnj- cienz roengzdaeuj, ngeih dwg coicaenh vwnzva minzcuz doxgyau. Gij diuzgen gietdingh doxgyau vwnzva daih’it dwg aeu hawj bouxdoeg doeg rox faenzbonj gonq, roxyiuj gij neiyungz cozbinj, mboujnex lij dandan dwg youq ndaw aen minzcuz bonjfaenh cienzboq, yaek hawj minzcuz gizyawz hix ndaej yiengjsouh cungj vwnzva neix, lij itdingh aeu fanhoiz baenz Sawgun engqlij cawqmingz gozci yinhbyauh. Gvanh Swgingh youq fuengmienh neix hix ndaej hawj vunz haenh. De yungh cihsaw cinjdeng biujyienh gij ceiqndei vwnzva Bouxcuengh, de doenggvaq Sawndip、gozci yinhbyauh、Sawcuengh gyoepyaem、doiqciuq fanhoiz baenz Sawgun、gaengawq eiqsei hoiz baenz Sawgun daengj lai cungj cihsaw doiqciuq gejhoiz, hawj engq lai vunz cungj ndaej doeg rox gij neihanz vwnzva Bouxcuengh, hawj vwnzva Bouxcuengh ndaej gohyoz swnjcienz caeuq fatyiengz. Gij Sawgun de fanhoiz haenx daj gyaeuj daengz rieng cungj ciuq gij iugouz cinjdeng doengswnh vwnzyaj, suijbingz gig sang. Gij go ndawbiengz Sawgun de fanhoiz haenx cawzbae cihsoq、cezcou caeuq fwen Boux- cuengh doxdoengz le, youq gwnz giekdaej doiq gij neiyungz Sawcuengh cungsaed hix yiemzgek ciuq gij gvilwd dawzyinh gij go Sawgun ndawbiengz guh caezsing fanhoiz. Hawj bouxdoeg ndaej dingq ok gij daegdiemj gij go Sawgun caencingq.

Gvanh Swgingh yienznaeuz gaenq duiyouh, mbouj youq aen gangjvei gaeuq lo, hoeng de lij ndiepgyaez gij saehnieb sawvah minzcuz, lij yungh Sawcuengh gyoepyaem geiqloeg vwnz- va Bouxcuengh, lij yenzgiu、cienzboq vwnzva Bouxcuengh, caemhcaiq sim- angq mbouj raen naetnaiq saekdi dem. Bineix codaeuz de dang boux- veicangj Guengjsae Siujsoq Minzcuz Yijvwnz Yozvei; bi’gvaq doxdaeuj de cujciz cien’gya coihdingh le《Fueng’anq Sawcuengh》(siuhdingh- anq) caeuq mizgven gveihfan diuzlaeh Sawcuengh; de lij caeuqfaenh bien- raiz、saemjdingh gij daezmoeg Vah- cuengh Sawcuengh suijbingz gaujsi caeuq bingz gaij gaujgenj; seizneix de cingq cawjbien、saemjdingh sawgauj《Sawheiqcuengh Conzdungj Cungguek Gyoepbaenz· Gienj Dwzbauj》. Gij gungyen de doiq Vahcuengh Saw- cuengh caeuq feihvuzciz vwnzva yizcanj Bouxcuengh guh’ok haenx lij laebdaeb roengzbae.