Miz duzlingz iq ndeu youq henz cingjraemx guhcaemz. De baez yawj roengz ndaw cingjraemx bae, raen ndawde miz aen ronghndwen ndeu. De coenz vah he hix mbouj gangj couh swenjyauyau hwnjdaeuj:“Cuet lo! Cuet lo! Ronghndwen gaenq doek roengz ndaw cingj bae lo!”

Duzlingz hung youq henz bya dingqnyi le, gipmuengz sam yamq gyoeb guh song yamq buet gvaqdaeuj, iet gyaeuj yawj haeuj ndaw cingj bae, de yawjraen aen ronghndwen youq gwnz raemx lienghlili、nduenndindi, hix sing lauxlaenglaeng hemq hwnj- daeuj:“Caen dahraix! Ronghndwen doek roengz ndaw cingjraemx bae lo!”

Gyoengq duzlingz youq seiqhenz dingq ndaej nyi le, hix gipgip muengzmuengz bin faex gaemh nyengx comz gvaqdaeuj yawj.

Gyoengq duzlingz doengzdoih iet gyaeuj yawj haeuj ndaw cingjraemx bae, gyoengqde ngonz raen aen ronghndwen caen youq gwnz raemx, hix swenjgetget hwnjdaeuj:“Baenzlawz guh? Baenzlawz guh? Ronghndwen doek roengz ndaw cingjraemx bae dahraix lo!”

Gyoengq duzlingz benz hwnj gwnz gofaex henz cingj bae. Duzlingz hung dauqdingq venj youq gwnz gofaex, rag din duzlingz wnq, duzlingz neix hix dauqdingq le rag din duzlingz wnq. Gyoengq duzlingz couh baenz- neix duz rag duz, itcig dauqdingq daengz ndaw cingjraemx bae, duzlingz iq dauqdingq youq ceiq baihlaj.

Duzlingz iq iet song faj fwngz roengz ndaw raemx bae lauz rongh- ndwen, ronghndwen couh sanq deuz mbouj raen le. Duzlingz iq lij siengj caiq lauz baez ndeu.

Duzlingz geq daj gijgyae ganj daeuj, baez yawj couh rox gyoengq duzlingz caen duz rag duz yaek lauz ronghndwen. De baegfofo caemhcaiq riuhehe gangj naeuz:“Mbouj yungh lauz le! Mbouj yungh lauz le! Aen ronghndwen lij venj youq gwnzmbwn ndei baenzmaz bae ne! Gij ‘ronghndwen’ ndaw cingj mbouj dwg caen ronghndwen, cij mbouj gvaq dwg gij ngaeuz ronghndwen ndwi. Caiq- gangj, danghnaeuz ronghndwen caen doekroengz ndaw cingj, gyoengqsou youh baenzlawz youq ndaw haemh yawjraen doxgaiq? Ndigah, baezlaeng miz maz saeh, aeu uk bae ngeix gonq menh guh.”

Gyoengq duzlingz baez ngiengx- gyaeuj yawj hwnj gwnzmbwn bae, raen aen ronghndwen lij venj youq gwnz- mbwn dahraix, caezgya najmong gag riu, duzlingz iq doiq duzlingz geq naeuz:“Daxgoeng, mwngz gangj ndaej deng, baezlaeng gou rox bungz maz saeh ngeix gonq cij guh. Mboujcaiq baenzneix simgaenj lo.”

Duzlingz hung riunyumnyum naeuz:“Gangj dauqdaeuj, couhsuenq aen ‘ronghndwen’ ndaw cingjraemx dou lauz ndaej hwnj, youh baenzlawz venj de dauq hwnj gwnzmbwn ne?”

Gyoengq duzlingz dingqnyi gij vah de cungj angqriu hwnjdaeuj.