Dahmeiz caeuq Daegvaenz caemh aen hagdangz doegsaw. Gangj naeuz dwg aen hagdangz, cix mbouj gvaq dwg aen ranzvax hoengq ndeu. Ndawde hagseng mbouj lai, suenq bae suenq dauq hix mbouj mauh gij nienzgeng aen ranz gaeuq neix. Yienznaeuz gizneix hagseng daj song aen mbanj daeuj, hoeng gyoebsuenq daeuj hix mbouj rim bak vunz, aen ranz gaeuq neix cix miz bak geij bi nanz lo.

Bihaenx guh hagdangz, song aen mbanj neix ranzranz dwg hojndoq raixcaix, cungj youq gij ranz gaeuq- getget vaihvadvad ndwi. Comz ndaej di ngaenz haenx cungj mbouj gaeuq guh aen ranz moq, couh naemj naeuz coih aen ranz gaeuq neix guh hagdangz lo.

Dahmeiz youq aen mbanj Boux- gun lajbya, Daegvaenz youq aen mbanj Myauzcuz gwnzbya. Song aen mbanj haemq doxgyawj, yienznaeuz vunz gak mbanj mbouj caemh aen minzcuz, hoeng gij lwgnyez cix caemh youq doxhuz dangqmaz. Dahmeiz caeuq Daegvaenz couh yienghneix youq aen hagdangz gap baenz baengzyoux ndei lo.

Songde cuengqhag ciengz laeg- lemx doxiu bae laj goleux laeng hagdangz guhcaemz. Dahmeiz eufwen rwenzrwd, Daegvaenz boq venz ndei- dingq raixcaix, song boux de ciengz guh fwen diuqfoux angq dwk lumz doxbiek bae. Seizgan nanz le, gij saeh “mimiz” songde couh deng gyoengq doengzhag rox lo. Gyoengq doengzhag loengh riu songde, naeuz Dahmeiz caeuq Daegvaenz lumj goeng’yah nei. Songde dingq le hix mbouj euq naeuz maz, hoeng song ranz bouxlaux dingqnyi le couh mbouj doengz lo, sikhaek ra lwg bonjfaenh ma cam dwg mbouj dwg doxgyaez lo. Songde cungj bi’gyaeuj laglag naeuz mbouj miz gij saeh neix, dwg bouxwnq luenh gangj luenh vab.

Mboujguenj dwg mbouj dwg doxgyaez, bohmeh Daegvaenz cij rongx naeuz mbouj cinj hawj Daegvaenz bae gyawj Dahmeiz lai, mboujnex couh mbouj hawj de bae doegsaw lo. Bohmeh Dahmeiz hix fok ndaq naeuz mbouj cinj Dahmeiz caiq bae caeuq Daegvaenz guhcaemz, danghnaeuz caiq bae couh moeb ga de raek bae.

Laxlawz gizneix geij bak bi daeuj, cojcoeng Myauzcuz gvidingh lwgmbauq Myauzcuz cij ndaej aeu lwgsau Myauzcuz guh yah, lwgsau Myauzcuz hix cij ndaej haq hawj lwgmbauq Myauzcuz guh maex. Youq mbanj Myauzcuz, bouxlaux mbouj- guenj lwgnyez ra youx caeux roxnaeuz ceiz, hoeng danghnaeuz mwngz ra boux vunz minzcuz wnq couh mbouj baenz. Danghnaeuz miz bouxlawz itdingh siengj caeuq vunz minzcuz wnq doxaeu, gyoengqlaux couh nyinhnaeuz mwngz vaih fungsug、vaih gvi’gawj, yaek gyaep mwngz deuz ok mbanj bae, mbouj hawj mwngz dauq haeuj mbanj yamq he.

Deng bohmeh naeuz gvaq le, Daegvaenz caeuq Dahmeiz cix mbouj dang maz saeh, lumj aen ranzvax hagdangz gvaq bak bi deng fwn soen rumz ci cungj mbouj doemq roengz doxdoengz, songde lij laeglemx guh baengzyoux. Vihliux mienx ndaej caiq deng ndaq, couh mbouj bae eufwen diuqfoux lo. Ngoenznaengz youq hag- dangz lij ciuqgaeuq dwg song boux baengzyoux ndei. Daegvaenz haenh Dahmeiz maj ndaej baenzsau, heuh de guh “Meizdizyaz”——Beixnuengx Myauzcuz baenzneix danq duj va gyaeundei, youq ndawsim Daegvaenz, Dahmeiz couh lumj duj va lengj. Byawz rox, gij gamjcingz songde ngoenz beij ngoenz naekna!

Gvaq mbouj geij nanz, songde couh bae gwnz haw doeg cuhcungh lo. Gij swnghhoz diuzgen baihrog beij ndaw rungh ndaw bya ndei ndaej lai, mbouj rox