Youq hawgeq Yungzcinh, diuz gaigeq baenz cien bi lij louzce ndeindiq, gorungz geq mwncup baenz gyoengq doxgot daengjndwn, aendaemz lumj ndaundeiq deihdaenx baijbouh, gaigeq、gorungz geq caeuq aendaemz saw lumj naedcaw haenx doxdaengh doxdak, “aen sok song dah sam hwnjhamq, cib rungz bet gveiq gouj sueng daemz”, gyoebbaenz le yiengh gingj ndei daegbieg hawgeq Lingjnamz, hawgeq baenzneix ndaej heuhguh “Yungzcinh” aen cohmbanj ndeidingq neix.

Hawgeq Yungzcinh dieg youq Yungzcinh Cunh Canghgyah Cin Bingzloz Yen gih raeuz, liz gyanghaw Gveilinz miz goujcib lai goengleix gyae, hawgeq youq Ciuhsung codaeuz couh hainduj laebguh, daengz seizneix gaenq miz gyawj cien bi lizsij. Hawgeq dieg youq giz gapgyoeb Dahyungzcinh caeuq Dahsahgyangh song diuz dahnga Dahlizgyangh neix, ciuhgeq dwg aen sokruz dajdaeh iq nauhyied dahdieghawq baihdoeng Guengjsae ndeu, dap ruz yiengq baihbaek ndaej bae daengz Gveilinz, yiengq baihnamz baihdoeng ndaej bae daengz Vuzcouh、Gvangjcouh.

Yungzcinh yinzvwnz lijyouz swhyenz dwg comz youq diuzgai hawgeq raez miz song bak mij、gvangq miz haj mij, guh ndaej gyawj cien bi, louzce ndaej haemq caezcingj, daiq miz gij cingzdiuh mbanj baihnamz Cungguek — Gaiyungzcinh neix. Gij ranz gaeuq song henz gaigeq cungj dwg aenranz cienheu vaxmong daepfaex song caengz, doxdep hwnjguh, gvangqgaeb sangdaemq ca mbouj geijlai dox- doengz, dingjranz doxlienz, caezcingj miz gvilwd, yienjok gij yiengh gaeuqgeq daegbied ranzcaep mbanj haw baihnamz guek raeuz; baihnaj gij ranz henz gai cungj dwg daj ciengzcien yupsuk haeuj ndaw baenz mij lai gvangq, daepgaq faqdou benjfaex sang raez doxdoengz, dangguh aenbouq yungh, lij ndaej yawjraen gij rizgaeuq yiengh gingj guh seng’eiq hoenghhwd ciuhgonq, roen benjrinbya、aenbouq ciengz cienheu vaxmong、Yezdungh Vei- gvanj、Gungsamsaenz、Gungsiencuk- aeuj、dougungj cienrinbya, caiqlij doenghgij ranz gaeuq vunzseng’eiq Liu Bingjgunh、Liu Cingoz nem gij gorungz geq cien bi maj ndaej mwncupcup sang daemxmbwn、rag- faex buenzhop doxheux ndeiyawj ndaw mbanj louzce ndeindiq gyoeb- baenz gingj gaeuqgeq yinx vunz. Doengzseiz, geij aen daemz hung henz Gaiyungzcinh riengz diuzgai baizlied baenz cungj gyoebhab daemzraemx ndaej yinx vunz yawj- ngonz ndeu, lij miz Dahyungzcinh、Dahsahgyangh riengz henz mbanj menhmenh lae gvaqbae, baenz caz baenz caz faexcuk riengfungh heu- sausau daengj youq henz dah caiqlij dauqdingq ingj youq ndaw dah, ndeiyawj dangqmaz, caiq gyahwnj gij naz seiqhenz mbanj dem, hawj rangh lijyouz Yungzcinh couh lumj fuk dozveh gingj gyaeu doenghnaz Gyanghnanz nei yinx vunz.

“Raemx sawyau heux mbanj, byaheu angj doenghnaz.” Gak cungj gak yiengh vwnzva baihrog doxcomz、oenqnyumx, hawj Yungzcinh baenz le diegfathwnj Heiqgvei ndeu, daengz seizneix vunz Yungzcinh lij miz gij fungsug sibgvenq gyaez dingq heiq、ciengq heiq haenx, aen daizheiq gaeuq laj gorungzgeq baihrog mbanj lij louzce roengzdaeuj haenx, “aenlaz daih’it Guengjsae” ndaw gaigeq louzyo haenx, hawj vunz yawj ndaej ok gij boekbienq lizsij caeuq vwnzva gyaenanz Yungzcinh.