De gonqlaeng dang donzcangj vwnzgunghdonz、gizcangj gyauyuzgiz、gizcangj vwnzvagiz、yaucangj minzcuz cunghyoz gvaq; de dwg bouxveiyenz Cungguek Minzcuz Yisuzgyah Yozvei, Guekgya Minzcuz Yisuzgyah Yozvei soengq hawj de aen cwngheuh minzcuz yisuzgyah maenh’ak, Aen Hezvei Fwen Guengjsae soengq hawj de aen cwngheuh fwenvuengz ndaw- biengz; de gonqlaeng okbanj cucoz hungmbwk Bouxcuengh《Seiq Daih Fwencieg Bouxcuengh》daengj cibgeij cek conhcu yozsuz gyaciz gig sang raiz vwnzva Bouxcuengh haenx, cozbinj lai dangqmaz, youq aen lingjyiz yenzgiu vwnzva vwnzyoz Bouxcuengh miz mingzdaeuz gig hung.

De couhdwg Sanglinz Yen Gyau- yuzgiz boux nyuenz gizcangj Lij Soujhan, vunzgeq bi’ndwen ndaej 84 bi, guh hong vwnzva saehnieb、daengx ciuhvunz gvansim saehnieb Saw- cuengh, duiyouh gvaqlaeng 20 bi lij youq aen lingjyiz vwnzva Bouxcuengh haenqrengz buekguh, daengz seizneix vunzlai lij haengj heuh de guh Lij gizcangj.

Giet yienz Sawcuengh, youq bi 1958 baez raen couh maij

Lij Soujhan daj seng okdaeuj couh gig gyaezmaij vwnzva Boux- cuengh, cijaeu gangj daengz Bouxcuengh、Sawcuengh、Fwen- cuengh、Heiqcuengh daengj doenghgij saehcingz caeuq vwnzva Bouxcuengh mizgven neix, de cungj haeujyinx dangqmaz, caemhcaiq seizbienh couh gangj ndaej ok haujlai gojgaeq mizyinx caeuq de doxgven haenx.

Doiq gij goekgaen caeuq gij hwngfat Sawcuengh, Lij Soujhan couh lumj suenq gij bauj ndawranz bonjfaenh nei. De naeuz, bi 1957 ndwen 11 Gozvuyen cingqsik baecinj《Fueng’anq Sawcuengh》, youq dieg Bouxcuengh hainduj doihengz yungh, seizhaenx vunzlai aeu hag Sawcuengh dangguh aen cwngci yinvu ndeu, hag Sawcuengh yungh Sawcuengh youq mwhhaenx caen dwg hoenghhwdhwd, Guengjsae gak dieg caezgya hainduj laebguh hagdangz Sawcuengh, aeu daeuj son’gyauq ganbu Sawcuengh caeuq lauxsae Sawcuengh.

Bi 1958, Lij Soujhan lij dwg Sanglinz Yen boux yaucangj siujyoz ndeu, mwh de rox aen siusik neix le couh bauqmingz bae hag, aenvih bonjfaenh dwg vunz Bouxcuengh, vahcoj couhdwg Vahcuengh, ndigah hag geij ngoenz couh hag rox Sawcuengh lo. Hoeng, ndwenngoenz ndei gvaq ndaej gig vaiq, “Vwnzva Da Gwzming” hainduj le, gij hong doihengz Sawcuengh couh deng bik daengx roengzdaeuj lo.

Mbaq rap song faenh hong, cujyin minzyijban caeuq yau- cangj hagdangz Sawcuengh

Daj bi 1980 dauqfuk Swcigih Minzyijveij le, gak dieg、si、yienh hix laebdaeb dauqfuk aen gihgou guh hong Vahcuengh Sawcuengh. Mwh- haenx, Lij Soujhan youq Sanglinz Yen Gyauyuzgiz dang gizcangj. Bi 1986, Minzyijban Sanglinz Yen laebbaenz, Lij Soujhan aenvih naengzlig ak ndaej dang boux cujyin de.

Aen yinvu daih’it minzyijban laebbaenz le dwg laebguh hagdangz Sawcuengh, caenhliengh vaiq son- gyauq ok lauxsae Sawcuengh habgek, riengzlaeng aeu Sawcuengh doigvangq daengz siujyoz. Guh boux yaucangj hagdangz Sawcuengh iugouz gig sang, daih’it aeu rox Sawcuengh, daihngeih aeu rox sonhag, daihsam aeu dang lingjdauj gyauyuz bouhmonz gvaq. Ra doh daengx aen yienh Sanglinz, cij miz boux dog habgek, youh dwg Lij Soujhan! Mbaq rap song faenh hong, dan lingx faenh cienzhong ndeu, youq mwh giepnoix vunzcaiz、youq laj maqmuengh lingjdauj ndaw yienh, Lij Soujhan hix ciep gvaq dang yaucangj faenh hong neix lo! Cwng dieg、 hwnq hagdangz、ciu ra vunzcaiz, Hagdangz Sawcuengh Sanglinz Yen ciuq seiz ciuq caetliengh guh hwnjdaeuj lo, Lij Soujhan buet hwnj buet roengz、hwnz ngoenz mbouj yiet, son’gyauq ok baenz buek baenz buek hagseng maenhndei, vih haujlai aen siujyoz dieg sawq son Sawcuengh haenx soengqbae lauxsae Sawcuengh hab- gek.

Gangj saedsaeh, daezok gij vunqsik sonhag “aeu Cuengh coi Gun”

Minzyijban Sanglinz Yen laeb- baenz caeuq Hagdangz Sawcuengh Sanglinz Yen hainduj miz cujciz hai guh le, gij hong doigvangq Sawcuengh Sanglinz Yen aeundaej hwngfat gig vaiq, hag Sawcuengh hix hainduj haeujdaengz siujyoz gyauyuz.

Hoeng, mwh youq ndaw siujyoz guh sawq son sawq doigvangq Sawcuengh, haujlai bohranz couh mbouj haengj hawj lwgnyez bonjfaenh hag Sawcuengh, gyoengqde nyinh- naeuz hag Sawcuengh mbouj miz yungh, engqlij miz vunz goenghai fanjdui, naeuz hag Sawcuengh dwg cungj doiqdauq ndeu; miz mbangj bohranz nyinhnaeuz, hag rox Saw- cuengh lij aeu hag rox Sawgun dem, mboujnex daengzcog mboujlwnh siengj guh gijmaz byaij saek yamq cungj hoj, mboujyawx cigsoh hag Sawgun, hag Sawcuengh dwg sai seizgan daengxndwi.

Lij Soujhan dang lauxsae gvaq, dang gizcangj gyauyuzgiz gvaq, youq gyauyuz fuengmienh de dwg boux cien’gya caixhangz ndeu, mwh de haeujlaeg saedcaeq bae roxyiuj gij you gyoengq bohranz le, mbouj lawq saekdi dwk daezok sawq bae “aeu Cuengh coi Gun”. “Aeu Cuengh coi Gun” couhdwg, hawj hagseng iq Bouxcuengh daj it nienzgaep hainduj hag Sawcuengh caeuq Sawgun, yungh duenh seizgan ndeu bae hag Sawcuengh gonq, caj gyoengqde rox gyoep、rox doeg、rox raiz Sawcuengh le, couh hainduj bae hag Sawgun.

Daj guh gvaq cwngmingz, Lij Soujhan sawq “aeu Cuengh coi Gun” sonhag caen deng, miz gij giekdaej hag Sawcuengh le, gyoengq hagseng hag Sawgun hag ndaej haemq vaiq, gij suijbingz Vahgun hagseng ndaw aenban siujyoz sawq sonhag Saw- cuengh haenx caeuq aenban Sawgun nienzgaep doxdoengz haenx doxbeij gij cingzcik de miz ndei gvaq mbouj miz yaez gvaq. Vihneix, “aeu Cuengh coi Gun” daj sawq son swngsang baenz gij vunqsik baenzgoeng, caemhcaiq gig vaiq couh youq daengx gih gak dieg doigvangq hwnjdaeuj.

Dinfwngz aeu cing, haenq- rengz doi vunzcaiz Sawcuengh cienmonz guh hong ciennieb

Youq mwh gij vunqsik “aeu Cuengh coi Gun” hoenghhwd haiguh hwnjdaeuj, gij vwndiz moq okdaeuj lo. Doigvangq Sawcuengh dwg minzyijban guenj, hoeng, siujyoz gyauyuz cix dwg gyauyuz bouhmonz guenj, minzyijban caeuq gyauyuz bouhmonz gag guh gij hong bonjfaenh, ciengzseiz dwg, minzyijban siengj aeu lauxsae maenh- ndei yungh youq gwnz gij hong sonhag Sawcuengh, hoeng, gyauyuzgiz cungj mbouj haengj cuengq vunz, doeklaeng dauqfanj cungjdwg lauxsae gig bingz- ciengz bae son Sawcuengh.

Aenvih lauxsae mbouj maenh- ak、engqlij miz mbangj lauxsae mbouj habgek, caenhguenj gij vunqsik sonhag Sawcuengh “aeu Cuengh coi Gun” gig ndei, gij caetliengh sonhag ndaw aenban siujyoz sawq son Sawcuengh doeklaeng lijdwg okyienh gij cingzgvang sang daemq mbouj caez, aenban song vahsaw lawz lauxsae maenhndei bae son cingzcik couh ndei, aenban song vah saw lauxsae bingzciengz bae son haenx cingzcik couh miz di ca.

Lij Soujhan rox, yaek gaijbienq cungj cingzgvang neix, aen banhfap dog couhdwg aeu gij hong Sawcuengh haeuj hagdangz gyau hawj gyauyuz bouhmonz guenjleix. Lij Soujhan ndawsim rox, neix dwg diuz roen hoj gvaq hwnj mbwn ndeu, gij saeh neix gaenq mbouj dwg de guenj ndaej daengz lo. Hoeng, vihliux saehnieb Sawcuengh, de roengz gietsim aeu byaij daengz daej. Vihneix, de lai baez baedauq Namzningz caeuq Sanglinz, ra Swcigih Minzyijveij、ra lingjdauj, engqlij ra daengz Swcigih Cwngfuj Cangh Swnghcin boux fucujsiz baenguenj Sawcuengh neix, aeu saedsaeh gangjvah, aeu anqlaeh gangjvah, aeu gij cingzgvang baihlaj baenz diuz baenz diuz bauqlwnh hawj lingjdauj bouhmonz gaep baih- gwnz.

Bi 1988, Hagdangz Sawcuengh Sanglinz gaij baenz Minzcuz Cungh- yoz, caemhcaiq gyau hawj gyauyuz bouhmonz cawjguenj, Lij Soujhan hix daj yaucangj Hagdangz Sawcuengh bienqbaenz yaucangj Sanglinz Minz- cuz Cunghyoz, mwhhaenx, de gaenq ca mbouj geijlai couh daengz bi’ndwen duiyouh lo. Minzcuz Cunghyoz gyau hawj gyauyuz bouhmonz guenjleix le, naengzlig lauxsae ndaej gyaak haujlai, sonhag Cuengh Gun hix ndaejdaengz doengzbouh hwngfat. Siujyoz Saw- cuengh gyauyuz hwngfat hix caeuq neix doxlumj.

Goengfou mbouj nguh boux miz sim. Doeklaeng gaep baihgwnz giet- dingh, daj bi 1990 ndwen 6 hainduj, gij hong Sawcuengh haeuj hagdangz cienj gyau hawj gyauyuz hingzcwng bouhmonz guenjleix, youq gwnz diuz- roen doigvangq Sawcuengh, Lij Souj- han ndaej raiz roengz bit naeknaek ndeu.

Cucoz daihbaj, duiyouh 20 bi gonjbit ndaw fwngz caengz daengx gvaq

Gij ginglig guhhong Lij Soujhan gig genjdanh: Lij Soujhan, sai, Bouxcuengh, bi 1933 okseng, bi 1953 swhfan bizyez camgya guhhong, bi 1994 duiyouh. Dang gvaq donzcangj vwnzgunghdonz、gizcangj gyauyuzgiz、gizcangj vwnzvagiz、cujyin minzyijban、yaucangj hagdangz Sawcuengh、yau- cangj minzcuz cunghyoz Sanglinz Yen daengj.

Duiyouh le, gij gungyen de vih vwnzva Bouxcuengh guh’ok haenx cix lai dangqmaz.

De gonqlaeng youq gwnz《Guengjsae Yizbau》《Sam Nyied Sam》《Guengjsae Minzcuz Bau》daengj doenghgij bauqceij ganhvuz neix fatbiuj gvaq ca mbouj geijlai 100 hot fwen Bouxcuengh.

《Ginghci Lajmbanj Haeuj Hawciengz》 hot fwen bi 1993 raiz neix, aeundaej ciengjfatbiuj ciet fwen Guengjsae gaiq daih’it.

《Go Ndaem Oij Nuengx Ndaem Naz》 hot fwen Vahcuengh bi 2006 bien raiz neix camgya Namzningz Si fwen yenzswnghdai doxdax aeundaej it daengjciengj.

De gonqlaeng okbanj cibgeij cek conhcu raiz vwnzva Bouxcuengh, ndawde bouhsaw 《Seiq Daih Fwen- cieg Bouxcuengh》 bi 2015 youz Guengjsae Minzcuz Cuzbanjse okbanj neix, dwg bouh conhcu vwnzva Bouxcuengh yozsuz gyaciz gig sang ndeu.《Seiq Daih Fwencieg Boux- cuengh (Hoizgej)》souloeg miz《Fwen Lwgswnh》《Fwen Daegbeix》《Fwen Daeggyap》《Fwen Mehyou》daengj seiq aen heiqbeihgi ginghdenj Bouxcuengh, yungh gij hingzsik fwen Bouxcuengh yienjciengq geiqloeg.

Itcig daengz bi 2016, de lij cawjbien le《Saw Comz Fwen Yenz- swnghdai Sanglinz Fwenyoux Sang- linz》, gangj ndaej hwnj cucoz lai baenz dong, youq aen lingjyiz yenzgiu vwnzva vwnzyoz Bouxcuengh miz mingzdaeuz gig hung.