Ndaej saw Sawcuengh ma

Lumj bya faengz raemx moq

Gou cug ranz cug hoh

Bae gangjgoj damz sim

Dwen gaijgwz hailangh

Angq gangj hag Sawcuengh

Vih vunzmbanj beixnuengx

Yungh Sawcuengh saujmangz

Gyoengq beixnuengx gig maez

Caezgya daeuj bauqmingz

86 nienz cingmingz

Gou cingqsik haiban

Vunz yied daeuj yied lai

Mbouj miz daiz miz daengq

Ranz gaeb fouz dieg naengh

Doxcaenx doxbaengx daeuj

Mbouj dwg boq daihvah

Yah gou caen dwg ndei

Bak rwix sim goj gyaez

Bang gou caez ok geiq

Heuh gou ninz ranzmou

De bau souj ranzvaiz

Gyoengq lwgbawx lan gvai

Ninz baihswix ranzsaeq

Doenq ok song gan rug

Daeuj dang guh gyausiz

Dawz gij benj doq mih

Guh daiz iq daengq iq

Ban dou couh yienghneix

Ndaej swnhleih hwnjdangz

Mbouj lumz yah gou bang

Ndang raeuj ndawsim diemz

Ranz miz noh dem noh

Dujva ndoq youh hai

Ban vunz lai dem lai

Vunz baihrog youh daeuj

Faen 3 geiz 3 ban

Hanh 3 haemh doxlwnz

It ndwen 10 haemh dwnx

40 vunz hwnjroengz

Minzyijban damq rox

It loh roengzdaeuj caz

Caen saedsaeh mbouj gyaj

Baihlaj gag hai ban

Cihciz gujli dou

Soengq saw mbouj aeu ngaenz

Daeuj niemhsou mwhhaenx

Bingzyaenz 80 faen

Ndawsim gou haengjheiq

Caiq siengj han geij geiz

Byawz rox mingh mbouj ndei

Ndang ndaej bingh laemx roengz

Geijcib bi gvaqdaeuj

Mbouj aeu beg sai rengz

Gyoengq yozyenz doxceng

Lenghlengh yunghsim hag

Gonq mbouj rox sij saenq

Seizneix gaenq mbouj you

Geiq vah raeuz souyouz

Mbouj caiq gouz bouxwnq

Yawj saw menh ndaej rox

Gohyoz ciengx ndaem gaenq

Mbouj caiq bae maezsaenq

Neix gaenx guh fatcaiz

Daegbied song hauxseng

Roengzrengz ceng hag ndei

Baengh Sawcuengh gauj ndaej

Ndaej bae doeg cunghconh

Daengz bizyez dauqma

Ndaej camgya gunghcoz

Caez caemh byaij diuz loh

Guen sang mbouj doxdoengz

Seizneix gou gaenq laux

Byoemgyaeuj hau mumh roz

Naj nyaeuq da hix myox

Gag rox ngeix ndawsim

Geijcib bi gumzgamx

Amq fangzhwnz Sawcuengh

Geijcib bi maqmuengh

Ndaej nduen vuengz fangzhwnz

（sat）