Cib nyied vagut hai

Dujduj gvai youh angj

Cunghgoz Gungcanjdangj

Angq hai Cibgouj Daih

Baekging cang ndaej gyaeu

Soujduh raeuz nauhyied

Ndwen neix caen daegbied

Yied daeuj yied angqfaengz

Daibyauj comz haihoih

Gyoengqdoih lwnh saehcingz

Ei Cunghgoz guekcingz

Dingh lusen fuengcim

Cibgouj Daih baugau

Neiyungz sau youh naek

Faensik naeuz ndaej laeg

Miz daegsaek gangj coenz

Cibbet Daih doxma

Guekgya fazcanj vaiq

Gaijgwz yamq ndaej daih

Caez byaij hwnj mbaek sang

Cunghyangh veh lamzdoz

Raeuz ei soh baenaj

Rap naek dawz gwnz mbaq

Byaij gvaq loh fukhwng

Ceih guek sien ceih dangj

Gangj daeuj couhdwg yiemz

Gvej haeux yungh fagliemz

Diem ma mbouj miz rangh

Fanjfuj youq gwnz loh

Wnggai mbouj rox dingz

Giemq gat mbouj nyaenx cingz

Boux famh dingh ngaiz faeg

Laeb fazci guekgya

Banhsaeh aeu fap ei

Bouxboux gangj dauhleix

Sevei engq vwnzmingz

Gij “it sai it loh”

Gak guek coh camgya

Caemhcaez okrengz ma

Daihgya cungj ndaej leih

Gungcanjdangj laeb daeuj

Cungj vih raeuz yinx roen

Ronghsag lumj daengngoenz

Coenzvah danq mbouj caenh

Cibgouj Daih ciuhai

Byai faex langh va moq

Caemhcaez daeuj goenghoh

Cunghgoz angjda doh