Gij lingz denva yiengj lo. Duz- lingz canghyw dawz vahdoengz hwnj- daeuj cam naeuz:“Vei, gou dwg duz- lingz canghyw! Miz maz saeh?”

Mou daxmeh simgip dwk naeuz:“Gou dwg mou daxmeh laj Byacingh- yinz, lwg gou bingh la, cingj mwngz sikhaek daeuj yawj ndei lwi?”

Duzlingz canghyw naeuz:“Ndei, gou doq daeuj!”Duzlingz aemq aen sieng’yw, gipgip muengzmuengz ok dou lo.

Byaij ndaej yaep ndeu, duzlingz daeuj daengz bak loh sam nga henz mbanj, mbouj rox loh lo. De doeng yawj sae yawj, sawqmwh yawjraen song duz gaeqloegva cingq guhcaemz. Duzlingz fatyienh: Duzgaeq baihnaj noh aekdin, youh na youh genq; lingh duzgaeq noh gwnz aekdin cix youh byom youh unq. W, duzgaeq baihnaj nienzgeij geq. Cam loh yaek cam nienzgeij geq, nienzgeij geq rox saeh lai. Yienghneix, de couh doiq duzgaeq nienzgeij geq naeuz:“Gaeq mehsimj, gou cam mwngz, bae Byacinghyinz byaij diuz loh lawz?”

Gaeq hanq naeuz:“Go go go, itcig coh baihnaj byaij couh deng lo.”

Duzlingz docih le, ciuq dwk gij fuengyiengq gaeq mehsimj naeuz coh naj byaij bae.

Ngamq haeuj mbanj, bak loh miz song duz vaiz cingq doxceng, loh deng laengz lo. Duzlingz hwnjbae cam naeuz:“Vaiz daeggo, cingj nyiengh baez ndeu, gou yaek bae ranz mou daxmeh hawj lwg de yawjbingh ne!”

Ndawde duz vaiz ndeu sing hung hemq dwk:“Mbouj nyiengh, mbouj nyiengh! Danghnaeuz mwngz gangj gawq vah goengbingz, dou song boux byawz dwg daeggo, gangj deng le, gou mboujdan nyiengh loh, lij soengq mwngz bae!”

Duzlingz gienq naeuz:“O, couh vih neix doxceng na! Gaej ceng lo, sou hai bak hawj gou yawj baez ndeu!” Song duz vaiz aj bak. Duzlingz sijsaeq baez yawj, doiq duz vaiz depgaenh ndang de naeuz:“Mwngz cij ndaej 8 bi, dwg daegnuengx; de ndaej 10 bi lo, dwg daeggo!”

Vaiz daegnuengx mbouj fug, hemq hwnjdaeuj:“Mwngz baenzlawz rox?”

Duzlingz gej naeuz:“Song diuz heuj mwngz lij caengz maj caez. Mwngz yawj, gij heuj vaiz daeggo mboujdan maj caez lo, caemhcaiq heujnaj lij miz diemj raiz baenz gien baenz gien ne!”

Vaiz daegnuengx mbouj miz vah gangj lo, cijndei daiq duzlingz haeuj mbanj.

Mou daxmeh raen duzlingz canghyw daeuj lo, gig angq. Hoeng de siengj sawqsawq gij bonjsaeh duzlingz canghyw, de mbouj gangj song daeglwg lwg lawz miz bingh, hawj duzlingz canghyw swhgeij bae caz bingh.

Duzlingz canghyw sijsaeq caz- yawj song duz moulwg maj ndaej hung iq doxdoengz, yawj bae yawj dauq, mbouj yaep he couh ra ok duz moulwg miz bingh haenx.

Mou daxmeh gig geizheih dwk cam:“Duzlingz canghyw, mwngz baenz- lawz rox de miz bingh ne?” Duzlingz naeuz:“Mwngz yawj, daeglwg neix, bwnda miz haj faen raez, duz haenx bwnda cij miz sam faen raez. Bwnda raez, itdingh dwg sien seng, hoeng aen ndang de cix caeuq duz seng doeklaeng doxdoengz, neix mbouj dwg gangj, duz seng gonq miz bingh, maj mbouj hung lwi?”

Mou daxmeh lienzlienz ngaek- gyaeuj, haenh naeuz:“Deng! Deng! Mwngz caen miz bonjsaeh.”