Aen siujyoz hagdangz Mbanj- gengroed hwnj youq gyang doengh, hagdangz seiqhenz cungj dwg naz.

Ga roen ndeu vang gvaq doiqnaj hagdangz, gyaeuj he bae baihrog, gyaeuj he bae ndaw bya.

Ngoenz ndeu haetromh, gyoengq hagseng haeuj hagdangz bae doegsaw le, Vangz lauxsae boux dog youq gwnz cauhcangz byaij bae byaij dauq naemj saehcingz, bouxsai 40 bi baedauq ndeu daj diuz roen bae baihrog byaij daeuj.

Gyang hwet bouxsai raek miz fag cax ndeu, de daeuj daengz gyawj le, riunyumnyum doiq Vangz lauxsae naeuz:“Lauxsae, yaek hwnj- dangz luba!”

Vangz lauxsae naeuz:“Yaek hwnj lubw, mwngz haeuj bya bae ha?”

Bouxsai dap:“Dwg ha, haeuj bya bae aeu gogoen.”

Bouxsai doq gangj vah doq coh ndaw bya byaij bae, mbouj geij nanz ndaw mokhaet couh yawj mbouj raen gij ngaeuz de lo.

Ndaw bya maj miz gogoen, gij gogoen neix maj youq gyang bya caeuq gwnz dingj bya, gij mbaw gogoen ndaej aeu daeuj suek faengx, gij gogoen lieb baez duk le, ndaej aeu daeuj san raep gyaeng gaeq, san loz cang haeux, san swx langh byaek. Boux canghsan san ndaej le, swhgeij gag yungh, hix dawz di bae gwnz haw gai aeu ngaenz.

Banhaemh, hagseng cungj dauq- bae lo, Vangz lauxsae byaij haeuj ranzdajcawj bae, dajsuenq coemh feiz cawj caeuz seiz, mehmbwk 30 lai bi he daj diuz roen bae baihrog byaij daeuj.

Mehmbwk gwnz fwngz riuj bingz souh haeuxyangz ndeu, de daeuj daengz gyawj le, riunyumnyum doiq Vangz lauxsae naeuz:“Lauxsae, yaek cawj caeuz luba.”

Vangz lauxsae naeuz:“Yaek cawj lubw, mwngz yaek bae gizlawz?”

Mehmbwk naeuz:“Gou daeuj ciep gvan gou, haet neix mwngz raen gvan gou gvaq gizneix lwi?”

Vangz lauxsae naeuz:“Haet neix miz bouxsai ndeu gvaq neix haeuj bya bae aeu gogoen, dwg mbouj dwg gvan mwngz?”

Mehmbwk naeuz:“Yienghneix couh deng lo, haet neix de dawz fagcax naeuz yaek bae ndaw bya aeu gogoen, gou couh youq neix caj de lo.”

Aen cauhcangz hagdangz miz aen daizgiuz ndeu, mehmbwk dawz bingz souh haeuxyangz cuengq daengz gwnz daiz bae, vunz hix naengh youq gyaeuj daiz caj gvan de. Vangz lauxsae raen lo, couh haeuj ranzdajcawj bae coemh feiz cawj haeuxcaeuz lo.

Mbwn ciemhciemh amq roengz- daeuj lo, Vangz lauxsae yawjyawj mehmbwk haenx, seizneix de cingq iet hoz coh ndaw bya yawj bae.

Gvaq yaep ndeu, mehmbwk naengh mbouj onj lo, de youq gwnz cauhcangz byaij bae byaij dauq, lwgda cungj nanz mbouj nanz couh coh ndaw bya yawj bae.

Vangz lauxsae cawj ndei haeux- caeuz, yaek bae heuh mehmbwk, mehmbwk hix cingq coh de byaij daeuj, cam:“Lauxsae, haet neix mwngz caen raen miz vunz haeuj bya bae dahraix ha?”

Vangz lauxsae naeuz:“Caen dahraix, gou lij ndaej caeuq de doxdongx dem, mbouj yaeuh mwngz.”

“Baenzlawz seizneix lij mbouj dauq ha, baenzlawz seizneix lij mbouj dauq ha.” Mehmbwk mbouj dingz dwk damz naeuz.

Mbwn yaek laep lo, bouxsai cij rap rap gogoen ndeu dauq daengz hagdangz gizneix.

De gwn sat bingz souh haeux- yangz mehmbwk dawz daeuj hawj de le, dawz rap gogoen duet roengzdaeuj, ndenq hawj Vangz lauxsae, naeuz:“Lauxsae, diuz hanz neix ce hawj mwngz ngoenzlaeng yungh ba, dou yungh mbouj daengz lo.”

Vangz lauxsae cam:“Gogoen vihmaz mbouj guh rap dog, dauqfanj faen baenz song gwed ha.”

Mehmbwk naeuz:“Guh rap ndeu deng boux ndeu rap, geijlai naek cungj dwg boux ndeu dawz ndwi. Faen guh song gwed, moix boux gwed gwed ndeu, yienghneix rap naek couh baenz rap mbaeu lo. Caiq gangj, gvan gou ngoenzneix bae raemj gogoen hix baeg lo, gou hix siengj ok di rengz, hawj de mbouj baenzneix baeg. Dou maranz lo.”

Mehmbwk gangj sat, song boux gag riuj, caeuq bouxsai boux gwed gwed gogoen he, boux gonq boux laeng doxgen coh gizgyae byaij bae.

Seizneix, ronghndwen loq ok byai bya daeuj, ciuq ndaej gwnznamh ronghsagsag.