Vunzmbanj Gvanhcangh Cunh leihyungh dieg youq henz goengloh, ndaw mbanj miz ranz gaeuq Ciuhmingz Ciuhcingh guh, comz ngaenz coihcingj ranz gaeuq, caeuq gij mbanj henzgyawj lienzbenq ndaem makdauzmaed, guhbaenz aen cunh hawj hekyouz seizcin ndaej yawjngonz vadauz、seizcou ndaej mbaetsou cimzgwn makdauz, youh ndaej haeuj mbanj cimhra rizgaeuq ciuhgeq, cuengqlangh aensim, soengset yiengjsouh saedceij laj- mbanj ndeu, saedceij vunzlai bi beij bi vuenyungz.

Gvanhcangh Cunh dieg youq baih doengbaek Gvanyangz Yen, gvihaeuj diegguenj Suijceh Yangh, aenmbanj ing bya dep raemx, aenranz cienheu vaxmbok, onjmaenh daengjdwt, benq ranz gaeuq gaenq miz caet bak lai bi lizsij; Ciuhmingz Ciuhcingh seiz, ndaw mbanj gonq- laeng ok haujlai vunzcaiz, miz vunz gaujhwnj guhhak, ndawde boux ceiq okmingz de dwg Ciuhcingh Dau- gvangh nienzgan Hoz Ging’wnh boux youq Swconh lai aen yienh dang cihyen neix. Bakmbanj miz song giz haem daengj ringab ganjgeiz, guhcingq le gij ndwenngonz ndaw mbanj daihdaih ok vunzcaiz haenx. Gizdieg vunz ceiq siengj bae haenx dwg dieggaeuq ranzsaw hung caeuq ranzsaw iq youq Ciuhmingz guh haenx, byaij haeujbae ndwn dingh, couh lumj ndaejnyi sing doegsaw goksadsad heux youq henz rwz. Dahgvan’gyangh laeratrat con gvaq bakmbanj, baksok rinheu gaeuq lij daengj miz song gep sigbei gangjmingz: Youq song bak bi gaxgonq Ciuhcingh Gvanghsi nienz- gan, gizneix gaenq ruz bae ruz dauq nyaengqnyinyi hoenghhwdhwd. Seizneix daengx cunh miz gyawj 2800 vunz, miz Mbanjlaux、Mbanj- gyang、Mbanjgwnz、Mbanjranzciengj、Mbanjranzvuz daengj 9 aen mbanj, ndawde Mbanjlaux dwg Gvanhcangh aen mbanj ceiq geq ndeu, gij mbanj wnq cungj dwg gvaqlaeng cugciemh senjbuen gvaqdaeuj, baenzneix ndaej senj haeuj buekdaeuz aenmbanj cienzdoengj Cungguek.

Byaij ok Gvanhcangh Cunh le, couh raen miz goengq Byavenjbuengj ndeu, diuz roenmbaeklae aeu rinbya daebbaenz he iet bin doxhwnj, gwnz dingjbya miz aen diengzbinbya aeu rinbya guh giek faex doxdaep gang vax ndeu. Ndwn youq ndaw diengz yawj coh seiqhenz, ndaw gvaengh geijcib leix bya sang heuswdswd gingjsaek gyaeundei yawj ndaej yienhsagsag.

Gvanhcangh Cunh Mbanjcizyenz、Mbanjranzvuz、Mbanjbakbit caeuq Vujgyahvanh Cunh、Dungzdwz Cunh henzgyawj cibgeij aen mbanj lienzbenq caez ndaem makdauzmaed baenz fanh moux, makdauzmaed gai daengz daengx guek gak dieg caeuq gij guekgya Dunghmungz, gyoeb- baenz le rangh gingjyawj cib leix vadauz Gvanyangz, baenz le hong- saeh donghdaemx Suijceh Yangh. Gvanhcangh Cunh gungh ndaem miz 3000 lai moux makdauzmaed, moix bi vuenh binjcungj moq 300 moux, miz 2000 lai moux dawzmak, bi sou makdauzmaed 4000 lai dun, dan gai makdauzmaed daengx cunh moix vunz bingzyaenz cinghsouhaeuj 1500 maenz, gyawj cib bi daeuj bibi souhaeuj cungj dingh youq aen soq neix, vunzmbanj souhaeuj lai youh onjdingh.

Gvanhcangh Cunh nienzdaih gyaenanz, de daengz seizneix lij cienz cungj saenqsik vwnzva cienzdoengj ndeu hawj daihlaeng, diuz gai diuz hongh, nga raemx aen diengz, couh lumj lwnhgangj gij gojgaeq ciuhgeq haenx, aen dem aen cit youh cit, mbouj dingz mbouj duenh…