Youq gwnz Aen Canjlanj Cozbinj Meijsuz Gunghyi (Gij Gunghyibinj Lijyouz) Caeuq Cinghbinj Lauxhangz Guengjsae Bi 2017, Yangz Denz boux daenj buhvaq minzcuz conzdungj youq yienhciengz daet ceij neix daegbied hawj vunz haeujsim, haujlai vunz daeuj ngonzyawj canjlanj haenx cungj daengx din roengzdaeuj ngonzyawj. Yangz Denz bineix ndaej 55 bi, dwg vunz Dungzloz Yangh Sanhgyangh Dungcuz Swciyen Liujcouh Si, baez neix dwg daiq gij siuq Dungcuz Sanhgyangh Liujcouh miz daegsaek minzcuz haenx daeuj camgya canjlanj. Yangz Denz daj 7 bi hainduj hag Siuqdung, youq ca mbouj geijlai 50 bi seizgan ndawde, de itcig genhciz soujmaenh youq gwnz diuzroen swnjcienz SiuqDung, seizneix, de yungh gij hengzdoengh bonjfaenh bae son’gyauq “mehdajsiuq”, neix hix dwg aen siengjmuengh ceiq hung de.

Mwh iq couh maij Siuqdung

“Gou daj iq couh maij Siuqdung, lauxsae youq gwnz gyangjdaiz hwnjdangz, gou couh youq baihlaj daet ceij、dajsiuq.” Dwen daengz Siuqdung, Yangz Denz naeuz dwg deng vunz ndaw ranz yingjyangj, ndigah daj iq couh yinx Siuqdung. Mwh ndaej 6 bi, daxmeh、dahcej Yangz Denz dajsiuq, de ciengzseiz youq henz yawj, seiz daxmeh okrog guhhong, de engqlij laeglemx daek aeu gij raemx ndaw aendoengj nyumx baengz daxmeh haenx, caemhcaiq yungh gaiq baengz iq ndeu daeuj sawq lumj daxmeh nei bae nyumx, byawz rox gingqyienz baenz lo, neix hawj de sim’angq dangqmaz.

Daj haenx gvaqlaeng, daxmeh caeuq dahcej couh bienqbaenz boux lauxsae buqmoengz Yangz Denz hag Siuqdung lo, haq hawj vunz le, lauxyah couh bienqbaenz boux sonyinx Yangz Denz laebdaeb hag Siuqdung. “Gou hix ciengzseiz cam bonjfaenh, vih maz couh baenzneix maij Siuqdung, vih maz couh byaij hwnj diuz roen neix ne?” Yangz Denz naeuz, gij maij de doiq Siuqdung haenx gig swhyienz, caemhcaiq itcig genhciz guh faenh dinfwngz neix haujlai bi, dandan dwg aenvih bonjfaenh doiq Siuqdung miz yinx, caen mbouj miz maz gizyawz leixyouz. Yangz Denz dwg vunz bonjdeih Dungzloz Yangh Sanh- gyangh, de daj Dungzloz Yangh Sanhgyangh okseng, hix haq youq Dungzloz Yangh Sanhgyangh. Lauxyah de dwg bouxswnjcienz Siuqdung faenh dinfwngz neix, neix hawj gij yienz- faenh Yangz Denz caeuq Siuqdung engqgya laeg lo, de bienqbaenz bouxswnjcienz daihseiq daih Siuqdung Sanhgyangh Liujcouh.

Gij genhciz doiq Siuq- dung haenx caengz vut bae gvaq

“Gij dozanq Siuqdung aeu duzlungz、duzfungh、va、duzroeg、gorum、daengngoenz daengj swnghvuz、gingjvuz swhyienz guhcawj, gij saek baengzsiuq cix dwg youz bonjfaenh gag dap. Siuqdung cungj dwg siuqsaeq, caeuq gij siuq gizyawz miz cabied. Guh Siuqdung bouh daih’it dwg aeu ra ndei baengz dajdaej, bouh daihngeih dwg daet ceij, caemhcaiq aeu gij ceij daet ndei haenx nem youq gwnz baengzdaej, bouh daihsam couhdwg dajsiuq, yienghneix couh guh baenz lo.” Genhciz guh Siuqdung faenh dinfwngz neix haujlai bi, gangj daengz baenzlawz dajsiuq, Yangz Denz hix dwg menhmenh gangj okdaeuj, sug dwk lumj gvaq ndwen- ngoenz nei. De baez gangj couh hainduj guhyiengh hwnjdaeuj, yienz- laiz guh Siuqdung wnggai aeu ceij- daet cuengq youq gwnz baengzdaej, yienghneix guh dwg vih hawj gij doxgaiq siuq yawj hwnjdaeuj engq lumj daengj youq nei, danghnaeuz baengzdaej gaenq yungh ceijdaet bau ndei lo, couhcinj deng raemx dumz hix mbouj yungh lau ceijdaet deng buqvaih, neix dwg gij gi’gyauj iq guh Siuqdung. Hoeng, guh Siuqdung mboujdan aeu miz gi’gyauj, lij aeu miz naihsim. “Seizneix haujlai boux- coz giepnoix naihsim. Ndigah dangh- naeuz miz vunz dwg gag siengj hag Siuqdung, gou gig haengj son de, aenvih dajsiuq ceiq youqgaenj dwg aeu miz naihsim, miz naihsim cij hag ndaej roengzbae、hag ndaej ndei.” Yangz Denz naeuz, guh Siuqdung aeu yungh bae haujlai seizgan, lumjbaenz guh doiq soij Siuqdung ndeu couh aeu yungh bae ngoenz seizgan ndeu, engqlij lengqseiz ngoenz ndeu cij guh ndaej aen ndeu, ndigah yaek siengj guh ndei faenh dinfwngz neix, aeu miz naihsim doh couh ndaej.

Siuqdung dwg feihvuzciz vwnzva yizcanj Guengjsae Bouxcuengh Swcigih, de dwg cungj gunghyi conz- dungj comz dajdaemj、dajnyumx、daet ceij、dajsiuq youq aen cingjdaej ndeu, Yangz Denz maqmuengh, ndaej miz engq lai bouxcoz gyahaeuj aen doih swnjcienz faenh dinfwngz neix daeuj. “Gou yaek ndaej 60 bi lo, bi geq gvaq bi, ndawsim couh yied daeuj yied you, gou gig lau Siuqdung faenh dinfwngz neix yaek saetcienz, ndigah seizneix ceiq youqgaenj dwg itdingh aeu son’gyauq ndei bouxcoz, hawj bouxcoz aeu de swnjcienz roengzbae.” Aenvih Siuqdung dwg gij hong gwnz fwngz, aenngoenz aiq yaek cungj dwg naengh youq, ciengzgeiz doxdaeuj, ndokgyaemj Yangz Denz couh miz vwndiz lo. De naeuz, riengz bi’ndwen gyalai, ndangdaej engq dwg beij mbouj ndaej gaxgonq, song bi gonq de lij bae yihyenz guh gvaq liuhleix yw ndokgyaemj, dahlwg raen gij yiengh hojsouh de le hix gienq de vut Siuqdung gvaq, hoeng Yangz Denz ndawsim gag naeuz mboujguenj baenzlawz hoj, hix aeu Siuqdung genhciz guh roengzbae、cienz roengzbae.

Maqmuengh ndaej son- gyauq ok engq lai “mehdajsiuq”

Aen Canjlanj Cozbinj Meijsuz Gunghyi (Gij Gunghyibinj Lijyouz) Caeuq Cinghbinj Lauxhangz Guengj- sae neix, Yangz Denz cujyau dwg daiq buhhaq caeuq gij yisuzbinj aennda Siuqdung daeuj camgya canjlanj, de lij daiq gaiq dauqcenj, lienhngaenz、goenhfwngz、soij daengj gij gungh- yibinj lijyouz daeuj doigvangq gai. “Ndaej camgya Aen Canjlanj Cozbinj Meijsuz Gunghyi (Gij Gunghyibinj Lijyouz) Caeuq Cinghbinj Lauxhangz Guengjsae neix, gij siengjfap ceiq hung gou dwg aeu Siuqdung Sanh- gyangh senhconz okbae、swnjcienz roengzbae, doigvangq minzcuz vwnzva Dungcuz, hawj engq lai vunz rox, engq ndei aeu Siuqdung swnjcienz roengz- bae.”

Seizneix, ndaw ranz Yangz Denz gig nauhyied, ndigah de youq ndaw ranz laebguh le aen gihdi swnjcienz feihyiz Siuqdung, aen siengjmuengh ceiq hung de dwg aeu Siuqdung engq ndei swnjcienz roengzbae. “Aen gihdi son’gyauq dou neix mbouj hanh bi- ndwen, cijaeu maij Siuqdung, byawz cungj daeuj hag ndaej.” Yangz Denz naeuz, gij vunz daeuj hag Siuqdung haenx, boux iq miz daengz geij bi, boux hung miz daengz geijcib bi, geiz son’gyauq ndeu miz 50 daengz 80 boux vunz daeuj hag. Hoeng son- gyauq bouxswnjcienz Siuqdung hix bungzdaengz haujlai hojnanz. Haujlai bouxcoz cungj mbouj haengj hag faenh dinfwngz neix, hix miz mbangj vunz couhcinj miz yinx, hoeng naihsim mbouj doh, linghvaih cienz son’gyauq dwg aen vwndiz ceiq hung dangqnaj Yangz Denz bungzdaengz. “Siuqdung dwg gij vwnzva minzcuz, itdingh mbouj ndaej saetcienz, ndigah couh- cinj baenzlawz hojnanz gou hix aeu de swnjcienz roengzbae.” Yienznaeuz youq gwnz diuzroen swnjcienz Siuq- dung lij miz haujlai hojnanz, hoeng Yangz Denz youq ndaw ranz laebguh le aen gihdi son’gyauq Siuqdung, lij fwngz gaem fwngz aeu gij dinfwngz Siuqdung son hawj engq lai vunz, de cingq yungh hengzdoengh bae saed- yienh aen siengjmuengh swnjcienz Siuqdung.