Mbouj rox dwg mbwn dingh

Naeuz dwg mingh gag baenz

Miz boux cam boux gaen

Gou baenq gyaeuj bi rwz

Neix mbouj dwg mbwn dingh

Mbouj dwg mingh gag baenz

Miz sawcih bonjfaenh

Simdaeuz gou haenq angq

Gou ndiepgyaez Sawcuengh

Vih siengjmuengh diegcoj

Ndaem ciengx rox gohyoz

Baet gungzhoj baenz fouq

Geijcib bi gvaqdaeuj

Gou mbouj dingz mbouj cuengq

Ciengz hag yungh Sawcuengh

Ndawsim vuenghfwdfwd

Saeh gonq seizneix muengh

Sawcuengh deng dingz dai

60 nienzdaih byai

Gou yaek dai ienuengj

Senj guh bouxbaujguenj

Geiq soq aeu Sawcuengh

Haeujok sij gwnz buengj

Beixnuengx cungj yawj rox

Fanhfanh ngeix mbouj daengz

Angq mboujcaengz geij ngoenz

Deng raemxrongz daeuj doenq

Geij coenz vah buenqcoih

Naeuz gou yungh Sawcuengh

Nyuengx ginzcung mbouj dingq

Caeuq baihgwnz doxdingj

Dingh dwg bouxfanjdung

Vunz ranz gou lau dai

Bae baiq gyoengq bouxdaeuz

Ndaq gou mbouj dingq naeuz

Ngaemgyaeuj bae boizlaex

Vih ansim bouxlaux

Dauqma cang gaenq cuengq

Ndaw laep hag Sawcuengh

Mbouj rox bae fueng lawz

Couh daj mwhhaenx hwnj

Gou hwnzngoenz gwq muengh

Ngoenzlawz va Sawcuengh

Dauq cuengq rag did ngaz

Cib’it gai hoihhung

Sam cung cienzhoih gvaq

Sawcuengh dauq did ngaz

Caen hai va dahraix

Daengx gih gak yienh si

Gizgiz hag Sawcuengh

Hozsanh mbouj nda’nduengq

Gou saetmuengh dangqmaz

85 nienz Bihaenx

Gou gaenq nyaenx mbouj ndaej

Vaiz maenh lij aeu cae

Ngaemgyaeuj bae haenqrengz