1955 nienz 7 nyied, gou bizyez faenboiq bae siujyoz dang lauxsae. Ngamq ndaej buenq bi, youh dunghcih bae Gvangjsih Sawcuengh Hagdangz hag Sawcuengh. Doeklaeng youh faen bae Denzlinz Yen Sawuengh Hagdangz son saw. Gou ngamq 20 bi, Sawcuengh couh haidaeuz caeuq gou guhdoih lo.

Son gyoengq bouxcoz lajmbanj rox Sawcuengh liux, gyoengq hagseng gou couh dauqbae mbanjcoj banh ban, aeu Sawcuengh saujmangz. 1957 nienz, lajmbanj doihengz Sawcuengh guh ndaej hoenghhwdhwd.

Miz baez he, gou roengz lajmbanj bae genjcaz gij hong doihengz Sawcuengh. Roengz mbanj aeu byaij loh, mbouj miz ci naengh, lij gag aemq baufug dem. Gou bae Nazbij Yangh, aeu byaij 3 ngoenz, hwnj bo roengz nangh, ndonj ndoeng gvaq rij, con lajfaex gyang bo, caen dwg sinhoj. Daj gwnz haw Nazbij Yangh bae Mbanj- veihsanh, vanzlij caiq byaij buenq ngoenz roen lingq dem. Byaij ndaej gou gyaeuj in da va, hanh lae mbouj dingz, mbouj miz saekdi rengz, ga diem mbouj hwnj, couh ninz youq henz roen. Gvaq yaep he, miz song boux vunz gvaq loh, raen gou baenzneix, couh bang gou nap sa, rex gou bae ndaw mbanj. Daengz le doq heuh daengx mbanj vunz daeuj yawj, roxnaj gou dwg bouxlawz. Lauxsae son Sawcuengh Mbanjveihsanh raen dwg lauxsae de, couh coux gou bae ranz de youq, caiq cingj canghyw daeuj yw bingh, bwnq ywdoj. Daengz ngoenz daihngeih, gou cij ndei di.

Haemh he mbwn haeuj laep, bouxcoz saumbwk couh bae hagdangz hag Sawcuengh. Haemh haenx gou bae hwnjdangz, son hag sawcih, caezgya doq hag doq yungh, hag ndaej gig nauhyied. Bouxboux cungj haenh naeuz Sawcuengh ndei hag ndei yungh, hag rox gij sing caeuq baenz- lawz sij gyoep, couh rox sij cih geiq fwen, caiq mbouj dwg boux- vwnzmangz lo.

1960 nienz, Sawcuengh hainduj haeuj siujyoz, yen gyauyuzgiz diuh gou bae siujyoz lajmbanj dang lauxsae. Gou son aen ban he, daj it nienzgaep hwnj couh son Sawcuengh, gyoengq lwgnyez maij hag, song ndwen couh geiq ndaej singmeh, seiq ndwen rox maegsij yinhmeh, geiz daihngeih hag rox gyoep rox gangj, sij cih sij cozvwnz. Doeklaeng, aen ban hagseng neix bouxboux cingzcik cungj haemq ndei, caezgya angq hwnj cuhcungh.

Vwnzgwz seizhaenx, doihengz Sawcuengh couh ngaiz dingz, gou haeuj cuhcungh lajmbanj bae son saw. Yienznaeuz mbouj miz Saw- cuengh son, hoeng gou yungh Sawcuengh cungj mbouj daengx seizlawz. Saekseiz aeu daeuj geiq saeh, roxnaeuz sij saenq hawj baengzyoux rox Sawcuengh, roxnaeuz sij faenzcieng geiq hawj 《Gvangj- sih Minzcuz Bau》, ciengz yungh Sawcuengh bau mbouj lumz gij saw Bouxcuengh raeuz.

1980 nienz, swcigih dauqfuk doihengz Sawcuengh, yen cujcizbu diuh gou bae guh yen minzyijveij fucujyin, giem dang yen minzyijban cujyin, lij giem guh yaucangj yen yozyau Sawcuengh. Lai rapnaek youq mbaq, lai maqmuengh youq ndang, gou cijndei gwed hwnj baenaj. Comz gyoengq lauxsae caemhcaez guh, ciusou hagseng cingzcik ndei，yungh- sim beizyangj hagseng. Doeklaeng gyoengqde mboujdan Sawcuengh hag ndaej ndei, Sawgun hix hag ndaej ndei.

Doihengz Sawcuengh bungz daengz haujlai hojnanz, lij ca di mbouj caiq guh gij hong neix dem. 1990 nienz, gou caeuq yenyinzda cujyin bae Namzningz camgya swcigih minzyij- veij veiyi. Youq gwnz hoih, dou daezok Denzlinz aeu doihengz Sawcuengh, itdingh guh gij hong neix ndei. Doeklaeng ndaej daengz minzyijveij baecinj. Daj seizneix hwnj, doihengz Sawcuengh youq Denzlinz miz diegnamh, miz gomiuz, laeglemx hai va, menhmenh ndaej giet baenz mak hung.

1986 daengz 1990 nienz, miz 8 boux cuhcungh、gauhcungh bizyez hagseng daeuj daengz ranz gou, cingj gou son gyoengqde Sawcuengh, ndei camgya bihaenx gya gauj Sawcuengh. Gou dapwngq gyoengqde, yungh yez- yiz seizgan nem singgeizroek、ngoenz- singgeiz daeuj hag, yivu son, mbouj aeu saek faen cienz, son rox cij daengx. Doeklaeng, 8 boux hagseng neix Sawcuengh cungj gauj ndaej faen sang, hwnj swcigih yozyau Sawcuengh. Bizyez le, dauq daengz ndaw yen, 5 boux ndaej anbaiz youq yienhsingz gunghcoz, 3 boux youq yozyau laj- mbanj son Sawcuengh.

Sawcuengh buenx gou 60 bi daeuj, gou cungj yunghsim guh hong, 1985 nienz 9 nyied, swcigih yinzminz cwngfuj fat hawj gou bonj yungzyi cwngsuh he, haenh gou “guh gij hong gyauyuz 25 bi ”. 1992 nienz, Bwzswz Si minzyijban fat hawj bonj cwngcuh he, haenh gou “doihengz Sawcuengh guh’ok cingzcik hung”. 1998 nienz Gvangjsih Minzcuz Bause fat hawj bonj cwngsuh he, gujli gou lai sij faenzcieng. 2010 nienz daej, gou bingz hwnj gij youhsiu dunghsinyenz Gvangjsih Minzcuz Bau.

Daj Sawcuengh buenx gou hainduj, gou miz 220 lai bien fwen、gojgaeq、sawcuenh、 sanjvwnz daengj daengh youq 《Gvangjsih Minzcuz Bau》caeuq《Sam Nyied Sam》, vih gij saw Bouxcuengh raeuz guh’ok saekdi rengz.