10 nyied 16 hauh, Liujcouh Si gawjhengz 2017 saedlienh wngqgaep fuengzre feiz coemh ndoengfaex, 126 boux siufuengz duiyenz daj Liujcouh Si、Yungzanh Yen、Sanhgyangh Dungcuz Swciyen、Yungzsuij Myauzcuz Swciyen、Liujgyangh Gih daengj yienhgih daeuj haenx, saedlienh guh gaenjgaep doxcomz、vaiqriengj cihyenz、aemq naek bin ndoi dangh raemx、 gihgi ndaepfeiz、yienzbauq ndaep feiz daengj gohmuz.

Liujcouh Si fuengzfeizban bouxfucwz iugouz daengx si linzyez bumwnz aeu dawz ndoengfaex fuengz feiz baij youq giz deihfueng haemq youqgaenj he, nyinhcaen ca ndei. Gak gaep ndoengfaex fuengz feiz cijveihbu cwngzyenz danhvei cungj aeu ciuq iugouz cungjdaej hong ndoengfaex fuengz feiz bae guh, gak gaep gag fucwz, gyagiengz boiqhab, maedcaed doxbang, cingqcaen guh hwnj gihci moq hong fuengz feiz ndoengfaex “vunzlai gvangqlangh camgya, sevei gaenxmaenx cihciz, bumwnz caez ca caez guenj, cwngfuj cienzmienh fucwz”, doidoengh Liujcouh hong fuengz feiz ndoengfaex caiq hwnj mbaek lae moq ndeu.

Ciuq gaisau, daengz seizneix, Liujcouh Si mbouj miz ndoengfaex deng coemh hung gvaq、mbouj miz vunz deng siengdai, ndoengfaex deng feizcoemh souhhaih gamhanh youq 0.8‰ dauqndaw.(Danz Gaijhingh/谭凯兴)