Goengsam Buzsam Mbanjdaih miz song boux lwgnyez, daeggo heuhguh Ahgviq, dahnuengx heuhguh Dahbengz. Goengsam Buzsam bineix ngamq rim 60 bi.

Cibgeij bi gonq, Ahgviq dawz 2 fanh maenz ngaenz duh Goengsam bae Doengbaek cawx ranz aeu yah lo. De baez bae couh mbouj raen ngaeuz, denva hix mbouj dwk baez lawz, saenq hix mbouj geiq dauq mbat lawz. Goengsam baez hwnj haw cungj bae youzdengiz cam miz mbouj miz saenq geiq hawj de.

Dahbengz haq bae Mbanj- liengzdaeuz, gaenq miz dah iq he. Mbanjliengzdaeuz liz Mbanjdaih cij miz cibgeij leix roen, Dahbengz gvanbaz ciengz daiq dahlwg dauq ranzmeh yawj dadaiq, lij bang bohmeh cawx haujlai gij gwn gij daenj. Bohmeh de caeuq gyoengq bouxlaux ciengz haenh naeuz:“Seizneix, lij dwg lwgmbwk lai in bouxlaux ha……”

Gouj nyied cogouj, Dahbengz cingj bohmeh bae Mbanjliengzdaeuz gwn laeuj. Bohmeh de daj gwnz haw dap cisamloek bae daengz seiz, couh mbon cienz okdaeuj gyau hawj bouxhaici. Bouxhaici riu naeuz:“Ngoenzneix, fanz dwg gij hek daj haw raeuz dap ci daeuj mbanj dou, cungj mbouj aeu cienz. Dou 2 aen ci cienmonz dap hek baedauq.” Goengsam Buzsam dingq le, sim’angq raixcaix, itcig docih.

11 diemj cung, daengx mbanj gij vunzgeq 60 bi doxhwnj caeuq caencik bouxlaux 200 lai vunz youq gwnz giuzcangz naengh daiz gwn haeux, bouxboux fajnaj miz riunyumj, ndawsim diemzsubsub. Cunhcangj gingz cenj laeuj hwnjdaeuj eu:

“Cingj caezgya caez daeuj,

Ndoet laeuj caemh gwn ngaiz.

Ngoenzneix fukfaenh lai,

Lwg saimbwk haeujngaeuh.”

Caezgya dingq le, cungj riu hwnjdaeuj, bek fwngz gangj ndei. Gyoengqvunz gwn ndaej yaek imq, miz geij boux dadaiq dawz hoengzbau okdaeuj gyau hawj cunhcangj. Cunh- cangj riu naeuz:“Sou geij boux neix daeuj mbanj dou gwn laeuj, gouj nyied cogouj dwg mbat daih’it. Gaenq cibgeij bi lo, moix daengz ngoenzneix, mbanj dou bouxcoz youq ranz guh hong caeuq boux lingx gunghswh moix vunz gien bak maenz ngaenz okdaeuj dakdaih bouxlaux ndaw mbanj donq he, lai gien mbouj hanh. Bohmeh lwgbawx rim 60 bi caengz daeuj gvaq hix cingj daeuj, cungj mbouj sou hoengzbau, lij aeu hawj boux aen hoengzbau dem. Gyoengq dahsau, dawz hoengzbau daeuj fat!” Geij boux dahsau dingq le, sikhaek daeuj baen hoengzbau hawj moix boux vunzgeq, riu naeuz:“Hoh mwngz miz fuk lumj daihhaij, souhgyaeu lumj goengqbya!”Bouxlaux ciep gvaq hoengzbau, cungj gangj:“Docih sou, docih sou!”

Gwn haeux gvaq, Dahbengz soengq bohmeh dauq daengz gwnz haw, de bae hangzlaeuj caeuq boux vunz Mbanjdaih gag ngauz laeuj gai cawx 30 gaen laeuj. Dauq ranzmeh le, Goengsam cam naeuz:“Bae ranz de cawx couh ndaej lo, hozbiet daj haw cawx dauq?” Dahbengz gej naeuz:“Boh, mwngz mbouj rox, gij laeuj hwnj haw lai ndei, laeuj cit youq haw mbouj ndei gai hane. Baezlaeng mwngz bae haw cawx.” Goengsam sikhaek dauj cenj laeuj he daeuj sawq, naeuz:“Caen dahraix, gij laeuj neix lai get. Lij dwg dahnuengx lai gyaez boh bw!” Dah- bengz naeuz:“Daeggo hix gyaez, cij dwg seizneix goulau de caengz ra ndaej geijlai ngaenz, daengz haemh- ndaep de couh aiq maranz lo!”

Cingq youq seizde, bouxsoengq- saenq haici daeuj daengz ranz Goengsam, de dawz aen loengxceij he gyau hawj Dahbengz, naeuz:“Naeuz go mwngz mbouj in bouxlaux, de geiq lauzmou he dauq lo.” Dahbengz umj loengxceij bae dwk gwnz daiz. Goengsam raen le, hoz gig ndat, hongz naeuz:“Lwg fouzhauq neix, lau dou mbouj miz youz cawj byaek, couh geiq lauzmou dauq? Ndek rog bae!” De gangj sat, yunghrengz daj gwnz daiz vad gij loengxceij cang lauzmou roengz dieg. “Baz” sing ndeu, aen loengxceij dek, miz gij saekgim laeuh okgeij. Dahbengz byaij gyawj bae yawj, yenzlaiz dwg gimdiuz.

Ndaw mbanj miz vunz dingq- naeuz Ahgviq geiq huq dauqdaeuj, cungj daeuj ranz Goengsam yawj dwg maz huq ndei. Daengz ranz dingq- naeuz dwg lauzmou, cungj danq naeuz boux lwg neix dauqdaej rox di saeh lo. Byawz rox, gawqyienz geiq gimdiuz dauq, engq haenh lo:“Va! Ahgviq caen gyaez bouxlaux bw! Youq rog ra ndaej ngaenz cungj mbouj lumz gij hoj bohmeh ciengx de hung son de baenzvunz.” Dahbengz riu naeuz:“Bohmeh, seizneix sou caen miz fukfaenh ha! Daeggo caeuq gou cungj rox hauqswnh sou! Gou cawx gij huq hawj sou baenzlai, cungj mbouj dij gij gimdiuz daeggo geiq baezneix ne!” Goengsam Buzsam seizneix sim gig angq, Goengsam naeuz:“Hauqswnh mbouj cij dwg yawj byawz ok ngaenz lai ngaenz noix, cijaeu miz sim, doiq bouxlaux ndei, cungj dwg hauqswnh.”

Caezgya bang bae gip gij gimdiuz hwnjdaeuj, dauqbae lij haenh Goeng- sam Buzsam miz song boux saimbwk ndei.