“Ceiqnoix haj fanh. Daxbaj, mwngz vaiq ra cienz okdaeuj, Dahyen daengq gou soengq cienz bae, mboujnex, yied nguh yied hoj yw bw!” Dahsoengq coi Mehyen.

Mehyen myaeg Dahsoengq baez he, naeuz:“Mwngz baez deq yaep he, gou bae aeu cienz.” Gangj sat, doq byaij haeuj rug bae.

Gvaq yaep he, Mehyen fwngz gaem dab cienzceij he okdaeuj, danqheiq naeuz:“Ndaw ranz mbouj miz cienzyienh, caenh miz geij cien maenz neix ndwi lo.” Doq naeuz doq nu fwngz, simgaek lumj duzmoed gwnz rek ndat, cam:“Baenzlawz guh, baenz- lawz ha?”

“Daxbaj, geij cien maenz baenz- lawz ndaej gaeuq? Mwngz caiq rara, dauqngeix daxlungz bingzseiz oet cienz haeuj gijlawz cuengq ni?” Dahsoengq beij Mehyen lij simgip, laebdaeb bang de ok cawjeiq.

“Deng bw, gou caiq rara.” Mehyen youh ndonj haeuj rug bae. Dauqma ndaw ding, Mehyen doiq Dahsoengq ngauzngauz gyaeuj, naeuz:“Caen ra mbouj miz lo.”

Song vunz doxcim myoegmyoeg. Sawqmwh, Dahsoengq yat hemq:“Daxbaj, cam vunz ciq yawjyawj!”

“Deng ha!” Mehyen baez bek fwngz, angqvauvau doq dajhai soujgih, lwgda baenqlulu. “Ciq bouxlawz ni?” De gag damzbyoedbyoed, cijraen de lwgfwngz baez dik baez dik, bued doeng le, de doiq soujgih sing goksadsad naeuz:“Mehfangh, gou dwg Mehyen. Dahlwg gou deng ci saeg sieng lo, seizneix gaenj yungh cienz bae haidau, mwngz vaiq ciq hawj gou haj fanh maenz, vaiqdi bw, dahyoux de lij youq ranz deq. Vaiqdi…… Ndaej lo, mbouj gangj baenzlai, mwngz soengq cienz daeuj menh lwnh mwngz nyi.” Denva daj sat, Mehyen sup gaem heiq raezraez he, aeu fwngz bekaek bobbob.

Dahsoengq hix naj riuhehe doiq Mehyen naeuz:“Daxbaj, gij hujgeiq mwngz caen ndei, doq cam doq hawj, mbouj yaemhywx saekdi. Caen hawj vunz hozhaenz.”

Mehyen daekeiq fwngfwng naeuz:“Mehfangh dwg boux hujgeiq ceiq ndei gou lo, song dou caen lumj cejnuengx nei.”

Mehyen caeuq Dahsoengq doq gangjgoj doq deq Mehfangh. Gvaq cibgeij faen cung, miz vunz roq dou, Mehyen doq ndwn hwnjdaeuj, riengj- retret yamq bae hai dou.

Dahsoengq angq dwk caeg riu ndaw dungx, de hix ndwn hwnjdaeuj, ndaw hoz naemj, cienz baez haeuj fwngz couh vaiqdi deuz, mienx ndaej vunz lai bak cab laeuh hangxsae. Hoeng, de baez coh bakdou ngonz bae, dungxmbouq lo, bakdou ndwnsoengz song boux gingjcaz. De doq unq- nemnem dauq naengh roengzma.

Ngoenzlaeng, gyoengqdoih mwngz coenz gou gawq cam Mehyen, cam de baenzlawz ndaej rox meh neix dwg bouxyaeuhvunz? Mehyen hix mbouj giemhaw, doq ndaengmoj fwngfwng, baez di baez dit lwnh hawj daihgya nyi.

Laxlawz, Mehyen banhaet daj aen ban vunzlaux fuengz yaeuh hagsib ngamq ma daengz ranz, couh ciep daengz dahlwg daj denva daeuj. Dahlwg cam bohmeh ndangdaej baenzlawz, naeuz seizneix yungj lai, daengz bat nyied cibngux cij ma ranz damq bohmeh. Vah caengz gangj sat, couh dingqnyi sing roq dou. Youq ndaw ranz, baez dingqnyi meh- yaeuhvunz naeuz Dahyen deng ci saeg sieng, Mehyen couh singjsag lo. Gaenlaeng de couh cang guh yiengh- yiengh saenq de swnh de, cang guh simgaek raixcaix dauqcawq ra cienz. Mehyen youh cang guh daj soujgih ciq cienz, de daj hawj Veiz gingjgvanh, cix daegdaengq heuh “Mehfangh”, Veiz gingjgvanh baez dingq couh rox dwg maz saeh lo.

Duznyaen caiq gvai hix gvai mbouj gvaq canghdwknyaen.

（sat）