Ndwen 9 ngoenz 27 banhaemh, canghfwen Doihgyoebhab Byaraiz Ningzmingz Yen youq gwnz daizfwen Bi 2017 Baijok Yienjciengq Fwen- cuengh Guengjsae euciengq le 《Fwen Couxhek》, hawj sing fwen Vahcuengh ndei dingq Mbanjcuengh youq henz Dahmingzgyangh yienh- singz Ningzmingz haprwenz hwnj- daeuj.

Bi 2017 Baijok Yienjciengq Fwencuengh Guengjsae youz Swcigih Minzyijveij cawjbanh, Cungzcoj Si Minzcunghveij、Cungzcoj Si Minz- yijveij、Ningzmingz Yen Yinzminz Cwngfuj ciepbanh. Swcigih Minz- yijveij fucujyin Yi Siz, Cungzcoj Si Minzcunghveij cujyin Cau Gan, Ningzmingz Yenveij cangzveij、fuyencangj Luz Youzgwngh daengj bouxdaeuz caeuq vunzlai dangdieg caez yawj le baijok yienjciengq hozdung. 32 aen doihfwen gungh 120 lai boux canghfwen daj daengx gih gak dieg daeuj haenx caez comz yienhsingz Ningzmingz, caemhdaiz doxdax, yungh Fwencuengh yiengh- nduj, vih bouxyawj yienj le ciengz vwnzva fwen hoenghhwd ndeu.

Yi Siz naeuz, haiguh baez baijok yienjciengq Fwencuengh neix miz sam aen muzdiz: It dwg yungh gij hingzsik fwen angqcoux Cibgouj Daih dangj ciuhai. Cibbet Daih doxdaeuj, beksingq gak cuz Guengjsae youq dangj cunghyangh aeu Siz Ginbingz cungjsuhgi guh haedsim lingjdauj baihlaj, gak hangh hong aeundaej hwngfat ndei, baijok yienjciengq Fwencuengh couhdwg baijok gij cingzcik beksingq gak cuz Guengjsae aeundaej haenx. Ngeih dwg bineix dwg 《Fueng’anq Sawcuengh》 dinghfat hengzguh 60 hopbi, baijok yienjciengq Fwencuengh dwg gij hozdung geiqniemh angqhoh 《Fueng’anq Sawcuengh》 dinghfat hengzguh 60 hopbi ndawde aen he. Sam dwg Fwencuengh dwg gij vwnzva dijbauj Bouxcuengh, seizneix swnjcienz caeuq hwngfat vwnzva fwen miz hojnanz, vih swnjcienz caeuq hwngfat vwnzva fwen, doeng- gvaq banh baijok yienjciengq fwen hozdung, yungh gij hingzsik vunzlai haengj dingq gyaez yawj neix, hawj vunzlai caez camgya, ndaej daengz gij muzdiz swnjcienz vwnzva conz- dungj Bouxcuengh.

Baez baijok yienjciengq fwen hozdung neix faen song ciengz guh, ciengz daih’it youq ngoenz 27 ban- haemh guh, ciengz daihngeih youq ngoenz 28 banhaet guh. Gyoengq canghfwen gonqlaeng hwnj daizfwen euciengq le 《Minzcuz Doxgiet Ranz Ndeu Caen》《Siengjmuengh Saed- yienh》《Mbanjcuengh Gyaeundei Raeuh》《Ngaeuh Mbouj Gaeuq Hom Bya Mbouj Gyan》《Vah Saw Minzcuz Aeu Swnjcienz》daengj diuhfwen gak dieg ndei dingq haenx, yinx ndaej geij bak baenz cien boux vunzlai daeuj yawjngonz, gyoengq bouxyawj cungj naeuz yawj ndaej yinx lai, dingq ndaej maez liux bae.

Baez doxdax neix laeb le youhsiuciengj caeuq gujliciengj. Ginggvaq doxdax naemqhaenq le, Doihfwenliuz Bingzgoj Baksaek Si、Doihgyoebhab Byaraiz Ningzmingz Yen、 Doihsunningz Ningzmingz Yen、Doihfwenhab Majsanh Yen、Doihfwenliuzloh Yunghningz Gih Namzningz Si daengj 10 aen doifwen dued ndaej youhsiuciengj, Doihdaeuz Fwencuengh Liujgyangh Gih Liuj- couh Si daengj 22 aen doihfwen aeundaej gujliciengj.