Doeg siujyoz mbouj rox Vahgun ngaiz ep cienjhag

Daegbauj mingzcaen heuhguh Veiz Baujcwngz, seng youq Liujgyangh Yen aen Mbanjcuengh ndeu, daj seng daengz hwnj siujyoz, Daegbauj dan rox gangj Vahcuengh. Daxboh Daegbauj dwg lauxsae siujyoz ndaw mbanj, aenvih guhhong aeuyungh, diuh daengz ndaw cin cungsim siujyoz sonsaw, vihliux fuengbienh, couh daiq Daegbauj bae riengz doegsaw. Aenvih doengzhag siujyoz ndaw cin cungj gangj Vahgun, hoeng, Daegbauj dan rox gangj Vahcuengh, ndigah itcig ngaiz doengzhag riu, cingzcik hix gaen mbouj hwnj, doeklaeng couh cienj dauqma siujyoz ndaw mbanj doegsaw.

Haenqrengz hag ndaej daengx yienh cuhcungh Yinghyij yienj- gangj doxdax mingz daih’it

Gij ginglig mbouj rox gangj Vahgun deng gyoengq doengzhag riu haenx, youq ndawsim Daegbauj louz roengz gij rizyaenq laeglaeg. Daegbauj dauqma siujyoz ndaw mbanj le, haenqrengz hag Vahgun, caemhcaiq aeundaej cinbu gig hung. Daengz seiz hwnj cuhcungh Vahgun de gaenq gangj ndaej raeuzrwd, vihneix ndaej dang bouxgvangjbo Vahbujdungh ndaw hagdangz.

Miz gij gingniemh hag vah lo, hwnj cuhcungh le Daegbauj hainduj gyaez hwnj Yinghyij. Daegbauj raen gij doegyaem Yinghyij lauxsae caeuq aenluzyinhgih boq ok haenx doxca lai, duenqdingh lauxsae gangj mbouj cinj, hoeng aenvih aeueiq lauxsae cix mbouj gamj ceij ok. Seizneix de miz aen siengjfap siengj aeu aen luzyinhgih ndeu gag hag Yinghyij, caemhcaiq lwnh hawj daxboh nyi. Mwhhaenx cienzhong daxboh ndwen cij miz geijcib maenz, hoeng, cawx aen luzyinhgih ndeu yaek yungh bae geij ndwen cienzhong, gij maqmuengh Daegbauj dangyienz saedyienh mbouj ndaej. Doeklaeng, gienh saeh neix hawj daeggo mwhhaenx youq baicuzsoj guhhong haenx rox le, mbouj geijlai nanz daeggo soengq hawj Daegbauj aen luzyinhgih gaeuq ndeu. Daegbauj dauqdaej ndaej hozhaih lo, miz luzyinhgih le, Daegbauj moix ngoenz cungj luzyinhgih nem ndang hag Yinghyij, gij suijbingz Yinghyij de daezsang gig vaiq. Miz ngoenz ndeu, lauxsae Yinghyij lwnh de aen siusik ndeu, Liujgyangh Yen yaek banh daengx yienh cuhcungh yungh Yinghyij gangj gojgaeq doxdax, de hawj Daegbauj bae camgya, doeklaeng Daegbauj ndaej mingz daih’it.

《Byaij Doh Meijgoz》hawj Daegbauj dingh ciuhvunz

Doeg gauhcungh bi daih’it, Daegbauj ciuhvunz baez daih’it gvaq ngoenzseng. Daxboh cam Daegbauj siengj aeu gijmaz? Daegbauj hai bak couh naeuz:《Byaij Doh Meijgoz》!《Byaij Doh Meijgoz》 dwg gij swzdai hag Yinghyij mwhhaenx ceiq hwng, miz geijcib ciz, bouxwnq cawx ma cek ok geij hab le, gij lw lienz baucang hix gik bae cek. Hoeng, Daegbauj aeu geijcib hab swzdai neix daj gyaeuj daengz rieng dingq le haujlai baez, bakgangj caeuq dingqlig Yinghyij de hix daezsang gig vaiq. Bi 2007 Daegbauj camgya gauhgauj, gauj hwnj Guengjsae Dayoz aenhi vah guekrog ciennieb Yinghyij.

Seizneix ngeix hwnj gienh saeh neix, sim Daegbauj lij gig saenq- doengh. Danghnaeuz de mbouj doeg Guengjsae Dayoz aenhi vah guekrog, gij seizheiq caeuq Sawcuengh giet- cingz couh gig iq, mbouj miz seizheiq caeuq Sawcuengh gietcingz le, couh mbouj ndaej aeu gij go Vahcuengh ciengq daengz Audaliya.

Yinhyoz hawj aen seiqgyaiq Yinghyij Daegbauj lai saek lai yiengh

Daegbauj daj iq couh gyaez yinhyoz, neix lauheiq dwg Bouxcuengh seng daeuj couh gyaez ciengq go.

Mwh doeg siujyoz, daeggo de miz aen gizdah ndeu, seiz daeggo mbouj youq ranz Daegbauj couh aeu aen gizdah sawq hag. Hwnj cuhcungh le, ndaw hagdangz miz boux lauxsae oiq ndeu danz gizdah ndaej ndei dangqmaz, Daegbauj raen le engq siengj hag gizdah lo, doeklaeng cij cawx saw ma hag gizdah, menhmenh couh rox mbangj danz ciengq. Hwnj dayoz le doegsaw hagsib mbouj nyaengq lo, gij sibauh yinhyoz Daegbauj youh dauq hoengh hwnj- daeuj lo, byaij loh、gwn haeux caengz duet gvaq wjgih; hozdung seizhoengq gizdah nem ndang, gizdah baenz bouxdoih caenmaed de. Yinhyoz hawj Daegbauj roxyiuj haujlai baengzyoux gak hangz gak nieb, de baengh neix rox di baengzyoux cauxguh yinhyoz ndeu, daj neix hainduj sawq bae cauxguh yinhyoz. Aenvih gij giekdaej Yinghyij de netsaed, youh rox danz rox ciengq dem, dayoz bizyez le youq Namzningz Ngeihcung gwnz aenhoih ciu lauxsae Yinghyij, gij bonjsaeh Daegbauj yienhda, doeklaeng Daegbauj couh baenz lauxsae Yinghyij Namzningz Ngeihcung lo.

Aenvih cunghyoz gij aplig hong sonhag haemq hung, dang gvaq song bi lauxsae cunghyoz le, Daegbauj gietdingh swz bae faenh hong neix, caemhcaiq wngcingj dauqma mujyau dang lauxsae Yinghyij.

Maij ciengq go hawj de yamqhwnj diuzloh bae Meijgoz

Bi 2010, Guekgya Vahgun Vah Rogguek Doigvangq Bangunghsiz caeuq Meijgoz Dayoz Hezvei guh baez doxgap ndeu, baij lauxsae Sawgun Cungguek daengz Meijgoz son gyoengqde hag Sawgun.

Mwhhaenx doxceng haenq dangqmaz, daengx guek miz haujlai vunz siengj bae, aeu baenz caengz baenz caengz senj. Aeu bae Baekging camgya dangnaj gaujsi.

Daegbauj daengz Baekging le, dangnaj gaujsi gaenq guh daengz daihseiq daihhaj ngoenz, dwg dangnaj gaujsi ngoenz ceiq laeng lo. Mwh Daegbauj bae dangnaj gaujsi, de maz cungj mbouj gangj aeu aen gizdah ndeu okdaeuj. Cungj guhfap daegbied neix, hawj haj boux bouxgaujgvanh Meijgoz ngawh lo, doq cam: “Mwngz mbouj dwg byaij loeng dieg luba?”

Hoeng, Daegbauj cix gig simdingh, de han naeuz: “Gou mbouj dwg byaij loeng. Aen minzcuz dou miz aen daegsaek ndeu, couhdwg maij ciengqgo, hix haemq rox ciengqgo.” Gangj sat couh yungh Yinghyij gaisau bonjfaenh, gangj bonjfaenh mwh lij iq miz vahgangj vwndiz, daengz doeklaeng bienqbaenz cungj caizfouq bonjfaenh hag vah ndeu. De laebdaeb gangj: “Daih’it, vahcoj dingzlai vunz cungj dwg Vahgun, gyoengqde mbouj rox gij hojnanz hag Vahgun miz geijlai hung; daihngeih, vahcoj gou dwg Vahcuengh, gou rox lai cungj vah, Vahgun caeuq Yinghyij cungj haemq ndei; daihsam, gou rox danz gizdah, rox ciengqgo, rox cauxguh go.”

Gangj gij caixhangz bonjfaenh le, Daegbauj danz ciengq geij aen go hawj geij boux gaujgvanh dingq, ciengq liux le haj boux gaujgvanh cungj douzbiuq hawj de doenggvaq. Daengz Meijgoz le, Daegbauj youq Bohswdun aen hagdangz ndeu son Sawgun. Son ndaej bi ndeu, Daegbauj biujyienh ndei ndaej mbiengj Meijgoz iucingj laebdaeb louz roengzdaeuj song bi, youq song bi neix, dahlwg Daegbauj youq Meijgoz doekseng lo. Sam bi seizgan yaek daengz, Daegbauj youh aeu guh senjcwz lo: Louz roengzdaeuj roxnaeuz dauqma guekcoj, dangh- naeuz louz roengzdaeuj ca di ndeu couh aeu ndaej mbawcingq ciengzgeiz youq Meijgoz fat hawj haenx; dauqma guekcoj couhdwg ndeindei sonsaw, son ndei lwg.

Daegbauj naeuz:“Cungj miz faenh cingz sij mbouj ndaej ndeu.” Doeklaeng de lij dwg dauqma guekcoj, aenvih goek youq Cungguek, sim youq Guengjsae.

Aenvih Vahcuengh ndaej bae Aucouh Sihniz Dayoz doeg bozsw

Daj Meijgoz dauqma guekcoj bi ndeu le, miz ngoenz ndeu Daegbauj sawqmwh ciep ndaej mbat denva ndeu, dwg lauxsae sozsw de dwk daeuj, de lwnh Daegbauj, Sihniz Dayoz miz boux gyausou ndeu siengj ciu boux hagseng Bouxcuengh ndeu, de dwk denva gvaqdaeuj dwg siengj doekdingh Daegbauj lij rox mbouj rox gangj Vahcuengh. Daegbauj dap naeuz: “Baenzlawz mbouj rox la, gou moix baez bae ranzcoj cungj gangj Vahcuengh, neix dwg vahcoj gou ha!” Couh yienghneix, lauxsae couh doigawj Daegbauj bae lo. Mwhhaenx dingjlingz boux gyausou Sihniz Dayoz haenx youq Yanghgangj haihoih, dingq gangj gij gojgaeq Daegbauj le roxnyinh de dwg boux ceiq habngamj. Vihneix, boux gyausou neix daeg- daengq daengz Namzningz gauj Daegbauj, doeklaeng Daegbauj ndaej boux gyausou neix loegaeu lo.

Bi 2014, Daegbauj yamqhaeuj douhung Aucouh Sihniz Dayoz, youq gizneix doeg cezyoz bozsw yozvei, yenzgiu gij yingjyangj vah Boux- cuengh doiq ginghci caeuq vwnzva haenx.

Youq Sihniz Dayoz doegsaw cienzbonj lai dangqmaz, dan baengh guh honglingz nanz ndaej dingj roengzbae. Vihneix, Daegbauj giet- dingh bae gwnz gai yienjciengq, de yungh aen gizdah boiqyaem ciengq go Yinghyij、go Vahgun caeuq go Vahcuengh, yinx ndaej baenz buek baenz buek bouxmaezgo, moix aen singhgiz yienjciengq 3 baez, couh rom doh gij cienz daengx ndwen yungh lo.

Gyaez Bouxcuengh yungh Sawcuengh ciengq go Cuengh cungj mbouj gaij

Daegbauj gyaez yinhyoz, hix fanjyingj ok de genhciz nyinhdoengz gij ndangfaenh Bouxcuengh bonj- faenh. De naeuz, danghnaeuz miz saek ngoenz raen Daegbauj mbouj ciengqgo lo, mbouj danz gimz lo, mbouj raiz go lo, de lauheiq couh mbouj dwg Daegbauj seizneix, aenvih gij ndang- faenh sengmingh de gaenq mbouj miz lo.

Daegbauj aenvih dwg vunz Bouxcuengh cix raen miznaj. De nyinhnaeuz, yaek hawj vwnzva Boux- cuengh laebdaeb ndaej swnjcienz, vah Bouxcuengh ndaej louz roengzdaeuj dwg aen yienzaen ceiq youqgaenj ndeu. De naeuz, “senj bae daengz aen guekgya ndeu, yungz haeuj aen biengz ndeu, daih’it dwg aeu gaem- dawz gij vah cujyau aen biengz neix. Doengzseiz, gou youh raen hojsik dangqmaz, danghnaeuz daihlaeng raeuz mbouj gangj Vahgun lo, mbouj rox gangj Vahcuengh lo, yienghhaenx de gaenq saetbae gij ndangfaenh cojcoeng bonjfaenh lo, aenvih saetbae cungj vah neix, couhdwg naeuz caeuq vwnzva yied liz yied gyae, mwh yaek bae ra dauq gij goekgaen bonjfaenh couh yaek bungz daengz haujlai vwndiz.”

Gij bozsw yozvei Daegbauj yenzgiu vah Bouxcuengh haenx, lij miz duenh seizgan ndeu cij aeundaej, hoeng, de caengz lumz gvaq gij yinvu codaeuz bonjfaenh haenx. De naeuz: “Gou maqmuengh gou guh daengz, ra ndaej di banhfap daeuj bang Boux- cuengh raeuz bae baujhoh ndei gij vah bonjfaenh, hawj gij vwnzva raeuz ndaej cienz roengzbae.” Yawjraen seizneix haujlai vunz Bouxcuengh son lwgnyez gyoengqde itdingh aeu hag Vahgun, engqlij miz mbangj vunz mbouj son vahcoj lo, doiq neix, Daegbauj you dangqmaz. De naeuz,“Danghnaeuz gyoengq lwg raeuz mbouj gangj vahcoj lo, cungj vah neix couh yaek bungz daengz diuhcan gig hung, de yaek ndaej louz roengzbae couh hoj lo, gvaq geij daih le, cungj vah neix couh mbouj miz vunz gangj lo. Mbouj miz vah, gij vwnzva raeb- laeng hix riengz de mbouj miz lo.”