Sai:

Daengzseiz yaek baema

Raeuz doiqnaj

Hot gohaz guh geiq

Beix ciengxlwenx ndaejgeiq

Dai roengz deih

Hanzleix lij naemj nuengx

Mbwk:

Gyanghaemh gou diemj daeng

Loq fangzhwnz

Siengj daengz mwngz youh daej

Cij lau mwngz daegbeix

Aen sim bienq

Mbouj caiq geiq daengz gou

Sai:

Hwnj bya youh roengz dat

Lumj fatbag

Din caij raggaeumaenz

Gyanghaemh gou mbouj ninz

Siengj baenzhwnz

cungj dwg geiq dahnuengx

Mbwk:

Gyanghaemh ninz mbouj ndaek

Da mbouj yaep

Guhcaeg hwnq gwn caz

Dai mbouj laep lwgda

Bienq fangz ma

Hanzleix dauq ra beix

Sai:

Dahnuengx gangj gawq vah

Caen naeuz gyaj

Dij gvaq fanh gaiqngaenz

Nuengx dwg bya ndaw daemz

Geiq ndawsim

Mbouj hawj vunz bae coemj

Mbwk:

Faexlaux youq bangxdat

Onjatat

Baengh rag cap gehrin

Nuengx mbouj maij gaiqgim

Gou ndawsim

Cij gyaez mwngz daegbeix

Hab:

Miz byaekhau ndaw suen

Rang youh diemz

Mbouj caiq maez byaekngaih

Ranz miz laeujmauzdaiz

Doiq naj sai

Gaiq ndei raeuz caemz cimz

Gofat gyaez gofat

Rag lienz rag

Mbouj bae ap gocin

Gaiqngaenz boiq gaiqgim

Raeuz ciuhvunz

Doxgyaez sim mbouj bienq

（sat）