——sij youq seiz Sawcuengh fangh’an fatroengz doihengz 60 hopbi

——写于《壮文方案》颁布推行六十周年之际

Lai bi gvaqdaeuj, gou fatbiuj gvaq gij faenzcieng haenx miz song bak bien hwnjroengz ba, hoeng miz haujlai aenvih gou lai baez daj aen yozyau neix diuh bae daengz aen yozyau haenx, gaenq ra mbouj raen lo. Mboujgvaq, miz mbaw bauqceij he, gou lij you ranzgaeuq lajmbanj yo ndaej maenh raeuh, yo ndaej geijcib bi, mbaw bauqceij haenx heuhguh 《Bauq Sawcuengh》（dwg ndanggonq 《Gvangjsih Minzcuz Bau》）, mbaw bauqceij gwnz de daengh miz bien sawcuenh daih’it gou sij.

Dwen daengz bien sawcuenh neix, gangj daeuj vah raez. Seizhaenx, gou ngamq gauhcungh bizyez, haemh he, miz boux lauxsae Sawcuengh singq Veiz he, daeuj daengz mbanj dou, gyanghaemh de heuh daengx mbanj bouxcoz lwgnyez daeuj haihoih, naeuz yaek youq mbanj dou son Sawcuengh. Seizde mbouj rox Sawcuengh dwg maz, mbouj yinx hag, hoeng raen haujlai lwgsau lwgmbauq cungj bae, siengj- siengj couhdwg bae yawjyawj hix ndei, gou couh bae riengz hag lo.

Mbouj siengj daengz, Sawcuengh yungzheih hag, gou yied hag yied mizyinx, hag aen singhgiz he couh rox doeg Sawcuengh lo. Seizde, vunz laj- mbanj gyaez eufwen, aeu Sawcuengh daeuj geiq fwen gig fuengbienh, vunz daeuj hag engq lai lo.

Veiz lauxsae son dou miz ndwen he couh dauqbae lo, de dauqbae seiz, ce geij faenh 《Bauq Sawcuengh》hawj gou yawj. Gwnz de daengh miz sawcuenh, gou yawj le roxnyinh mizyinx, gaxgonq gou hix gyaez yawj sawcuenh Sawgun, gou couh sawq aeu Sawcuengh sij bien sawcuenh he geiq hawj 《Bauq Sawcuengh》. Byawz rox, mbouj geij nanz, bien sawcuenh neix couh daengh okdaeuj lo, bause lij geiq faenh bauqceij he hawj gou. Gou ndaenggon fwngfwng dawz bae hawj gyoengq lwgsau caemh hag Sawcuengh yawj, gyoengqde cungj hozhaenz dangqmaz lo.

Gvaqlaeng, gou engq gyaez yawj sawcuenh lo, mbouj guenj dwg Sawgun rox Sawcuengh, raen couh dawz daeuj yawj, yawj le doq sij, aeu Sawcuengh hix aeu Sawgun sij, mbouj gvaq gij sawcuenh aeu Sawgun sij haujlai cungj mbouj ndaej fatbiuj, dauq dwg sawcuenh Sawcuengh youh ndaej fatbiuj saek bien. Ndaej baenzneix gangj, seizhaenx danghnaeuz mbouj miz Sawcuengh hawj gou saenqsim, gou goj mbouj caiq laebdaeb sij sawcuenh lo.

Gvaq le byongh bi yienghneix, ndaw yangh ciusou siujyoz lauxsae, siengjsiengj gou dwg ndaw yangh boux dog youq bauqceij fatbiuj gvaq sawcuenh haenx bw, gou mbouj gauj byawz gauj? Byawz ngeix, baez gauj gou caen gauj ndaej lo.

Guh siujyoz lauxsae, gou doq hwnjdangz doq yawj saw lienh sij sawcuenh, ciemhciemh gou aeu Sawgun sij gij sawcuenh hix ndaej youq bauqceij fatbiuj lo.

Aenvih bingzseiz lai yawj saw lai sij, gij dungxcaiz gou hix beij bouxwnq lai miz di. Gvaq geij bi le, daengx yienh gij gaujsi gvendaengz lauxsae cienjcwng, miz bet bak lai vunz bae gauj, hoeng, cij miz 6 aen mingzngeg. Doeklaeng gou gauj ndaej mingz daih’it, swnhleih baenz boux lauxsae goengbanh he.

Gangj daengz neix youh siengj daengz gienh saeh gou doeg dayoz he. Seizhaenx, gou gaenq guh geij bi siujyoz lauxsae, couh camgya cingz- yinz gauhgauj, gauj ndaej hwnj dayoz lo.

Daengz yozyau le, gyoengq doengzhag ndaw ban dingqnaeuz gou caeuq boux doengzhag hix singq Lij he cungj fatbiuj gvaq sawcuenh, cungj miz di cawh. Hoeng, youh dingqnaeuz songdou cungj dwg sij sawcuenh Sawcuengh, couh miz di yawj mbouj hwnjda lo, nyinhnaeuz sij sawcuenh Sawcuengh mbouj miz maz bonjsaeh. Gvaq ndwen lai, cungj yawjfap neix couh bienq lo. Youq aen ciet vwnzva caeuq yisuz yozyau banh, songdou camgya gij doxdax cwnghvwnz, gou ndaej it daengjciengj, boux doengzhag singq Lij haenx ndaej ngeih daengjciengj. Gyoengq doengzhag baezneix cij miz di simfug. Doeklaeng, songdou youh youq gwnz bauq mbouj duenh fatbiuj faenzcieng, miz Sawcuengh hix miz Sawgun, mbouj miz byawz caiq gangj naeuz sij sawcuenh Sawcuengh mbouj miz bonjsaeh lo.

Seizneix, ngeih samcib bi gvaq- bae, gou sij gij faenzcieng hix miz haujlai bien ndaej daengh youq sengj rog cazci, lumjbaenz 《Ginh Guj Cienzgeiz》、《Veihhingz Siujsoz Senj- ganh》、《Gusw Sigai》daengj. Gij saed- ceij gou gvaq ndaej cungsaed mizyinx.

Dauqngeix gij saeh neix, gou hix ndaej aj fwed mbin haeuj aen mbwn vwnzyoz maez vunz neix, faj fwed neix dwg Sawcuengh hawj gou. Gou caensim docih Sawcuengh, hix docih bouxbien 《Gvangjsih Minzcuz Bau》, lai bi gvaqdaeuj, dwg gyoengqde hawj gou haujlai bangcoengh, hawj gou ndaej mbin bae engq gyae. Muengh Sawcuengh go faex hung neix maj ndaej engq mwn engq sang……