Ngoenznaengz gou ngamq hai da, mbawfaex hung he cingq bongx faenx gwnz ndang de. Benq fwj cingq gvaq henz ndang de daeuj, ngeng ndang dwk rub faj naj gou, faj fwngz de mbaeumbengmbeng, gou roxnyinh faj naj gou raeujrubrub.

“Yawj, gaiq mbawfaex moq haenx!”

“Gij saek de baenzlai ndeiyawj ha, de dwg bouxsien seizcin!”

Song boux lwgnyez ceij gou angq dwk bekfwngz hemq naeuz.

Gou mbehai aen ndang bibuengq gou, youq ndaw rumz raeuj ngauznged.

Nyuenz gou dwg bouxsien seizcin!

Gou youh yawjyawj mbawfaex geq henz ndang gou. Dasang dangq- maz, aenvih gou dwg mbawfaex moq cingsaenz gvaekgvaek, dwg bouxsien seizcin!

Gou baenzlawz hwnj ok gwnz go faex neix daeuj ne? Caeuq gyoengq bouxlaux ndang naiq guhdoih? Gou buekmingh cukcak, maqmuengh maj- hung vaiqdi, lumj go byaeklinzgaeq nei mbin bae gij dieg swhgeij siengj bae!

Hoeng, gou dauqdaej mbouj ndaej lizhai. Gou menhmenh rox swhgeij mbouj miz banhfap cak duet gaiq gingqfaex laeg gou, de itcig gaemh gou maenhdwtdwt. Miz ngoenz he de naihsim gangj naeuz:“Lwg ha, mwngz ansim majhung gonq, seizneix lij mbouj caengz dwg seiz mwngz lizhai ne!”

“Seizlawz cij dwg ne?” Gou ndatheiq hat hwnjdaeuj.

Gaiq gingqfaex mbouj ndwet saek coenz.

Ciengzseiz nditndat mbouj caiq camx da gou seiz, gou roxnyinh gaenq dwg seizcou lo. Seiz mbouj seiz miz rumz baihsae ci gvaqdaeuj, ci ndaej gou yaek doeksaensaen.

Gaiq gingqfaex cungjsuenq menhmenh soeng fwngz, riunyumnyum doiq gou gangj naeuz:“Lwg ha, seiz- neix mwngz goj ndaej bae gizgyae lo.”

Gou sawqmwh fatyienh, gou gaenq mbouj dwg seizcin song boux lwgnyez haenh haenx lo. Seizhaenx gou dasang yawj mbouj hwnj gij mbawfaex geq, hoeng, seizneix gou roxnyinh swhgeij caen dwg dungxsaej feuz——seizneix gou hix bienqbaenz mbawfaex geq lo……

Gou couh baenzneix mbin- foenfoen daj gwnz go faex roengzdaeuj lo.

Rumz dahsau riunyumnyum cam gou naeuz:“Mbawfaex daeggo, mwngz yaek bae gizlawz lijyouz ne?”

Gou genhding dwk gangj naeuz:“Couh youq laj gofaex neix, gizlawz gou hix mbouj bae!”

Baenzneix gou couh ninz youq laj goek go, itcig daengz gou bienqbaenz bwnh daeuj ciengx gofaex, yienznaeuz ndang gou iqetet, mbouj miz geijlai hung, hoeng, gou mbouj gangj saek coenz, caemrad vih ganq go faex dwk yingzyangj. Hoeng, gou yawjraen haujlai mbawfaex caeuq gou gaxgonq doxdoengz, dasang yawj mbouj hwnj mbawfaex geq, siengj mbin bae gizgyae, doeklaeng gyoengqde cungj caeuq gou doxdoengz, cungj nyienh ninz youq laj gofaex, youq gij dieg habngamq ndeu ok gij rengz swhgeij.

Gou dwg mbawfaex ndeu, seiz- gonq gaenq maj youq gwnz faex heuswd, seizneix cingq ninz youq laj gofaex.