Mehyen caenh goq haeujsim byaij roen, mbouj rox baihlaeng gaenq miz vunz gaenriengz haujlai nanz lo.

Boux riengzlaeng Mehyen neix dwg boux maij yaeuh vunz he, raeuz couh heuh de guh Dahsoengq. De vunz reuxred, miz yiengh miz siengq, daenj gouh haizgiujsang byaij roen, gumq- hangx dod de bibi buengqbuengq, yawj mbouj ok gaenq miz 40 bi lo. Mehyaeuhvunz neix daj Vunzlaux Hozdung Cungsim couh gaenlaeng Mehyen ma daengz gizneix. De dingz din roengzdaeuj, lwgda cezyawj Mehyen hwnj laeuz bae le, cij menhmenh gaenlaeng hwnj laeuz.

De doiq saeh iq saeh hung ndaw ranz Mehyen cungj rox caez. Rox Dahlwg Mehyen youq diegwnq guh hong, ndaw ranz cij miz song boux laux guhdoih gvaq ndwenngoenz. Rox song laux duiyouh le, mbaet gwn mbaet yungh, rom miz haujlai cienz. Dahsoengq gag ngeix gag angq- fwngfwng, ngoenzneix baenzlawz cungj yaeuh meh neix aeu di ngaenz. Vunzlaux ceiq yungzheih deng yaeuh, Dahsoengq guh yaeuh gaenq ndaej caet bet bi lo, caengz miz saek baez fwngz hoengq dauqma.

Bin daengz ngeih laeuz, de dingqnyi sam laeuz miz sing seiz, de rox Mehyen daengz ranz lo. Deq Mehyen gven dou yaep he, de cij byaij hwnjbae daengz bakdou ranz Mehyen, yaengx fwngz mbaeu- mbengmbeng roq dou “deg deg deg” sam baez.

Yaep he, dou hai lo, hoeng, aen dou ngamqngamq hai miz diuz geh he, Mehyen nyeng gyaeuj cim de, cam:“Mwngz ra bouxlawz?”

“Daxbaj, mwngz geiq mbouj ndaej gou la?” Dahsoengq riuhehe doiq Mehyen gaisau naeuz, “Gou dwg baengzyoux Dahyen.”

Mehyen ngeizvaeg cim de, ngauzngauz gyaeuj:“Mbouj roxnaj.” Swnh fwngz doq gven dou.

“Hae hae, menh di, daxbaj.” Dahsoengq doq yungh fwngzgvaz nyoengx dou, doq yungh fwngzswix mbon aen soujgih okdaeuj, “Hawj mwngz yawj mbaw siengq ndeu.” De diemj hai soujgih, ndenq hawj Mehyen ngonz, “Ne, Dahyen caeuq gou dox- caemh ingjsiengq, geij ngoenz gonq ngamq ingj.”

“O, caen bw!” Mehyen sijsaeq yawj yaep he, raen caen dwg mbawsiengq dahlwg, couh hai dou hawj de haeuj ranz.

Mehyen hawj Dahsoengq raix raemxcaz, gwn lwgmak, nyaengq- foedfoed fwngz mbouj dingz. Dah- soengq naeuz:“Daxbaj, mwngz gaej nyaengq lu, mwngz naengh roengz- daeuj, gou miz saeh lwnh mwngz.” De gaem fwngz Mehyen, cang guh najsaep sisi naeuz:“Daxbaj, caen mbouj rox baenzlawz doiq mwngz hai bak……”

“Gaej guhhek, miz maz vah mwngz couh naeuz, cungj dwg vunzsug lo.” Mehyenz riunyumj naeuz.

“Caen dwg boihseiz, Dahyen seizniex cingq ninz youq ndaw yihyen ne.” Dahsoengq danqheiq naeuz.

“Dahyen baenz maz bingh lo?” Mehyen doeksaetyat, saetsing cam.

“De deng ci saeg lo, seizneix ninz youq yihyen ciengjgouq.” Dah- soengq yawj hwnjdaeuj gig lauxsaed naeuz.

“Deng ci saeg?” Mehyen bwnda baez nyaeuq, saeknaj doq bienq laepsadsad, de youh cam, “Dwg gij saeh ngoenzlawz ha?”

“Ngoenzlwenz.” Dahsoengq dap.

“Ngoenzlwenz?” Mehyen gag damzbyoedbyoed, caemyaemz yaep he, de youh cimyawj Dahsoengq cam, “Yienghneix baenzlawz guh ha?”

Dahsoengq naeuz:“Ndokbuenz de raek lo, yaek aeu haidau cij ndaej, yihyen heuh gyau cienz gonq.” Dahsoengq nyinhcaen gangj.

“Aeu geijlai cienz?” Mehyen cam.

（caengz sat）