Fwen vunzvunz rox eu, singfwen daihdaih cienz

Youq lajmbanj Liengzging Gih, riuzcienz coenz vah baenzneix ndeu: “Cingznyienh sam ngoenz mbouj gwn noh, mbouj ndaej sam ngoenz mbouj eu fwen.” Fwenliuzloh Bouxcuengh youq dangdieg miz giekdaej vunzlai naekna. Vunz bangeq ca mbouj geijlai vunzvunz rox eu fwen、maij eu fwen, yungh fwen ma daihvunz guhsaeh, yungh fwen biujyienh ndwenngoenz、dajndaem dajciengx, gak cungj hoz- dung angqhoh ngoenzciet、vwnzdij hozdung engq liz mbouj ndaej fwen. Fwen, dwg bouhfaenh noix mbouj ndaej ndaw ndwenngoenz vunzlai ndeu. “Liengzging Gih fwenliuzloh Bouxcuengh” “hoihfwen Giuzswh Bouxcuengh” faenbied liedhaeuj si gaep、swcigih gaep “feihyiz” daibyaujsing hanghmoeg mingzloeg.

Mboengqneix, vihliux gamjsouh gij yinxdaeuz daegbied fwenliuzloh Bouxcuengh, gicej bae daengz Liengzging Gih Meijvuboh Mbanj- yunghloz Nazcinz Cin. Ngamq byaij- haeuj henz mbanj, baenz raq baenz raq singfwen rwenzrwz ndeidingq couh cienz okdaeuj lo. Cihsuh Mbanj- yunghloz Liengz Sanggenh lwnh gicej, eu fwen coux hek dwg gij fungsug dangdieg, vunz ndaw mbanj cingqcaih yungh gij singfwen yiedcingz angqcoux gicej daeujdaengz.

Caijfangj couh youq ndaw go- cwngz eu fwen guh. Vunz ndaw mbanj Fungz Veilanz bineix gaenq ndaej 76 bi lo, hoeng, eu fwen hwnjdaeuj hix mbouj dwgrengz saekdi. Fungz Veilanz lwnh gicej, de daj iq couh gaen daxbuz hag eu fwen, eu ndaej baenz ciuhvunz lo.

Caeuq Fungz Veilanz doxlumj, bangeq ndaw mbanj vunzvunz rox eu fwen, vunzvunz maij eu fwen. Sing- fwen daihdaih doxcienz, hix mbouj rox cienz ndaej geijlai daih lo. Vunz ndaw mbanj Meijvuboh Liengz Sang- cenz dwg ndaw mbanj bouxcujciz doihfwen ndawde boux ndeu. De mboujdan eu fwen, lij cauhguh fwen, haujlai fwen vunz ndaw mbanj eu haenx cungj dwg de raiz baenz, lengqgaiq fwen danqhaenh gij cwngcwz dangj, lengqgaiq fwen dwg lwnhgangj caeuq danqhaenh ndiep- cingz, lij miz gij fwen gvendaengz ngoenzciet dem. Liengz Sangcenz aeu gij fwen bonjfaenh gag cauh haenx guh baenz ceksaw, daengz seizneix gaenq miz geij cek sawcomzfwen. Yawj gij sawcomzfwen gaenq deng fan yawj ndaej miz di hed haenx, gicej couh lumj dingq ndaej nyi baenz hot baenz hot fwen cingqcaih cienz eu nei.

Liengz Sangcenz cauh fwen cauh ndaej vaiq dangqmaz, youq ndaw gocwngz caijfangj, de dangciengz couh cauhguh baenz hot fwen ndeu soengqhawj gicej, hot fwen neix dwg yungh Vahcuengh cauh baenz. Liengz Sangcenz lwnh gijcej, gij fwen de gagcauh haenx gig lai, gij cingjleix soucomz hwnjdaeuj haenx dan dwg didi ndeu.

Fwen miz yinxdaeuz lai, lajmbanj gaenq bienq yiengh

Singfwen haprwenz ndeidingq haenx gaenq laeglemx gaijbienq yienghnaj lajmbanj lo. Liengz Sang- genh lwnh gicej, doenghbaez, vunz ndaw mbanj Meijvuboh doengxhaemh guhcaemz mbouj dwg caimax gwn laeuj dwk mazcoz, couh dwg loengh “luzhozcaij”. Vunz ranznden caeuq vunz ranznden ciengzseiz vih di saeh iq ndeu ceng dwk najnding rwzdit.

Vihliux gaijbienq cungj fungheiq mbouj ndei neix, laebhwnj vwnzmingz fungheiq moq Meijvuboh, bi 2010, vunz ndaw mbanj gag rom ngaenz guh daizheiq diuqfoux caeuq lanz- giuzciengz. Miz ciengzdieg guh vwnz- dij hozdung le, gij vwnva hozdung vunz ndaw mbanj menhmenh couh lai hwnjdaeuj lo. Ndaw mbanj lij comz baenz aen doihfwen bouxcoz boux- cungnienz ndeu miz 30 lai vunz dem.

Liengz Sanggenh lwnh gicej, dangqnaj, ndaw mbanj gaenq banh gvaq sam gaiq fwen doxdax, moix gaiq fwen doxdax cungj yinx ndaej baenz fanh boux vunz ndaw mbanj caeuq vunz mbanj henzgyawj gaenxmaenx caeuqfaenh, cingsaenz mienhmauh vunz ndaw mbanj menhmenh bienq ndei.

Caeuq Meijvuboh doxlumj, lij miz haujlai aenmbanj aenvih fwen cix gaijbienq yienghnaj. Fwenliuzloh Bouxcuengh gaenq bienqbaenz gij neiyungz youqgaenj ndaw hozdung vunzlai gvaq ngoenzciet、baenzgya、ngoenzseng daengj gak aen yanghcin aen singz neix; baeznaengz, vunzlai swnh angq eu fwen, gag caemz gag faengz. Youq gak cungj hozdung ndawde, fwen bienqbaenz gij senhconz fuengsik doih fwenliuzloh、canghfwen fwenliuzloh gak mbanj、yanghcin senhconz gvancez cwngcwz dangj、cunh gveih minz duenq、vunzndei saehndei daengj.

Fwen haeuj hagdangz, “feihyiz” miz vunz cienz

Caeuq haujlai conzdungj minzcuz minzsuz vwnzva doxlumj, fwenliuzloh Bouxcuengh cujyau dwg gyoengq bangeq cienzciengq, swnjcienz fwen- liuzloh hix hawj haujlai vunz you. Vihliux engq ndei bae swnjcienz fwenliuzloh Bouxcuengh, aen singzgih neix miz dajveh、miz cungdenj youq mbangjdi hagdangz diegguenjleix hengzguh “fwenliuzloh haeuj goq- dangz” sonhag, gungganq hagseng hawj hagseng gyaez yinx fwenliuzloh, haeujcoengh caeuq gujli laebbaenz aen donzdij vwnzyi fwenliuzloh ndaw hagdangz, hawj fwenliuzloh miz vunz cienz.

Youq Liengzging Gih Nanzyauj Cin Cungsim Hagdangz, couh miz aen doih fwenliuzloh youz lauxsae caeuq hagseng hagdangz gapbaenz he, gyoengqde youq gwnz goqdangz、hai banhoih、laj guekgeiz cienzciengq fwenliuzloh, cienzboq gij yinxdaeuz fwen. Hagdangz lij cienmonz cingj canghfwen ndawbiengz Banh Gilenz、bouxraiz faenzcieng Sawcuengh Cungh Hihcwngh ma son’gyauq gij goekgaen lizsij caeuq ciengqfap ciengqdiuh fwenliuzloh hawj gyoengq lwgnyez, hawj gyoengq lwgnyez daj ndaw sim gyaez hwnj cungj minzcuz conzdungj vwnzva neix. Seizneix, aen doih fwenliuzloh lauxsae hagseng Nanzyauj Cin Cungsim Hagdangz gaenq miz daengz ca mbouj geijlai bak boux vunz. Linghvaih, Liengzging Gih Nazmax Cin Danzbanjboh Siujyoz dwg aen hagdangz haiguh “fwen- liuzloh haeuj goqdangz” haemq vaiq he, seizneix lauxsae hagseng aen hagdangz neix vunzvunz rox eu fwenliuzloh.

Vihliux hawj fwenliuzloh ndaej engq ndei hwngfat, Liengzging Gih lij cujciz lai aen doih fwenliuzloh. Vangz Vangiz, boux veicangj Aen Hezvei Fwenliuzloh Nazmax Cin neix lwnh gicej, bi 2013 ndwen 1, Aen Hezvei Fwenliuzloh Nazmax Cin cingqsik venj baiz laebbaenz le, gaenq cujciz laebbaenz 30 lai aen doihfwen. Gyoengqde yungh ngoenzciet、seiz- hoengq, lienzhaeh gak mbanj haiguh hoihfwen hozdung. Baeznaengz dang- dieg banh aen hoihfwen angqhoh ngoenzciet youqgaenj, gyoengqde hix cungj gaenxmaenx caeuqfaenh, hawj fwenliuzloh engq ndei byaij hwnj daizheiq. Haujlai vunz ndaw mbanj doenggvaq yungh fwen gyau youx, doxdoeng saenqsik, gyalaeg cingzgamj.

Seizneix, Liengzging Gih gungh cauxlaeb 50 lai aen doih fwenliuzloh、10 aen gizdieg swnjcienz fwenliuzloh, miz 1 fanh lai boux canghfwen. Aen singzgih neix hix fatok gij daegdiemj canghfwen lai、cwgoemq gak cin mbanj haenx, yungh fwen senhgyangj、fwen doxdax daengj gij hingzsik vunzlai haengj dingq gyaez yawj haenx senhconz gak hangh fuengcim cwngcwz dangj, ndaej daengz vunzlai haengjgyaez.

Baujhoh gya cauxmoq, angjcuengq yinxdaeuz moq

Aen singzgih neix mboujdan swnjcienz fwenliuzloh, vanzlij mbouj- duenh cauxmoq, aeu neiyungz moq yenzsu moq yungzhaeuj ndaw fwenliuzloh bae. Liengzging Gih Vwnzva’gvanj gvanjcangj Vangz Yanghyiz naeuz, seizneix, gij diuh yienghnduj fwenliuzloh gaenq ndaej mizyauq baujhoh, hoeng, yaek hawj fwenliuzloh miz rengzhoengh, lij aeu gyalai cauxmoq ligdoh.

Youq cauxmoq fuengmienh, cawz cwngfuj mizgven cawjguenj bouhmonz roengzrengz doidoengh, canghfwen ndawbiengz hix fatok gij cozyung gaenxmaenx. Mwh gicej caijfangj, raq singfwen he daj ndaw bya cienz okdaeuj, cingq dwg Vangz Vangiz cingqcaih caeuq gyoengq fwenyoux de lienh fwen doiq fwen. Vangz Vangiz naeuz, 10 bi gonq, de ndaej iucingj bae caeuqfaenh hoihfwen baengzyoux, daj neix hwnj couh deng gij ciengqdiuh miz yinx fwenliuzloh yinx bae lo, de couh miz gij siengjfap laebguh doih fwenliuzloh. Miz le doih fwenliuzloh, fwen cauxmoq couh miz gij rengz gyoengq doih. Seizneix, gyoengqde baeznaengz okrog yienjok cungj eu gij fwen cauhguh moq haenx, fwen daj neiyungz daengz hingzsik cungj aeundaej hwngfat moq.

Linghvaih, aen singzgih neix lij lai baez cujciz canghfwen caeuq mbangj canghgo yauzgunj daihmoq neix caeuqfaenh cauhguh fwenliuzloh, hawj fwenliuzloh cauxmoq ndaej daengz hwngfat lai yiengh. Vangz Yanghyiz naeuz:“Cauxmoq fwen- liuzloh, hawj fwenliuzloh daj runghbya byaij hwnj daizheiq, fatok yinxdaeuz moq.” Seizneix, fwenliuzloh bienq- baenz mbaw “mingzben” gizdieg Liengzging Gih ndeidingq he.