Mbwk:

Daengngoenz doek roengz bya

Lum dujva

Mbouj caiq ma doxdauq

Daengzseiz mbwn laepraeuh

Cam beixlaux

Ngoenzlawz dauq daeuj daengz

Sai:

Daengzngoenz doek roengzbae

Gaej yungh heiq

Aeu mae yien doxdauq

Gwnz mbwn mbouj laepraeuh

Ronghsagsag

Raeuz goj menh guhcaemz

Mbwk:

Daengngoenz doek roengz bya

Va doek laj

Mbouj caiq ma doxdauq

Rin doek roengz haijlaux

Caemrwgrwg

Baenzlawz dauq ndaej fouz

Sai:

Daengngoenz doek baihsae

Gim doek deih

Gip couh ndaej doxdauq

Rin doek roengz haijlaux

Hix mbouj lau

Aeu saeng lauz hwnjma

Mbwk:

Vah gangj ok yungzheih

Hoeng daegbeix

Gizsaed guh mbouj daengz

Gyanghaemh bienq gyangngoenz

Youh lumjbaenz

Gaiqgim bienq ndaekdiet

Sai:

Vah nuengx gangj hix deng

Ndawsim gou

Hix miz saek di fanz

Daengzseiz raeuz bieksanq

Gag maranz

Couh caiq nanz doxraen

Mbwk:

Gak vunz youq gak mbiengj

Lumj ronghndwen

Gyanghaemh siengj daengngoenz

Ngoenzneix daeuj raen mwngz

Miz yienzfaenh

Cienzngaenz cawx mbouj ndaej

Sai:

Raeuz song boux liz gyae

Mbouj yungh heiq

Goj lij ndaej doxbungz

Daengz sam nyied cingmingz

Raeuz song vunz

Dauq daeuj daengz eufwen

Mbwk:

Beix vah dij cien gim

Cingq habsim

Song vunz sim mbouj bienq

Dailix hix doxlienh

Cien fanh nienz

Gim mbouj bienqbaenz doengz

Sai:

Seizneix nuengx biek beix

Sim dauq geiq

Byaleix biek lwgsae

Bya riengz raemx bae gyae

Gou boihseiz

Doengz lwgsae gwnz hawz

Mbwk:

Beix dwg duzbyaleix

Nuengx couhdwg

Duzlwgsae gwnz hawz

Mbouj miz vunz daeuj cawx

Dai gwnz hawz

Miz bouxlawz hojlienz

（caengz sat）