2005 nienz Yunghningz Yen gyoep haeuj Nanzningz Si le. Minzcuz Siuyoz mbouj youq gij gvaengh Yunghningz Gih lo. Aen cunghyoz gou gunghcoz couh ciemhciemh mbouj miz hagseng hag Sawcuengh, gou hix mbouj caiq son Sawcuengh lo. Hoeng, Sawcuengh youq ndaw sim gou mboujcaengz lizhai gvaq. Aenvih gou rox Sawcuengh, gij lauxbanj hai vwnzyindiemq ciengzseiz ra gou bang hoiz aen baiz. 2012 nienz 6 nyied, gou camgya Vahcuengh Sawcuengh Suijbingz Gaujsi(VSSG), aen gaujsi neix dwg youz Gvangjsih Bouxcuengh Swcigih Saujsu Minzcuz Yijyenz Vwnzsw Gunghcoz Veijyenzvei guh- daeuz cujciz. Gou gauj ndaej gaugaep gyaz daengj, ndaej mbaw cwngsuh ndeu, hawj gou doiq Sawcuengh engq miz cungj gamjcingz naekna lo. Gou maqmuengh miz gihvei caiq hawj gou son Sawcuengh.

Hawj gou ndawsim roxnyinh ceiq miz naj、ceiq vuenyungz dwg aenvih rox Sawcuengh hawj gou ndaej caeuq guekgya fucungjlij Liuz Yenzdungh gaemfwngz, caemhcaiq ndaej caeuq de caenciet gangjvah.

2015 nienz 3 nyied, baihgwnz doengci yozyau: Guekgya bouxlingj- dauj yaek daeuj Gvangjsih sicaz gij gunghcoz gvendaengz gyauyuz. Minz- cuz Cunghyoz gou youh dwg aen diemj guekgya lingjdauj sicaz ndeu. Yaek dawz maz miz minzcuz daegsaek hawj lingjdauj yawj ne? Yozyau lingjdauj siengliengz le, daj minzcuz dijyuz、minzcuz yinhyoz、minzcuz yisuz caeuq minzcuz yijyenz gyauyuz geij fueng- mienh neix daeuj guh cunjbei. Daj 2005 nienz gyoep haeuj Nanzningz Si le, yozyau gou youq gaenq miz haujlai bi mbouj hai ban son hagseng hag Sawcuengh lo. Yozyau lingjdauj couh heuh gou daengz gak ban bae senj gij hagseng rox gangj Vahcuengh youh haengj hag Sawcuengh, yungh 3 aen singhgiz son gyoengqde rox doeg rox sij Sawcuengh. Ciep daengz aen yinvu neix, gou sim angq raixcaix, gou youh ndaej son Sawcuengh lo. Gou aeu banhaemh son hagseng Sawcuengh. 3 aen singhgiz gou couh son ndaej hagseng rox doeg gij singmeh、yinhmeh caeuq singdiuh Sawcuengh, hix rox doeg rox sij gij Vahcuengh bingzseiz ciengzseiz gangj.

2015 nienz 3 nyied 30 hauh, guekgya fucungjlij Liuz Yenzdungh caen daeuj daengz yozyau gou youq lo. Seizhaenx gou cingq son hagseng hag Sawcuengh, baez ngiengxgyaeuj yawjraen Liuz Yenzdungh fucunglij riunyumnyum ndwn youq gyausiz baihlaeng dingq. Gou sikhaek heuh gyoengq hagseng aeu Sawcuengh coh fucungjlij caeuq gak boux buenxdoih lingjdauj camndei——“Angqcoux gak boux lingjdauj daeuj daengz yozyau dou cijdauj gunghcoz” .

Fucungjlij yawjraen gyoengq hag- seng rox aeu Sawcuengh angqcoux caezgya, angq raixcaix. De byaij daengz baihnaj gou, caenciet caeuq gou gaemfwngz, riunyumnyum dwk cam gou gunghcoz geijlai bi lo, youq yozyau gvaq ndaej baenzlawz? Lij maqmuengh gyoengqdou aeu laebdaeb guh ndei gij gunghcoz gvendaengz minzcuz gyauyuz. Ngoenzhaenx Liuz Yenzdungh fucungjlij sicaz sat, gyoengq lauxsae baez dingqnyi gou ndaej caeuq fucungjlij gaemfwngz, cungj hozhaenz dwk buet daeuj doxceng caeuq gou gaemfwngz, lij gangjriu:“Ngoenzneix mwngz gaej swiq fwngz lo, hawj dou hix nem di fukheiq.” Gyoengq lauxsae baez daih’it roxnyinh rox Sawcuengh dwg baenzneix miznaj.

Vih angqhoh Sawcuengh doi- hengz 60 hopbi, 2016 nienz 12 nyied, gou daibyauj Yunghningz Gih camgya “Nanzningz Si Gaiq Daeuz Aeu Vahcuengh Biucinj Doeg Ginghdenj Doxdax”. Gou singsang doeg 《Gaej Lumz Dangj Aencingz》 hot sei neix ndaej sam daengj ciengj. Yienznaeuz gou doiq gij cingzcik neix mbouj daiq muenxeiq. Hoeng, gou gaenq ndaej 50 bi lo, lij ndaej aeu Sawcuengh youq gwnz daiz caeuq gyoengq hauxseng、lwgnyez caez doxdax, vih hawj engq lai vunz rox minzcuz vwnzva Bouxcuengh raeuz guh di saeh, gou roxnyinh gig miz yiyi.

Baez yaep da, gou caeuq Sawcuengh gaenq giet ndaej 33 bi cingzngeih lo. Docih Sawcuengh, de hawj gou rox gij vwnzva Bouxcuengh raeuz; docih Sawcuengh, de hawj gou ndaej mbouj dingz mbouj duenh roengzrengz doegsaw, haenqrengz gunghcoz; docih Sawcuengh, de hawj gou coengzlaiz mbouj roxnyinh swhgeij gaenq laux, cingsaenz cibcuk byaij doxbae.

Ciuhvunz gou ciengxlwenx mbouj lumz cingz Sawcuengh.

（sat）