Gaxgonq miz bi ndeu mbwn rengx, geij daegmbauq bae gonh raemx haeuj naz. Hoeng, ngoenzneix gonh rim le, ngoenz daihngeih youh hawq lo. Laebdaeb geij ngoenz cungj dwg yienghneix.

Geij daegmbauq geizheih dangqmaz. Ngoenz ndeu banringz, gyoengqde youh gonh raemx rim naz. Banhaemh geij daegmbauq dawz cax、dawz naq、dawz daeng bae henz naz souj. Gyanghwnz cij raen duz ngwzhau hung ndeu daeuj gwn raemx naz. Geij daegmbauq baez raen couh yaek cung gvaqbae dub de dai. Hoeng, deng daegmbauq ndeu lanz dwk. Daeg neix coh heuhguh Daeglungz, de doiq gyoengqdoih naeuz:“Raeuz mbouj ndaej luenh gajseng bw, lauheiq duz de miz maz haemzhoj ne, raeuz yawj yaep he caiq gangj.” Couh yienghneix, geij daegmbauq couh mbouj ning lo. Duz de gwn raemx naz hawq le couh nodruenz deuz lo.

Ngoenz daihngeih geij daeg- mbauq ciuqyiengh bae gonh raemx haeuj naz. Gonh yaep he, daxmeh Daeglungz daeuj daengz henz naz hemq:“Daeglungz, sien maranz ba, miz hek daeuj ranz ra mwngz.” Daeglungz dingq le couh ma lo.

Ma daengz ranz, cij raen daegmbauq ndeiyawj ndeu naengh gyang ranz, daeg haenx baez raen Daeglungz couh naeuz:“Gou dwg duz ngwzhau gwn raemx naz haemh- lwenz bienqbaenz, docih mwngz haemhlwenz gangjvah hawj gyoengqde mbouj sieng gou. Gou ceiq gaenh baenz cungj bingh ndeu, gwn geij baez raemx naz le bingh couh ndei lo. Ngoenzneix gou daegdaengq daeuj nyinh mwngz guh beixnuengx.”

Daeglungz dingq le naeuz:“Guh beixnuengx? Ndei lai lo. Hoeng, ranz gou dwg ranzhoj bw!” Daegmbauq ngwzhau naeuz:“Hoj miz maz? Cijaeu gaenx guh, couh miz gwn miz daenj.” Gaendwk mbauqngwzhau iu Daeg- lungz bae ranz de guhcaemz. Daeg- lungz hix mbouj guhhek couh caemh bae lo.

Songde daeuj daengz henz dah, mbauqngwzhau heuh Daeglungz laep da yaep he. Daeglungz baez laep da, couh deng daiq daengz aen goeng- dienh gyaeundei lwenqda ndeu, de baez hai da, couh deng gij gingjsaek gyaeundei seiqfueng maez dwk. Mbauqngwzhau doiq Daeglungz naeuz:“Neix dwg ranz gou.”

Daeglungz doeksaet, liuh mbouj daengz ranz mbauqngwzhau baenzneix fouqmiz. Daeglungz youq ranz mbauq- ngwzhau guhcaemz geij ngoenz le couh ma lo. Maranz ngoenzhaenx, mbauqngwzhau soengq bau faen haeux、bau faen byaek caeuq duz hanqlwghau ndeu hawj Daeglungz dawz dauq ranz, lij son de baenzlawz ndaem haeux、ndaem byaek caeuq baenzlawz gueng hanqlwg dem.

Daeglungz maranz le ciuq gij vah mbauqngwzhau daengq bae guh. Moix bi de cijaeu ndaem geij naed faen haeux, gij haeux souhaeuj couh rim ranz rim cang; ndaem geij naed faen byaek, byaek lai daengz gwn mbouj sat； duz hanqlwghau hix ngoenz beij ngoenz majhung, bwn hausak gig dwggyaez.

Gvaq geij bi, daxmeh Daeglungz baenzbingh dai bae lo, cij miz Daeglungz bouxdog gag youq gag guh gwn.

Ngoenz ndeu, Daeglungz bae doengh dauq, raen gwnz congz miz haeuxbyaek cug homfwdfwd, ndaw ranz hix deng baet seuq, de geizheih dangqmaz.

Laebdaeb geij ngoenz cungj dwg yienghneix. Daxbuz ranznden laeg- lemx lwnh Daeglungz nyi:“Geij ngoenz neix miz dahsau gyaeundei ndeu youq ranz mwngz dajcawj, de dinfwngz gig riengj dwk guh hongranz.” Daeglungz dingq le bakaj loengloeng, mbouj gamj saenq.

Ngoenz daihngeih, Daeglungz gyajcang okdou, cix ndoj youq laj conghcueng ndomqyawj. Yaep he, cij raen duz hanqlwghau byaij ok roengq daeuj, bienqbaenz dahsau lengj ndeu, gyaeundei lumj bouxsien nei. Daeg- lungz deng de maez dwk lo.

Daeglungz sikhaek hai dou haeuj ranz bae. Dahsau haenx baez raen Daeglungz, siengj ndonj haeuj roengq bae bienqbaenz duzhanq dauq. Hoeng, aen roengq doq deng Daeglungz dubsoiq, dahsau caiq bienq mbouj baenz duzhanq lo. Daeglungz maez yawj de, nyaenx mbouj ndaej fwt got dahsauhanq. Ndang dahsauhanq unqnamnam caemhcaiq raeujrubrub, heiqndang de homsangsang.

Daj seizhaenx hwnj, song de guh baenz gvanbaz, doxgyaez doxhuz gvaq ndwenngoenz.

Ngoenz ndeu, boux hakdoj dangdieg gwih max daiq bing gvaq gyang mbanj Daeglungz, yawjraen dahsauhanq, song da hix mbouj yaep, yawj ndaej maezmwdmwd. Boux hakdoj neix yawj dwk yawj dwk, sawqmwh ndang de unq lumj mbouj miz ndok nei daj gwnz max laemx roengz, gyoengq bing gibseiz rex de, de cij mbouj deng sieng.

Ngoenzhaenx boux hakdoj neix coh dahsauhanq camyah. naeuz swhgeij gaenq miz gvan, mbouj ei. Boux hakdoj neix ra daengz boux gvan Dahsauhanq Daeglungz, couh haep Daeglungz naeuz:“Mwngz ndaem gij naz gou, hanh mwngz ngoenzneix aeu cien rap haeuxrieng daeuj hawj gou, mboujnex, couh aeu yah mwngz daeuj dingj.”

Daeglungz gaenjgip dawz geij naed faen haeux mbauqngwzhau hawj haenx bae naz vanq. Ndaw naz sik- haek hwnj go’gyaj, go’gyaj yaep ndeu couh ok haeuxriengz, haeuxriengz hung lumj rieng vaiz nei, henjrwgrwg, haeux lai raeuh.

Boux hakdoj neix aeu bang max daeuj doz haeux, miz geij duz max doz daengz ga raek bae, haeux lij caengz doz liux.

Boux hakdoj neix lij gaemh- mengz naeuz:“Mboujguenj baenzlawz, ngoenzneix gou itdingh aeu dah- sauhanq guh yah. ”

Daeglungz naeuz:“Mwngz aeu aen yaenq guenfouj hawj gou dawz, mwngz cij ndaej daiq yah gou bae.”

“Hw, hw! Yaek aeu aen yaenq? Hawj de gonq, gou dawz dahsauhanq bae ranz gyaeng, gaenlaeng caiq baij bing daeuj ciengj aen yaenq dauq- bae.” Boux hakdoj baenzneix naemj, couh dapwngq Daeglungz lo, dawz aen yaenq gyau hawj de, angqvauvau gaemfwngz dahsauhanq maranz.

Byaij daengz dieg raengz laeg ndeu, dahsauhanq naeuz:“Gou roi gyaeuj ndei、 swiq naj seuq gonq, caiq guh yahmoq mwngz.” Boux hakdoj doengzeiq lo, couh cuengq fwngz de. Dahsauhanq byaij daengz henz raengz, sawqmwh diuq roengz ndaw raengz laeg bae. Boux hakdoj raen le, hix diuq roengzbae yaek gouq dah- sauhanq, gyoengq bing de raen hakdoj diuq roengzbae hix gaen dwk diuq,yaek gouq boux hakdoj.

Hoeng, boux hakdoj caeuq gyoengq bing cungj mbouj rox youz- raemx, youq ndaw raemx raengz cukcak yaep he couh deng caem roengz laj raemx bae lo. Dahsauhanq dwg duzhanq bienqbaenz, de rox youzraemx, youh rox mbin yaep ndeu. Diuq roengz ndaw raengz bae, de couh laeglemx mbin hwnj gwnzmboek lo.

Caiq gangj, Daeglungz ndaej aen yaenq le, couh bae ra dahsauhanq. Songde doxraen le, couh itheij byaij haeuj guenfouj bae. Daeglungz baengh aen yaenq gyangfwngz ndaej guh boux hakdoj, dahsauhanq couhdwg yah boux hakdoj lo.

Daeglungz dang hak le, de you beksingq dangdieg ndwenngoenz gvaq mbouj ndei, vih gyoengqvunz miz gwn miz daenj muengz bae muengz dauq, gyoengq beksingq cungj haenh de dwg boux hakdoj ndei.

Dahsauhanq