Youq Suhcunh gvaengh dieg 2 bingzfueng goengleix neix ndawde, benq ranz gaeuq de gvangq hung gyaeundei, doxgaiq dajcang、doxgaiq dinfwngz soqliengh lai raeuh caemhcaiq fouqgviq baizciengz, daiq miz vwnzva lizsij gyaenanz caeuq gojgaeq cienzgeiz ndeidingq, rom- comz vwnzva lai cungj lai yiengh, daiq miz suijbingz yisuz sang dangqmaz, engq ngamj yawjngonz caeuq mumaeq.

Suhcunh dieg youq Sizdangz Cin Lingzsanh Yen Ginhcouh Si, liz Hawsizdangz miz 2 goengleix gyae, ndaw gyaiq guenj 14 aen cunhminz siujcuj gungh 3578 vunz. Ndaw cunh seizneix miz gij ranz gaeuq Ciuh- mingz Ciuhcingh guh lumj funggek Lingjnanz haenx 32 benq, faenbied dwg gij ranzcoj singq Suh、Dingh、Liuz、Cwnz、Yangz、Luz、Cangh daengj gyokgyog, miz gij yiengh yinzvwnz funghmau dangdieg yienh- sag.

Riuznaeuz, aen cunh neix youq 460 bi gaxgonq, gyokgyog singq Suh sien daeuj gizneix dinghyouq, ndigah heuhguh Suhcunh. Gizneix dwg ranzmbanj boux mehmbwk maenh’ak Suh Samniengz. Suh Samniengz nyuenz singq Yangz, dwg boux lwgmbwk banh biengz sajbajheiq ndeu, dwknaqbiu naqnaq nyingz dawz, caeuq Suh Sanh baenzgya le, saekseiz caemh riengz Suh Sanh okbae hoenxciengq, de mbeilaux coengmingz, maenh’ak vifung. Gvan de Suh Sanh dwg bouxdaeuz Lingzsanh Denhdivei ndawde boux ndeu, de heuhcomz le aendoih nungzminz gijyi hung youh ak ndeu, cienmonz caeuq cwngfuj Ciuhcingh doiqdingj, hemq “bok bouxfouq bang bouxgungz, gaj bouxhak cuengq vunzfamh” bae hoenxciengq, ndigah ndaej daengz gyoengq vunzlai gungzhoj haeujcoengh. Gvaqlaeng Suh Sanh youq ciengz hoenxciengq ndeu deng vunz gai deng naq nyingz dai. Doeklaeng, Suh Samniengz daiq aendoih gyahaeuj Daibingzdenhgoz, youq baez nungzminz gijyi gwnz lizsij ceiq hung neix louz roengz yiebbuengj ronghlwenq ndeu. Daengz seizneix, gij gojgaeq de lij riuzcienz mbouj gat.

Suhcunh gyaeuj mbanj miz aen Huzlungzvaq ndeu, benq ranz gaeuq gaeuqgeq youhcaiq gag miz daegsaek ndeu couh daengj baiz youq henz huz, ciemq dieg 8000 lai bingz- fuengmij, caet aen laeuzrwzhu rin- hoiraiz cienrog、vaxdungzswj daepgaq gyoebbaenz. Ranz gaeuq dingzlai aeu rinhoiraiz guh caizliuh dajcaep nem dajcang, cang ndaej gyaeundei dangqmaz, miz rindeu、faexdeu、meng’va、gienghnaez baenjguh nem dozveh lai saek daengj, gij doxgaiq yisuz neix fapdeu sugsed、dinfwngz saeqnaeh,, dwg doxgaiq yisuz dijbauj. Benq ranz gaeuq cienheu vaxndaem doxingj, gokyiemh fungh mbin doxhen, rindeu gwnz ciengz cix dwg Suhcunh gag miz. Yiemhranz deu- gaek miz limq va’mbu, ndaw ranz miz rindeu、maxrin、daemzbyagim daengj dijbauj dangqmaz, yiengh- yiengh lumj caen, sengdoengh lumj lix. Benq ranz gaeuq neix dwg ranzcoj singq Liuz, Ciuhcingh co- nduj couh caep guh, daengz seizneix gaenq miz 400 lai bi lizsij, ranzdafuh、ranzswhmaj、ranzcouzyinj、ranzwyinj、Yinhcijdangz 5 benq ranz, gag baenz honghdauq caiqlij yiemhranz gungj- ndiengq doxciep. Baihrog ciengz cawz gyaek daih’it dwg ngauhsan soemmbat le, gizyawz gak gyaek cungj dwg ngauhsansoem dox- guenyaem song ngauh doxdoiq miz 4 mij lai sang haenx, dingj ngauh daengjsoem, song mbiengj gozgung nod roengz daengz byairieng loq ndiengq, yiengh lumj aenmauh boux hakfaenz Sung、Mingz song ciuh nei, comz saedyungh、sinjmeij、daiqeiq daengj goengnaengz youq giz ndeu. Ndaw ranz rog ranz, mboujlwnh dwg gij rindeu rinhoiraiz、faexdeu baenz ndaek haenx, nem gij doxgaiq dajcang meng’va、gienghnaez baenj- guh haenx, roxnaeuz dwg gij veh lai saek gwnz ciengz bingzmienh haenx, yisuz suijbingz cungj sang dangqmaz, ndaej lied haeuj gih raeuz buek daih’it aenmbanj cienz- doengj mingzloeg bae.

Suhcunh mboujdan dwg vwnzva lizsij louzce, de vaizlij lae miz gij lwed hongreihnaz vwnzmingz daj ciuhgeq daengz seizneix haenx. Bin hwnj Byacunghsiu ngaem yawj aenmbanj, caenhraen bya hop raemx heux, doenghnaz doenghreih, heu- swdswd homfwtfwt, ndaw mbanj hoenzfeiz ok heuq mbinyegyeg; najmbanj cien moux naz baenz benq, cien moux reih oij doxlienz; raeb- laeng aenmbanj ndoibo hwnjroengz lienz mbwn, cien moux maklaehcei lumj aenliengj baizlele. Miz vunz youq ndaw reihnaz gaenxmaenx guhhong, miz vunz youq ndaw mbanj nyaengq haeuj nyaengq ok, vunzlaux comz naengh youq bakdou ranz gangjgoj, lwgnyez saetsaet diuqdiuq guh’angq dem nauhyied, fuk doz bya raemx naz mbanj yiengh gingj gyaeundei ndeu ingj haeuj lwgda vunzraeuz…