Giuh Cinhih lwg mingzsingh iq Namzningz hwnj aen daizheiq 《Yied Daeuq Yied Simvuen》Huznanz Ginghsi caeuq gij cezmuz《Baiqdak Lo, Go Gou》《Saenqdaenh Daengx Ciengz》Gyanghsuh Cunghyi Binzdau. Mboengqneix gicej caijfangj seiz yawjraen, de cingq hagsib roq aen duix. Hoeng lauxsae de dwg goengda Veiz Cujyoz. Veiz Cujyoz dwg vunzdingjgangj yienghsiengq feihvuzciz vwnzva yizcanj Namzningz Si, de maqmuengh ndaej hawj bannomj laebdaeb cienz conzdungj caeuq vwnzva minzcuz.

1 Bingzveij okmingz baenz bouxmaez lwgnyez Namzningz

Giuh Cinhih mboengqneix hwnj aen daizheiq 《Yied Daeuq Yied Simvuen》, yienjciengq、 byaij yienj gvenqsug, hawj bouxyawj yienhciengz cungj haenh ndei, louz roengz yaenq- siengq gig laeg. Couh lienz bouxcujciz cezmuz Maj Goj hix nyaenx mbouj ndaej yienhciengz caeuq de doiq fwen. Ciuq cam rox, Giuh Cinhih dwg lwg mingzsingh iq daih’it Guengjsae hwnj aen daizheiq 《Yied Daeuq Yied Simvuen》.

Ginh Cinhih lij camgya le gij cezmuz《Baiqdak Lo, Go Gou》《Saenq- daenh Daengx Ciengz》 Gyanghsuh Cunghyi Binzdau. Cezmuz seiz, Ginh Cinhih yienjok ndei yawj, laebdaeb yungh gij funggek gig ndei haenx, youh ciengq youh diuq, yienj le hot 《Ciengginh Lingh》 gig ndei yawj he. De yienjok ndei yawj, ndaejdaengz bingzveij、 bouxyawj yienhciengz haenh ndei, lienz bingzveij yienh- ciengz hix hemqheuh gaenq baenz le bouxmaez Cinhih iq.

2 Dinjdet song ndwen ndaej yungh duix yienj go

Gicej daeuj daengz Nanzhuz Gunghyenz Namzningz ra raen Giuh Cinhih. De ndaej haenh baenz miz faj naj iqet lumj Sung Cunggih nei, doengzcaez youh ndaej haenh baenz “Cangh Gez iq godanz”. Gicej raen de seiz, de cingq ciep aeu gouh dawh “saenzgeiz” ndaw fwngz goengda Veiz Cujyoz haenx, ndaej daengz goengda caenhsim sonyinx, yungh 14 aen duixmeng bujdungh roq ok gij yaem- wenq ndei dingq. Ginh Cinhih baez youh baez nyinhcaen lienh, Veiz Cujyoz itmienh daezsingj daeglan “aeu haeujsim saeknaj, lij miz aeu doxswnj……”, itmienh naihsim gangjgej moix dieg diiq. Song boux de biujyienj roq duix yinx ndaej haujlai vunz gvaq loh, gyoengqde foenfoen dingz din roengzdaeuj yawjngonz、 ingjsiengq.

Gicej cam Ginh Cinhih roq duix hoj mbouj hoj, “gou roxnyinh mbouj hoj, aenvih gou itloh naemj hag, hoeng gou seizneix lij caengz ak geijlai.” Ginh Cinhih lwnh gicej, daj iq couh ciengzseiz raen goengda yienj roq duix, yawj aen duix bujdungh cix roq ok ndaej yaem’wenq ndei dingq, neix hawj Ginh Cinhih roxnyinh gig saenzgeiz. Yienghneix mboengqneix, de hainduj riengz goengda hag roq duix. Dinjdet song ndwen seizgan, Ginh Cinhih gaenq nyinh cinj moix aen yinhgai, caemhcaiq yienj ndaej 《Nyez Lwggyoux》 daengj go. Hoeng, Cinhih iq doiq gij cingzcik baenzneix lij caengz habhoz. “Simsenz bonjfaenh seizneix lij iq lai, naengzlig caengz gaeuq, mbouj ndaej lumj goengda nei baenzneix gvenqsug. Gou naemj hag cungj yienj fap gig vaiq haenx, gou naemj caj gou majhung le couh hag ndaej lo.” Ginh Cinhih gagsaenq naeuz.

3 Roq duix gizsaed mbouj genjdanh

Yienznaeuz yawj hwnjdaeuj neix mboujgvaq dwg 14 aen duix bujdungh hung iq mbouj doxdoengz, hoeng moix aen cungj dwg dandog mbouj miz aen daihngeih, dieg baijcuengq hix haemq gyangjgiu. “Baeznaengz yienj roq doenghgij duix neix cungj dwg baenzneix cuengq, goengda naeuz diegvih mbouj ndaej luenh doengh.” Yienzlaiz, bihaenx mbat seizgei dingjlingz he, Veiz Cujyoz goengda Ginh Cinhih gagcaux le yinhyoz minzcuz roq duix, yungh dawh roq 14 aen duixmeng, roq ok yaem’wenq ndei dingq. Veiz Cujyoz gaisau naeuz, aen duix he doiq aen yinhgai he, duixmeng aeu baij baenz ngaeugoz, yienghneix gij sing roq okdaeuj de cix miz gyae miz gyawj, caiqlij duixmeng baij doxgyawj lai, aenvih hoizyaem ndaej yingjyangj daengz gij sing’yaem aen duix henzgyawj.

“Lwgnyez itbuen yienj roq 14 aen duix couh ndaej lo, hoeng ciuq gij nanzdoh go caeuq yinhyiz gvangq mbouj doxdoengz, miz mbangj go aeu 20 aen duix.” Veiz Cujyoz lwnh gicej, aenvih moix aen duix cungj mbouj doengz, daj bi 2002 laemxsim yenzgiu roq duix hainduj, de byaij gvaq haujlai bouqcauhsi、 bouq- diemq, roq gvaq haujlai aen duixmeng bujdungh, cungjsuenq ra ndaej dauq duixmeng he sing’yaem gih- bwnj habngamj. Seizneix, de cingq ra bouxswnjcienz roq duix. De maq- muengh dawz monz dinfwngz neix cienz hawj daeglan Ginh Cinhih.

4 7 bi seiz dajveh hai aenhoih yienjciengq he

“Gou dwg vunzdingjgangj yienghsiengq feihvuzciz vwnzva yizcanj Namzningz Si, miz cwzyin aeu mbangj doxgaiq feihvuzciz vwnzva swnjcienz roengzbae.” Veiz Cujyoz naeuz. Veiz Cujyoz ndaej bingz baenz vunzdingjgangj yiengh- siengq feihvuzciz vwnzva yizcanj Namzningz Si gvaq. Baengh gij ndiepgyaez yinhyoz, gag hag baenz caiz, de mboujdan gagcaux le yinhyoz minzcuz roq duix, lij rox boq mbawfaex、 dig、 danz ganghginz、 denswjginz、 rag ngeihyienz daengj cib lai cungj gyonglaz gimzyienz. Youq neix gaxgonq, de gaenq son’gyauq le geij boux hagseng maenhndei, aeu gij dinfwngz boq mbawfaex swhgeij swnjcienz roengz- bae.

Caijfangj seiz, Veiz Cujyoz lij dawz geij mbawfaex gwnz daiz biujyienj hwnjdaeuj, boq ok gak cungj yinhfuz. Cawz roq duix, Veiz Cujyoz lij muengh aeu huzluzswh、 dig daengj dinfwngz ndawbiengz cienz hawj daeglan.

Ginh Cinhih lij caengz ndaej 7 bi haenx seizneix dwg boux hagseng it nienzgaep Binhhuzlu Siujyoz Namzningz he, danghnaeuz camgya hozdung riengz mbouj hwnj goenggoq, de gagrox yungh seiz- hoengq boujhag goenggoq. Gangj daengz gij siengjmuengh coglaeng, Ginh Cinhih lwnh gicej naemj hag doxgaiq gig lai. “Gou lij aeu hag dengizdah, lij naemj riengz goengda hag boq mbawfaex, caj daengz 7 bi seiz, gou dajveh hai aenhoih yienjciengq he……”

Gangj daengz gij siengjmuengh swhgeij, Giuh Cinhih lij gig gagsaenq naeuz:“Gou gyaez ciengqgo, aen siengjmuengh gou dwg dang boux hai feihgih rox ciengqgo he. Gou youq gwnz feihgih ciengqgo, mbin daengz gak dieg, yienghneix vunzhung caeuq lwgnyez gak dieg cungj dingq ndaej daengz singgo gou.”