Seiziq, vunz ndaw mbanj bouxboux cungj dwg youq ranzmbanj guh reihnaz, mbouj miz saek boux vunz ndaej byaij ok ranzmbanj gunghcoz. Dwg Sawcuengh, hawj gou ndaej byaij ok ranzmbanj, ndaej byaij bae yawj seiqgyaiq engq gvangqlangh.

Daj iq gou couh gig gyaez doegsaw, hoeng aenvih ndaw ranz gungz, gou youh dwg dahsau hung. Youq baihlaj gou lij miz 5 boux daegnuengx dahnuengx. Gou ngamq doeg cuhcungh seiz, daxboh couh miz cungj siengjfap ndeu: Daengz gou doeg sat cuhcungh, couh maqmuengh gou ma ranz bang bohmeh guh hong. Hoeng, daxmeh gou yawjraen gou coengmingz lingzleih, youh gyaez doegsaw, couh hawj gou laebdaeb doeg. Cijaeu gou roengzrengz gauj ndaej okbae, itdingh siengj banhfap soengq gou doeg.

Doeklaeng gou gauj ndaej hwnj gauhcungh. Youq seizhaenx, ndaw mbanj lij mboujcaengz miz bouxlawz ndaej doeg gauhcungh. Gou dwg ndaw mbanj daih’it boux gauj ndaej hwnj gauhcungh. Yienznaeuz seizhaenx ndaw ranz liz hagdangz miz 16 goengleix gyae, youh mbouj miz ci naengh, hoeng gou moix aen singh- gizroek cungj byaij ma ranz bang bohmeh guh hong, daengz ngoenz- singhgiz banringz youh daj ranz byaij 16 goengleix bae hagdangz.

Seizhaenx, gou mbouj rox Sawcuengh dwg maz, caemh mbouj rox gwnzbiengz lij miz Sawcuengh cungj cihsaw neix. Ndaw sim gou cij naemj roengzrengz doegsaw, aeu gauj hwnj dayoz, mbouj hawj daxboh daxmeh saetmuengh. 1984 nienz gou camgya gauhgauj, gauj hwnj Gvangjsih Sawcuengh Yozyau. Seizhaenx, ndaw mbanj vunz yienznaeuz mbouj rox aen yozyau gou gauj hwnj dwg maz, hoeng cungj rox gou gauj ndaej dayoz lo. Daxboh daxmeh roxnyinh miznaj, riu dwk haep mbouj hwnj bak. Seizhaenx, ndaw sim gou hix mbouj rox bae dayoz hag maz, bizyez okdaeuj youh ndaej bae guh maz. Gou bae cam lauxsae gauhcungh, gyoengqde hix gangj mbouj ok.

1984 nienz 9 nyied, daxboh soengq gou naengh ci bae Vujmingz. Daeuj daengz yozyau, gou cij rox gou aeu hag Sawcuengh, bizyez le aeu ma daengz minzcuz siujyoz ndaw yienh bae son Sawcuengh. Hwnjdangz lo, lauxsae hainduj son singmeh、yinhmeh caeuq singdiuh. Seizhaenx gou cij rox yienzlaiz Vahcuengh hix ndaej yungh cihmeh gyoepsij okdaeuj. Daiq geizheih lo! Youq yozyau gou gig nyinhcaen hag Sawcuengh. Miz di singmeh vahranzmbanj mbouj miz, lumjbaenz “mb、nd、r、ngv”gij aen singmeh neix, gou couh fanfan foekfoek doeg, doeg geij bak mbat cij hag rox baenzlawz fatyaem. Youq hag song bi, gou hag rox Sawcuengh, gij Sawcuengh hawj swnghhoz gou demlai haujlai vuenyungz.

Bizyez gou couh ma daengz ndaw yienh minzcuz siujyoz son Sawcuengh caemhcaiq son Sawgun. Doeklaeng youh diuh daengz minzcuz cunghyoz son saw. Yienznaeuz gou youq minzcuz cunghyoz cujyau son cwngci, hoeng gij hagseng daj minzcuz siujyoz hwnjdaeuj, moix aen singhgiz hix aeu hwnj ciet goq Sawcuengh. Gyoengq hagseng Sawcuengh hix gig gyaez hag.

Vih hawj gyoengqde hag ndaej engq miz yinxdaeuz, gou couh ciengzseiz dawz 《Gvangjsih Minzcuz Bau》 doeg hawj gyoengqde dingq. Faenh bauqceij neix miz haujlai cozvwnz dwg hagseng cungh siujyoz yungh Sawcuengh sij gij hagsib swnghhoz henz ndang gyoengqde, doeg daeuj gig caenciet caeuq caensaed. Gou gujli gyoengq hagseng hix yungh Sawcuengh sij cozvwnz. Hagseng baez sij ok gou couh yawjyawj, bang gyoengqde gaij gij cih sij loek, gaij ndei le couh bang hagseng douz hawj 《Gvangjsih Minzcuz Bau》. Geiq ndaej youq 1997-2002 geij bi haenx, gij hagseng gou son youq 《Gvangjsih Minzcuz Bau》 fatbiuj miz cibgeij bien cozvwnz aeu Sawcuengh sij. Seiz- haenx, moix bien cozvwnz fatbiuj hagseng ndaej 30-40 maenz cienz- sijgauj, bang hagseng ra di ngaenz bangbouj swnghhoz, gou caeuq hagseng cungj gig angq. Hagseng yawjraen gij cozvwnz swhgeij ndaej fatbiuj, doiq hagsib engq miz saenqsim, engq roengzrengz bae doegsaw, hawj gyoengq hagseng caeuq lauxsae mbouj rox Sawcuengh haenx hozhaenz raixcaix.

（caengz sat）