Miz duz roegyengj ndeu, de bak- lai raeuh, mboujguenj maz saehcingz, de cungj “vala vala” gangj ndaej mbouj dingz.

Miz ngoenz ndeu, ndaw ndoeng- faex hai aen hoih doeg sei, roeg- dinghgeng doeg souj sei dinj ndeu, youh cingcuj youh ndeidingq, daihgya dingq le cungj dopfwngz hwnjdaeuj, roeggyaeujhau daxgoeng lij haenh de dem. Roegyengj couh mbouj angq lo, naeuz:“Neix miz maz ak lai, gou hix rox!”

Youh miz ngoenz ndeu, doih douqlwg ndeu youq ndaw ndoengfaex guh yahndoj, lwgdahoengz、dujrwz- raez、diuzriengdinj…… Gyoengqde bouxboux cungj ndoj hwnjdaeuj, hawj douqlwg mong bae ra. Douqlwg mong ra ha ra ha, duz ndeu hix ra mbouj ndaej.

Seizneix, roegyengj cingq dingz youq gwnz gofaex sangngaungau ndeu, gigi caca dwk gangj:“Douqlwg mong dwg vunzhuk! Gyoengqde ndoj youq gizlawz, gou gyonj rox. Lwgdahoengz youq ndaw caz rum, dujrwzraez youq ndaw congh, diuzriengdinj youq baih- laeng ndaek rin……”

Lwgdahoengz、dujrwzraez、diuz- riengdinj dingq roegyengj baenzneix gangj, gyonj buet okdaeuj lo, ndawsim gig huj:“Roegyengj caen baklai! De cungj gangj okdaeuj lo, lij ra maz! Mbouj guhcaemz lo, mbouj guhcaemz lo.”

Douqlwg mong naeuz:“Raeuz gaej caeuq roegyengj youq giz ndeu, daengz dieg wnq bae guhcaemz.” Gangj sat, couh daiq gyoengq douqlwg buet deuz lo.

Miz ngoenz ndeu, ndaw ndoeng- faex hai hoih ciengqgo. Roegyengj ciengq le souj go ndeu, de ciengq:“Roegyengj, roegyengj, caen coeng- mingz.” Daihgya dingq le riuhaha, cungj naeuz:“Swhgeij gangj swhgeij coengmingz, caen hojguh!”

Ciepdwk, roeghenj hix ciengq hwnjdaeuj:“Roeghenj iq, gyaez hag- sib.” Daihgya dingq le cungj dopfwngz.

Roegyengj gig ndatheiq dwk gangj:“Neix miz maz ak lai! Gou caiq ciengq souj ndeu.” De youh “vala vala” ciengq hwnjdaeuj.

Daihgya hemq dwk:“Mbouj yungh mwngz ciengq, mbouj yungh mwngz ciengq! Dou mbouj siengj dingq.” Roegyengj remjnaj ndaej cij- ndei mbin deuz lo.

Mbouj geij nanz, ndaw ndoeng- faex daeuj duz manaez mong ndeu, raen doenghduz iq couh haeb, daihgya cungj haemz de dai bae, couh youq itheij siengj aen banhfap daeuj doiqfouq de. Gyoengqde youq henz roen vat aen gumz laeg, baihgwnz gaq ngafaex, aeu nyangj hoemq hwnj, youq gwnz nyangj caiq hoemq gij namh. Loeglwg、lingzlwg、duzcenh ndoj youq ndaw caz rum. Douqlwg youq gwnz diegnywj guhcaemz, yinx duz manaez mong gvaqdaeuj.

Yaep he, duz manaez mong daeuj lo, douqlwg doq coh hongx gyoengqde guh buet bae. Duz manaez mong doq gyaep, yaek gyaep daengz henz gumz, sawqmwh roegyengj hemq hwnjdaeuj: “Manaez daeuj lo! Daihgya vaiq bwh rin ndei, caj de doek haeuj ndaw hongx bae couh dub de dai.”

Duz manaez mong baez dingq, hwk ndaej simdiuq, caiq hix mbouj gamj gyaep douqlwg lo, cienq ndang couh buet.

Douqlwg、duzcenh、duzlingz、loeglwg cungj huj ndaej hoz yaek dek: “Roegyengj, roegyengj, mwngz baenz- neix baklai, byawz nyienh caeuq mwngz youq itheij guhcaemz ne?”