Suenq lo, gwn ba, baezneix itdingh daengq lauxbanj gou mbouj coq manh, wnggai gwn ndaej roengz ba! Hoeng lauxbanj mbouj coq manh couh mbouj rox guh faenjsae lo, baezneix ndaw vanj lij dwg miz di manh, raemxdang hoengzdwgdwg. Byawz rox, faenj baez haeuj bak, dai lo! Hanh、raemxda caeuq mug couh lae roengz huhu, gou roengzrengz bae gwn amq daihngeih, hoeng baenzlawz cungj ndwnj mbouj roengzbae, daengx fajnaj hix ndingfwgfwg.

Gobiujngeih raen mbouj deng lo, couh cam gou:“Baenzlawz la? Mbouj dwg manh lai ba?” Gou ngaekngaek gyaeuj, gobiujngeih lij siengj bae cawx vanj mbouj manh hawj gou cimz, hoeng, gou dai cungj mbouj haengj. Doeklaeng, faenjsae gou couh roengz ndaw dungx gobiujngeih bae lo. Gvaqlaeng, gobiujngeih danqheiq naeuz:“Ai! Gwn mbouj ndaej manh, caen hojsik lai lo, haujlai gijgwn cungj aeu miz manh cij ndei gwn.” Gou ndawsim hix gag ngeix, mingzmingz couh ngamq dwk roengz di manh ndwi, vihmaz baez gwn lij baenzneix manh ne? Baezlaeng caen mbouj gwn lo!

Doeklaeng gou youq Namzningz doeg dayoz, gizneix bouq faenjsae engq lai, doengzhag maij gwn faenjsae hix engq lai lo, mwngz yawj, ndaw suzse dou gouj boux vunz couh miz bet boux maij gwn faenjsae! Gyoengqde rox gou mbouj haengj gwn faenjsae seiz, hix gangj hojsik nyauznyauz. Miz boux doengzhag ndeu doiq gou naeuz:“Mwngz mbouj haengj gwn faenjsae dwg aenvih de manh lai ba? Yienghneix, baezlaeng mwngz caeuq gou bae gwn, ngamq hainduj gwn couh cuengq noix di manh, gizneix mbouj lumj Liujcouh, di manh neix mwngz haengjdingh gwn ndaej.”

Yawj gyoengqde gwn ndaej baenzneix feih, gou couh ei de youh bae sawq baez moq. Couh lumj de gangj, youq Namzningz gou gwn ndaej di manh ndeu dahraix, hix hainduj raen faenjsae ndei gwn lo, baez bae baez dauq, gou gwn faenjsae hix mbouj miz maz geizheih lo.

Hoeng, dayoz seiq nienzgaep bihaenx, gou youh gangj “mbouj caiq gwn faenjsae” coenz vah neix lo. Ngoenzhaenx, gou siengj bae cawx faenjsae ma gwn, Siujmungz hix siengj gwn, couh heuh gou bang de cawx. Bae daengz bouq faenjsae, gou naeuz mehlauxbanj gou aeu song vanj faenjsae, de riengjret dwk bang gou dajbau ndei, gou dawz mbaw ngaenz 20 maenz ndenq gvaqbae hawj de couh baenqdauq.

Ngamq byaij geij yamq, gou couh geiq hwnj mehlauxbanj caengz bouj ngaenz hawj gou, gou byaij dauq bouq faenjsae gangjmingz cingzgvang. Hoeng, mehlauxbanj ganvad lai lo, dai hix mbouj nyinh de caengz bouj. Gou naeuz:“Song vanj faenj 9 maenz, gou hawj mwngz 20 maenz, mwngz wnggai bouj hawj gou 11 maenz, buhvaq gou youh mbouj miz daeh, danghnaeuz mwngz gaenq bouj hawj gou, gij ngaenz mwngz bouj wnggai youq ndaw fwngz gou ha. Hoeng, ndaw fwngz gou cungj mbouj miz saek maenz, nanzdauh gou lij vut bae ha?” Gou gangj dwk hozhat liux, mehlauxbanj hix mbouj ok hing, ngaenz hix mbouj bouj hawj. Caen ndatheiq ha, baezneix gwnvi lo, mehlauxbanj vaih lai, gou baezlaeng caiq mbouj gwn faenjsae lo!

Bizyez ra ndaej gunghcoz, miz ngoenz ndeu, baengzyoux rag gou bae aen bouq faenjsae ndeu, de doiq aen bouq faenjsae neix haenh bae haenq dauq, bak cungj mbouj daengx. Gou youh lumz gij vah mwhgonq gou gangj gvaq lo, gig angq dwk aeu vanj faenjsae caeuq aen nohgamou ndeu. Byawz rox, faenj caengz haeuj bak, couh miz duz nengz youh hung youh heu youh ndongqliklik ndeu mbin roengz vanj faenj gou bae, lij youq ndaw raemxdang sangj bae sangj dauq dem! Dai lo! Baezneix maz cungj mbouj siengj gwn lo, gou caeuq faenjsae caen mbouj miz yienzfaenh ha.

Hoeng, mbouj geij nanz gou youh bae bouq faenjsae gwn faenj lo. Sim gag ngeix: Faenjsae gizsaed ndei gwn dahraix, hawj vunz gwn le youh siengj gwn.

(sat)