Mbanjnaznganz Majbang Yangh Sihlinz Yen, dieg youq diegbya funghgingj gyaeundei、mbwnraeuj ngamj vunz youq haenx. Gyoengq beixnuengx Bouxcuengh ndaw mbanj gwndaenj youq ndaw laeuzfaex yiengh “ganranz” gaeuqgeq, fungsug sibgvenq、ndangdaenj caemh cungj louzmaenh yiengh daegsaek cienz- doengj, gijneix mboujdan yinx le haujlai hekyouz bae ngonzyawj youzcet, vanzlij yinx le haujlai lauxhangz damqcoj caeuq bouxmu minzsuz bae daengz ndaw mbanj damqcaz mumaeq.

Mbanjnaznganz youq baih- saebaek Majbang Yangh, dwg aen Mbanjcuengh gyaeundei depgyawj ranghfai Denhswnghgyauz Suij- dencan—Huzfanhbya ndeu, miz 120 ranz 576 vunz, ndaw mbanj miz 120 aen laeuzfaex “ganranz” Bouxcuengh Ciuhmingz Ciuhcingh guh haenx, lij louzce miz gij baijbouh aenmbanj “ranzranz doxlienz、honghhongh doxdoeng” ciuhgeq aeu daeuj re caeggeq dingj bing’ep haenx, dwg Guengjsae raeuz aen mbanj gaeuq Bouxcuengh louzce ndaej ceiq ndei、gvaenghgvaengz ceiq hung ndeu, baenzneix, gij ranzlaeuz “ganranz” haenx ndaej lauxhangz ndaw guek rog guek naeuz dwg “ranzcaep biuceiq- singq Bouxcuengh Guengjsae”“aen Mbanjcuengh daih’it Guengjsae”.

Ciuq vunzlaux ndaw mbanj lwnh naeuz, Mbanjnaznganz laeb mbanj gaenq miz 1000 lai bi lizsij, vunzcoj ndaw mbanj dwg gij lwglan Guekgouhdingh ciuhgeq, vunzmbanj simsoh gaenxhong, seizneix lij louzmaenh gij fungsug sibgvenq ciuhnduj Bouxcuengh, vunzvunz rox doxgiet doxbang. Daengx mbanj miz 140 vunz rox eu gij fwen diuh Dahcinghsuij lohbaek Bouxcuengh, 103 vunz rox aeu mbawfaex boqngon diuhfwen, 180 vunz rox yungh 120 aen congzdaemjrok daemj gak cungj baengzdoj roxnaeuz nyibguh ndangdaenj Bouxcuengh, 285 vunz rox cawj byaekyiengh daegsaek Bouxcuengh. Youq seizneix vwnzva baihrog nyoenx haeuj mbanjbya ndawde, vunzmbanj vanzlij louz- maenh gij fungsug sibgvenq daemj baengzdoj、daenj buhbaengzdoj、gangj Vahcuengh、eu fwen、hengz fungsug gaeuq, caiqlij haujlai fungsug sibgvenq cungj caeuq “Guekgouhdingh ciuhgeq” gwnz lizsij miz lienzhaeh gig youqgaenj de, gij ndangdaenj minzcuz cienzdoengj vunzmbanj ndaej naeuz dwg “yiengh daiqbiuj denjhingz ndangdaenj Bouxcuengh Guengjsae”. Gij fwen Mbanjnaznganz ndawde haemq okmingz miz 《Fwen Ndaemreih Ndaemnaz》《Fwen Siuqseuj Lab- nyumx》《Fwen Guhranz》《Fwen Laeuj》doenghgij neix, fapmo ndawde miz 《Diuh Laebfan》《Diuh Daejgeq》《Diuh Hairoen》《Gingq Megdeih Lungzsaenz》daengj, dwg “swhliu lizsij lix” damqmu Bouxcuengh gak dieg Guengjsae.

Mbanjnaznganz youz Baqnamz、Bomajhauh、Siujcai daengj 3 goengq bya gyoebbaenz, laeuzfaex “ganranz” couh doxing doxbaengh dwk guh youq gwnz dingjbya, najranz laeng- ranz lij maj miz 89 go faexgeq cien bi, sang’vid raemhrwd, mbangj rag buenz doen camca, mbangj doxgot doxumj, mbangj doxdoiq daix maj, gienjgyoeb baenz aen dem aen “doufaex” 、 doiq dem doiq “faex gvanbaz”, gyoebbaenz aen youh aen gingjsaek gyaeundei yinxvunz. Gyoengqvunz ndaw mbanj lauxnyaeq mbwksai gwndaenj youq ndaw vanz- ging hai dou raen goengqbya heu faexcuk loeg, diemheiq youq ndaw roeg swenj va hom, yietnaiq youq ndaw rungj youz bya heu、diuzrij、laeuzfaex、ndoengfaexcuk、naz- mbaeklae、faexgeq gyoebbaenz haenx, simsangj cwxcaih, angqyangz vuenyungz, hawj vunz hozhaenz.