Mbwk:

Ienq bohmeh lauxcauj,

Aeu gim bae boiq diet.

Bae haq mbouj doiq dieg,

Genbuh uet raemxda.

Numj ndaej youh gwnheiq,

Aeu nyawh bae boiq rin.

Sim dahlwg nanz angq,

Hoeng bohmeh mbouj dam.

Sai:

Lwg gaej ienq bohmeh,

Goj gyoengqde miz nanz.

Baehaq mbouj doiq dieg,

Caengz haq baenzlawz rox.

Ndwenngoenz raezrangrang,

Gaej doeknaiq yousim.

Baenz haz rox baenz haiz,

Doeklaeng menhmenh niemh.

Mbwk:

Yamqdin ok bakdou,

Rim dungx cungj dwg vei.

Bouxgvan caengz raen gvaq,

Siengj daengz youh doeknaiq.

Bohmeh mbouj caiq swt,

Daileix cungj caih gou.

Miz ranz nanz dauqbae,

Vah ienq gangj mbouj ok.

Sai:

Ndwenngoenz vanzlij cuenh,

Gaej sim luenhvanvan.

Aen sim caux gyaranz,

Cungj miz hanz rap gyangj.

Boh haq lwg baenzgya,

Baenaj couh miz muengh.

Gvaq yaep couh daengz cou,

Sinhoj mbouj geij nanz.

Mbwk:

Yamqdin ok doenghnaz,

Mingh maz nyaenq lai couj.

Gaenx hong vuenh demsou,

Gwnzmbwn mbouj hawj maez.

Geij ndwen mbouj doek fwn,

Gip ndaej raemxda lae.

Haet ok haemh cij ma,

Daengz byai cungj baenz byouq.

Sai:

Dienheiq baenz yienghneix,

Souhhoj hix gaej gyangz.

Aensim caux gyaranz,

Rap naek youq gwnz ndang.

Youq rog bae dajyinh,

Rox ban duzmaz lawh.

Ndaemnaz mbouj ndaej sou,

Aeu ngeix guh gijwnq.

Mbwk:

Mbouj nyienh youq lajdeih,

Daeuj seiq neix aemq coh.

Deng gwnvi daiq lai,

Souhhoj cou dem cou.

Souhnanh cin youh cin,

Gag ienq mbwn ienq deih.

It ngoenz dangq sam cou,

Byaij cungj mbouj doiq loh.

Sai:

Daengq nuengx gaej caiq ienq,

Lauxbeix gienq song coenz.

Seiqgyaiq faen mbouj bingz,

Mbouj gag mwngz ndwi nuengx.

Bajfwj youq gwnzmbwn,

Rumz daeuj de couh biu.

Ndaw bya cien fanh moeg,

Miz go doek gwnz rin.

Mbwk:

It baema daengz ranz,

Sim gag fanz gag luenh.

Dauq cuengq din fouz giz,

Baenzyiengh sim mbouj fouz?

Ienq mingh caen mbouj ndei,

Gwnheiq bingh haeuj ndang.

Nuengx baenz lwg byadoj,

Souhhoj ndaw raemx cuenq.

Sai:

Gwn haemh baema ranz,

Gaej gag fanz gag luenh.

Sinhoj mbouj ciengxlwenx,

Vit simnyap daengz laeng.

Roeg deng gimq aen loengz,

Fwed mbouj lumz mbin hwnj.

Vah danqnai song coenz,

Hawj nuengx dauq gag siengj.

（sat）