Daeggvai lij doeg siujyoz roek nienzgaep seiz, gig maij Lij lauxsae. Lij lauxsae son Yijvwnz, bouxvunz gig simndei, dayoz bizyez ngamq daeuj aen hagdangz ndaw luegbya neix gunghcoz.

Seizde, ndaw hagdangz mbouj miz cingjraemx, gij raemxgwn gyoengq lauxsae aeu bae aen mboq liz hagdangz miz leix loh gyae aeu. Daeggvai ciengz bang Lij lauxsae bae doz raemx、gvak suen、rwed byaek daengj. Aenvih de rox Lij lauxsae miz vwnzva, daengzcog itdingh swngguen. Lij lauxsae hix gig maij Daeggvai, de rox ranz Daeggvai hoj, ciengz bang de cawx bit cawx sawbouh. Mizseiz, lij nyegvaih gag son de. Song boux gig doxhuz.

Doeklaeng, lauxsae yunghsim son, Daeggvai haenqrengz hag, Daeggvai cingzcik yied daeuj yied ndei. Cib bi gvaqbae lo, Daeggvai dayoz bizyez lo. Bihaenx, Daeggvai bae gauj gunghvuyenz. Bizsi sat, cingzcik Daeggvai baiz mingz daih- ngeih. Danghnaeuz mensi mbouj miz maz vwndiz, Daeggvai wnggai ndaej dang gunghvuyenz lo. Baezneix yaek aeu 5 boux vunz. Ngoenz he, Daeggvai caeuq 7 mbauqsau bae mensi. Daeg- gvai gig angq byaij haeuj gaujciengz, de baez yamq haeuj dou couh doeksaet lo, byawz rox Lij lauxsae dwg mensi bingzveij. Song boux de baez raennaj couh doxgot hwnjdaeuj.

Mensi sat, Daeggvai cingj Lij lauxsae bae gwn laeuj. Lij lauxsae hix mbouj guhhek. Song boux de youq ndaw diemq gwn ndaej haemq nanz. Danghnaeuz yah Lij lauxsae mbouj daeuj heuh Lij lauxsae baema, Lij lauxsae couh fiz youq ndaw diemq lo.

Dauq ranz lo, Daeggvai gig angq lwnh gij saeh neix hawj vunz daengx ranz nyi. Gyoengqde vuenheij raix- caix, riu naeuz:“Miz vunzgveiq bang, haengjdingh ndaej lo……” Hoeng Daeggvai deq daengz myaiz miz feihhaemz bae, hix mbouj raen miz siusik ndei. De gip ndaej lumj duzmoed youq gwnz cauq remj nei.

Ngoenz he, Daeggvai dawz di huq ndei bae ra Lij lauxsae. Daengz le, Lij lauxsae mbouj youq ranz. Yah Lij lauxsae dawz fung saenq ndeu daeuj gyau hawj de, naeuz:“Lij lauxsae daengq gou, naeuz naengh mwngz daeuj, couh hawj mwngz, mbaw saw dunghcih youq ndawde. Gij huq mwngz dawz daeuj gou mbouj aeu, mwngz dawz dauqbae.”

Raen naeuz ndaej dunghcih, Daeggvai angq ndaej yaek fwngz foux din diuq hwnjdaeuj. Yah Lij lauxsae mbouj sou huq de, de couh dawz dauq. Yah Lij lauxsae baez haepdou, de sikhaek vaiq byaij roengz laeuz, daengz laj gomienz he naengh ndei couh cek saenq daeuj yawj:“……Mwngz lij geiq ndaej mwngz doeg roek nienzgaep seiz ba, mwngz naeuz ranz mwngz ciengx miz gaeqdoj, miz gyaeqgaeq gai, gou coh mwngz cawx 100 aen. Gizsaed ranz mwngz mbouj ciengx saek duz gaeq, mwngz bae gwnz haw cawx aen gyaeq ndeu 5 gak dauq, gai hawj gou aen ndeu maenz ngaenz he. Doeklaeng, mwngz bae doeg cuhcungh le, lij baenzneix yaeuh gvaq geij boux lauxsae. Hoeng, seizhaenx dou mbouj ok sing, mbouj hongz mwngz, lau mwngz rox le mbouj caiq gaenx hag. Lij iq caeg cim, majhung caeg gim. Seizneix naengh aeu mwngz guh gunghvuyenz, lau mwngz doeklaeng miz gienz le engq dam, baenzneix hix dwg haih guekgya haih lwgminz haih mwngz bw. Vih neix, baezneix couh suenq lo, baezlaeng caiq gangj ba……”

Daeggvai yawj saenq caengz sat couh ngunh youq laj gomienz lo. Gwnz faex vamienz hai hoengh, roeg’a swenjgya’gya, lumjbaenz byaep Daeggvai.