Gangj daengz faenjsae, gou gag nyinhnaeuz guek raeuz mbouj miz geijlai vunz mbouj rox. Faenjsae dwg gijgwn mizmingz Guengjsae Liujcouh, miz gij feihdauh daegbied soemj、manh、singjsien、sangj、ndat. De aeu faenjhaeux unqraeuh sangjbak Liuj- couh gagmiz, gya roengz rangzsoemj、raetmoegngaex、duhdoem ceuj、naeng daeuhfouh cauq、byaekheu daengj boiqliuh caeuq raemxdang nohsae manh doxgyaux guh baenz. Aenvih feihdauh singjsien geizheih, hawj vunz gwn liux lij siengj gwn dem. Seizneix, vihliux habhoz bouxgwn engq lai, faenjsae hix ciuq sim’eiq bouxgwn boiq miz haujlai saejdaeuz, lumjbaenz daeuhfouh cauq、nyaujbit、nohgamou daengj.

Gou mbouj dwg vunz Liujcouh, mbanjranz gou youq Cingsih diegbya gyae’gyae, aenvih liz yienhsingz gyae lai, gou daengz yienhsingz doeg gauhcungh cij rox faenjsae gij doxgaiq neix. Caeuq seizneix doxdoengz, hagseng cungj mbouj haengj gwn haeuxbyaek ndaw sizdangz hagdangz geijlai, moix aen singgeiz cungj miz donq song donq youq rog hagdangz gwn roxnaeuz daj rog cawx dauq gwn. Gijgwn gyoengq doengzhag cawx dauq gwn dingzlai dwg faenjsae.

Mwhhaenx gou caengz ndaej gwn gvaq faenjsae, ndigah gou raen geizheih dangqmaz, hoeng cix mbouj cam gyoengqde gvaq gij faenjsae miz maz ndei gwn. Miz baez ndeu, boux doengzhag ndeu naengh youq henz gou gwn faenjsae, gij yiengh de couh lumj gwn gij doxgaiq dai hix dij nei, gou yawj le caen nyaenx mbouj ndaej lo, gietdingh banhaemh roengzdangz couh okbae cimzcimz. Roengzdangz le, gou ndoj haeuj ndaw gyoengq doengzhag ninzgwn youq rog, laeglemx buet ok hagdangz bae, baezneix dauqdaej ndaej gwn faenjsae baez ndeu lo, yawj gyoengq doengzhag baenzneix maez de, wnggai ndei gwn ba!

Byaij daengz bouq faenjsae, moix vanj seiq maenz haj, baenzneix bengz! Seiq maenz haj gou youq ndaw hagdangz cungj ndaej gwn song donq noh lo! Hoeng, gou caengz ndaej gwn faenjsae gvaq, suenq lo, gwn couh gwn ba. Gou haebhaeb heuj, daj ndaw daehvaq mbon ok haj maenz ngaenz, aeu vanj faenjsae ndeu, lauxbanj boujdauq haj gak, sim’in liux lo! Caeklaiq vanj faenjsae gig rim, ndawde lij miz haujlai doxgaiq, ceiq youqgaenj dwg ndawde lij miz di nohcacau, gou ceiq maij gwn noh lo, dij lo! Gou gwn mbouj ndaej manh, haxbaenh gaenq daengq lauxbanj faenjsae gou mbouj aeu manh lo, hoeng lauxbanj naeuz faenjsae mbouj coq manh fouzfeih, coq di hawj gou ndwi. Seizneix faenj haeuj bak, daengx bak doq manh ndaej maz feihdauh hix cimz mbouj ok, lij aegege, faenjsae gwn mbouj baenz lo, caen dwg laemq ngaenz, baezlaeng caiq mbouj gwn faenjsae lo!

Sujgyaj gauhcungh bizyez bi- haenx, lwgbyai bajseiq ranz youq Liujcouh haenx aeu yah, gou caeuq daxboh bae ranz de gwn laeuj, neix dwg gou baez daih’it daeuj Liujcouh. Ngoenzhaenx hoihlaeuj caengz hainduj, gobiujngeih couh daengq gou haeuxcaeuz itdingh aeu gwn noix di, laeng di de daiq gou caeuq dahlaenj bae gwn doxgaiq ndei. Gou gig geizheih, couh cam de dauqdaej bae gwn maz, hoeng, de dan riunyumnyum cungj mbouj gangj. Gou youh yaek cam, dahlaenj raen le couh riu dwk doiq gou naeuz:“Daengz seizhaenx mwngz couh rox lo, gou haengjdingh mwngz maij gwn.” Vah gangj baenzneix lo, gou lij cam maz ne?

Deq dwk lo. Haemhhaenx 10 diemj lai, gobiujngeih couh daiq dou ok dou, youq gwnz roen gou caen dwg youh geizheih youh miz di faengz. Hoeng, gobiujngeih daiq dou haeuj bakdou aen bouq faenjsae ndeu seiz, gou cungj dadaengx caez, ndawsim gag ngeix, gij doxgaiq gobiujngeih gangj mbouj dwg faenjsae gij doxgaiq gou gangj gvaq baezlaeng mbouj caiq gwn saek baez haenx ba? Caen dahraix, gobiujngeih hai bak haenh naeuz:“Faenjsae, huq ndei Liujcouh, daengx guek mizmingz! Feihdauh youh manh youh sangj, mwngz haengjdingh maij gwn!” Gobiujngeih mbouj rox de gangj coenz vah neix gou gaenq nyapnyuk lo, gou caen mbouj siengj gwn ha! Hoeng, yawj gij yiengh gobiujngeih caeuq dahlaenj, baenz- neix faengz, gou youh mbouj nyaenxsim gangj gou mbouj haengj gwn.

(caengz sat)