Yungzyen Swliengz Cin Lungzcin Cunh daengxgyoengq vunzmbanj dawz hwnjguh aenmbanj caeuq hongsaeh hwngfat giethab hwnjdaeuj, hawj vunzvunz roxyiuj gijndei louz ndei bya heu raemx saw、henhoh aenmbanj gyaeundei, caezsim haenqrengz bae cauxguh aen mbanjranz mbanj gyaeu minz fouq vunz doxhuz ndeu.

Lungzcin Cunh dieg youq baihbaek Swliengz Cin, liz gyanghaw Swliengz miz 3.5 goengleix gyae. Daengx cunh miz 16 aen cunhminz siujcuj, gungh 827 ranz 2563 vunz. Geij bi neix daeuj, vunzmbanj aen cunh neix hopheux gij moegbiu “cauxguh aen vanzging ngamj hongsaeh ngamj dinghyouq swnghdai、swyenz、gyaeundei ndeu” neix, giethab gijndei swhyenz swnghdai ndaw cunh, hableix gohyoz dwk bae dajveh caeuq haifat. Bi 2015 nienzco, gyoengq vunzmbanj ginggvaq doxcomz caez yaeng gietdingh gag baengh rengz bonjfaenh dawz Byabaujyaz guh baenz aen gunghyenz ndeu, baenzneix gangj guh couh guh, gyoengq vunzmbanj miz ngaenz ok ngaenz, miz dieghoengq ok dieghoengq, gonqlaeng comz ndaej 60 lai fanh maenz ngaenz, caezsim roengzrengz guh le gyawj bi ndeu seizgan, guhbaenz aen Lungzcin Cunh Swnghdai Vwnzva Gunghyenz ciemq dieg 300 lai moux, ndaem miz gofaexrang、gofaexcueng daengj doenghgo faex dijbauj, comz miz lienhndang、 youqndwi、 guh’angq caeuq gohbuj gyauyuz caemhguh neix, baenz le gizdieg ndei vunzmbanj ngoenznaengz youqndwi、guh’angq ndeu. Riengzlaeng vunzmbanj youh comz ngaenz 20 lai fanh maenz (dajveh roengzngaenz 100 fanh maenz) laebguh le “swnghdai nungzyez yawjgingj diegmbaeq gunghyenz” ciemq dieg 20 lai moux, gaenq guhbaenz diegbingz giuzbyaij yawjgingj、haenzfai baiz raemxrongz caeuq aen daemzngaeux ndaem miz mbuva、mbuninz、mbufaen, ndaw daemz cuengq ciengx byaleixgim、hanqmbwn daengj doenghduz dem, comz swnghdai yawjngonz、fuzbinz baenz fouq caez guh ndeu, baenz Yungzyen、Yilinz Si caiqlij daengx Guengjsae aen gunghyenz diegmbaeq cunhgaep daih’it ndeu.

Riengzdwk ndaw cunh gak cungj goekdaej goengnaengz guh ndaej caezcienz, Lungzcin Cunh bienq ndaej engq gyaeundei, gyoengq vunzmbanj aensim caemh engq haenz lo — Ndaw cunh doenggvaq hwngfat cizdij ginghci, gyarengz guh ndei hongsaeh daegsaek swnghdai lijyouz caeuq gyagoeng cehmbu, hawj vunzmbanj souhaeuj ndaej demlai. Seizneix, gyoengqde youh doenghhong guh aen suen daejniemh yawjgingj makbugdiengz miz 200 moux dieg ndeu, cauxguh ranghdieg guhyiengh nungzyez yawjgingj daemzngaeux, dawz aen Daemzlungzcin baihnaj cunhveijvei gaij guh baenz daemzngaeux yawjgingj, coihcingj aen cingjraemx gaeuq miz 200 lai bi lizsij haenx… Daj bi 2015 doxdaeuj, Lungzcin Cunh gonqlaeng aeundaej aen mingzdaeuz ndei “Yilinz Si aenmbanj guhyiengh swnghdai” caeuq “Swcigih aenmbanj guhyiengh swnghdai”.

Seizneix, Lungzcin Cunh roenmbanj bingzbwd gvangqyub luengqhongh doengrat, ranzlaeuz daengjroebroeb, faexheu gova hophumx. Gyoengq vunzmbanj cwxcaih dwk youq ndaw suencaz nyaeb mbawcaz, youq ndaw suen makbugdiengz ganqhoh, youq ndaw swnghdai vwnzva gunghyenz ciengqheiq, youq giuzcangz ronghdaeng dwkgiuz lienhndang, saedceij angqyangz vuenyungz.