——Geiq Canghfwen Gwnz Muengx Okmingz “Yah Vujsenh” Goz Siulenz

Ciuhvunz geizheih: Eu fwen okmingz dohdaengz gwnz muengx

Louz Cejsam, aen mingzcoh cienz doh gwnzbiengz ndeu, de dwg boux- bienqndang sienfwen Bouxcuengh. Cejsam ciuhciuh dawz fwen cienz, sing fwen Mbanjcuengh caengz gat gvaq. Seizneix, Mbanjcuengh miz boux fwenvuengz gwnz muengx okmingz ndeu, de youq gwnz muengx miz baenz bak fanh boux bouxmaezfwen, miz vunz naeuz, de dwg bouxcienzfwen Louz Cejsam. Mingzcoh de heuhguh Goz Siulenz, gyoengq vangjyouj heuh de guh “Yah Vujsenh”.

“Bouxboux heuh gou Yah Vuj- senh, eu fwen okdaeuj lae baenz dah; vunz haenh gou dwg Louz Cejsam, gvan gou ndaq gou dwg yahfeq.” Ndwen 5 ngoenz 25, ndaw aen gyausiz hung yiengh aenlae Vujsenh Yen Sizyen Siujyoz haenx, riengz gij sing fwen ndeidingq、swz fwen mizyinx、gag gaisau bonjfaenh mizyinx de, ndaw aen gyausiz naengh miz ca mbouj geijlai 60 boux lauxsae caeuq hagseng nem ndaw yienh bouxdaeuz mizgven bouhmonz haenx sing dopfwngz sikhaek goksasa hwnjdaeuj. Neix dwg aen ciengzgingj mwh “Yah Vujsenh” Goz Siulenz ndaej iu bae camgya Vujsenh Yen aen hozdung “heiq haeuj hagdangz” ndeu, de cingq vih hagseng aen hagdangz neix hwnj dangz “dangz vwnzva fwen” ndeu.

“Mingz gou heuhguh Goz Siulenz, daj iq sengmaj youq Vujsenh; vunz haenh gou lumj Louz Cejsam, eu fwen ok bak van gvaq dangz.” Bouxokmingz gwnz muengx Goz Siulenz, miz duenh ciuhvunz eu fwen geizheih ndeu. Goz Siulenz bi 1961 doekseng, vunz Mbanj Hozbingz Vangzmauz Cin Vujsenh Yen. De youq ndaw haijfwen Mbanjcuengh majhung, gyaezmaij fwen, baez eu couh eu ndaej 40 lai bi lo. Youq ciuhvunz eu fwen de, miz geij duenh ginglig haemq miznaj: Bi 2006, Vujsenh Yen banh aen ciet yisuz vwnzva minzcuz, de baez eu couh okmingz; bi 2008, de camgya “Guengjsae Fwenvuengz Doxdax” youq Yungzsuij Myauzcuz Swciyen banh haenx, cengndaej aen cwngheuh “fwenvuengz”; bi 2012, de camgya Cunghyangh Densidaiz aen cezmuz《Feihcangz 6+1》haijsenj swnhleih hwnjgaep, ndaej laebdaeb doxdax roengzbae, caemhcaiq ndaej Cez- gyangh Veisi “sing’yaem ndei Cung- guek” yawjhwnj, ndaej iu bae Sang- haij sawq sing, de yungh gij singhoz daegbied caeuq gij fwen gag miz funghgwz haenx eu ok Sanghaijdanh; bi 2013, de camgya Guengjsae gaiq daih’it fwenvuengz “vuengz ndaw vuengz” doxdax cengndaej mingz daihngeih; Cunghyangh Densidaiz、Guengjsae Densidaiz、Liujcouh Den- sidaiz、《Guengjsae Yizbau》《Liuj- couh Yizbau》 daengj aen meizdij cungj doiq de guh bauqlwnh gvaq……

Seizneix Goz Siulenz bienqbaenz canghfwen gwnz muengx okmingz vunzvunz cungj rox, dwg aenvih aen sibinz 《“Yah Vujsenh” Dingj “Goenggeq Liujcouh”》de doiq fwen haenx cienz doh gwnz muengx lo, youq gwnz geijcib aen vangjcan sibinz ndaw guek haemq miz rengzyingjyangj haenx, aen sibinz neix cungj miz geij fanh vunz diemj haeujbae yawj.

Hai bak baenz fwen: Vunz haenh de dwg Louz Cejsam

“Haemhlwenz banhwnz caen geizheih, loq raen gyaeqgaeq benz laelaeuz; gyo’mbaiq bingzveij yawj- hwnj gou, haijsenj ndaej hwnj ‘6+1’.” Neix dwg bi 2012 ndwen 7 ngoenz 10, mwh Goz Siulenz bae Baekging camgya Cunghyangh Densidaiz《Feihcangz 6+1》haijsenj hot fwen “fwen haiciengz” de yienhciengz eu haenx, neix hawj geij boux bingzveij、daujyenj gawq raen geizheih youh miz ngeizvaeg: Gij fwen baenzneix ndei, mbouj dwg youq neix gaxgonq couh “boih roengzdaeuj” luba? Ndigah bingzveij daegdaengq “diuqnanz” de, hawj de cimdoiq 5 boux bingzveij laemzseiz eu hot fwen ndeu dem. Siengj mbouj daengz, Goz Siulenz siengj hix mbouj siengj, ajbak couh eu hwnjdaeuj:“Haj boux bingzveij naengh baenz baiz, song dah sau caeuq sam daeg mbauq; danghnaeuz boux ndeu boiq boux ndeu; lij lw daeg dog deng caepdaih.”

Baezneix, haj boux bingzveij cungj fug liux, gyoengqde cungj daengj hwnj lwgfwngzmeh haenh naeuz: Dang ndaej hwnj bouxvunz daj mbanjranz Louz Cejsam daeuj!

Gaenlaeng, Goz Siulenz ndaej iu bae camgya Cezgyangh Veisi aen hozdung doxdax “sing’yaem ndei Cungguek”, bae Sanghaij sawq sing. Youq ndaw aen diengz loegyaem, daujyenj hawj de ciengq《Loh Mbwn》 《Fwen Couhlumj Raemxdah Seizcin》 doengh diuz go neix. Goz Siulenz ciuqsaed naeuz: Neix mbouj dwg gij go gou caixhangz, gou ceiq caixhangz eu gij fwen Mbanjcuengh dou. Daujyenj gig geizheih, hawj de eu song hot daeuj dingqdingq. Goz Siulenz hai bak couh eu:“Vaidanh Sanghaij gingjsaek ndei, raemx Vangzbujgyangh nyinh conghhoz; gij fwen Liujcouh lumj raemxdah, bibi nienznienz lae mbouj gat.” Daujyenj youh hawj de eu gij fwen caeuq Vujsenh nem Sanghaij mizgven haenx, de swnh bak couh eu hwnjdaeuj:“Gou dwg Vujsenh roeg- dinghgeng, mbin daengz rongz duz- fungh Sanghaij; Singhgungh Veisi iucingj gou, youq henz Vangzbuj- gyangh eu fwen.” Eu liux, gyoengq- vunz gig boiqfug de, Guengjsae meh lajmbanj Bouxcuengh neix caen mbouj genjdanh bw!

Cinz Siengzcouh veicangj Aen Yozvei Fwen Guengjsae bingzlwnh gij fwen Goz Siulenz: Daih’it, de eu fwen dwg hai bak eu, mbouj dwg “biujyienj”, ndawde cungj dwg caen- cingz, ndigah ndaej yungzheih hawj bouxdingq gamjdoengh; daihngeih, gij vah de sengdoengh miz yinx, miz gij “feih manh” de gag miz haenx, daegbied dwg youq daeuq fwen, haemq miz gij feihdauh daeuq fwen ndaw denyingj《Louz Cejsam》; daihsam, de eu fwen mbouj dwg luenh gangj luenh son, depgaenh ndwenngoenz, dep- gaenh vunzlai. Lumjbaenz de youq Baekging Denh’anhmwnz eu naeuz:“Gwnz Denh’anhmwnz mbawgeiz mbin, beksingq daengx guek caez caemh sim; gak cuz doxgiet riengz dangj byaij, gwnz roen siujgangh angqvauvau.” Eu ndaej sengdoengh caensaed, gig depgaenh vunzlai.

Yungh sim eu fwen: Aeu guh bouxswnjcienz fwen

“Gij cienz bohmeh aeu bae sai, gyanghwnz samgeng haeuj vangjbah; cungj hagseng neix binjdwz vaih, caezgya ciengeiz gaej hag de.” Neix dwg ndwen 5 ngoenz 25 gij fwen Goz Siulenz youq Vujsenh Yen Sizyen Siujyoz son gyoengq lwgnyez eu haenx. Gij fwen neix swz fwen doeng- sug rox ngaih、cigsoh sengdoengh、dauhleix cingcuj, gyoengq lwgnyez yungzheih ciepsouh, gyoengqde eu ndaej nyinhcaen raixcaix, youh gig sim’angq.

“Gimhenj fanh gyangz vat ndaej ngaih, aencingz lauxsae hoj boiz dauq; hagseng aeu rox maij lauxsae, couh lumj lwg cungj gyaez bohmeh.” Seiz Goz Siulenz eu sat hot fwen miz gij eiqsei aeueiq lauxsae yawjnaek son vunz neix, gij sing dopfwngz hagseng、lauxsae ndaw gyausiz cungj nanznanz mbouj daengx.

Riengz mingzdaeuz yied daeuj yied hung, geij bi neix doxdaeuj Goz Siulenz ciengzseiz ndaej iucingj bae gak dieg eu fwen. Bi 2011 ndaej iucingj bae Swcigih Genjcazyen hawj gyoengq genjcazgvanh hwnj goq vwnzva fwen; bi 2016 ndaej iucingj bae camgya Guengjsae Densidaiz Cunhvanj yienjok, doengzbi caemh ndaej hwnj aen daizheiq Liujcouh Vangjloz Cunhvanj. Dan bineix doxdaeuj, de couh han iu camgya le “Aenhoih Fwen Eu Gij Cingsaenz Gangjvah Youqgaenj Cungjsuhgi Cunzcaz Guengjsae” youq Yilinz Si banh haenx、“Bi 2017 Cung- guek——Dunghmungz Bozlanjvei Vwnzva Canj” youq Namzningz banh haenx daengj cibgeij ciengz hozdung.

Eu fwen daiq angqyangz daeuj hawj daihgya, doengzseiz caemh ndaej youq ndaw angqyangz cienz naengz- liengh ndei, ndigah de engq yunghsim eu lo. Cinz veicangj naeuz, “Yah Vujsenh” eu fwen ndaej hawj vunz doenghsim, lij miz aen yienzaen youqgaenj dem dwg de “aeu fwenyoux cuengq youq ndawsim”. De daeg- daengq hawj gicej cienjfat diuz veihsin ndeu, neiyungz dwg moux densidaiz boux daujyenj mizmingz ndeu fat hawj de:

“Miz baez ndeu bae Liujcouh loeg cezmuz, aenvih vunz lailai luenh lai ngaiz yingjyangj ingjsiengq lo, gou nyaenx mbouj ndaej hozndat hwnj- daeuj, doiq vunzlai rongx sing ndeu—‘Doiq laeng!’ Doeklaeng Goz lauxsae rag gou gvaq henzgyawj bae naeuz, daujyenj, vunzlai mbouj ndaej ndaq, gyoengqde dwg daeuj dingq gou eu fwen, gou hawj gyoengqde doenq gvaq raeblaeng bae couh ndei lo. Mwhhaenx gou roxnyinh gou boux ‘daujyenj mizmingz’ neix, caen gag raen najmong! Ndigah daj mwhhaenx hainduj, gou couh gig fug canghheiq ndawbiengz lumj de baenzneix, caen dwg aeu vunzlai cuengq youq ndawsim!”

“Gofaex va fwen bibi moq, cungj baengh vunzlai rap raemx rwed; diuzhanz Cejsam gyau hawj mwngz, aeu guh ndei bouxswnjcienz fwen.” Cinz veicangj naeuz, hot fwen Goz Siulenz ciengzseiz youq hagdangz son hagseng eu neix, cingqngamj eu ok gij simmuengh de, gij ciuhvunz de.